ລະດູການໂຄສະນາຫາສຽງເລືອກຕັ້ງປະທານາທິບໍດີຂັ້ນຕົ້ນ ໄດ້ສິ້ນສຸດລົງຢ່າງເປັນທາງການ ໃນວັນອັງຄານວານນີ້ ໃນຂະນະທີ່ທ່ານນາງ Hillary Clinton ໄດ້ຊະນະທ່ານ Bernie Sanders ທີ່ນະຄອນຫລວງວໍຊິງຕັນ ແລະຜູ້ສະໝັກທັງສອງໄດ້ຈັດໃນອັນທີ່ພວກທ່ານຮ້ອງວ່າ “ການສົນທະນາໃນທາງບວກ” ທີ່ວໍຊິງຕັນ.
ທ່ານນາງ Clinton ແມ່ນຜູ້ທີ່ຈະຖືກສະເໜີຂອງພັກເດໂມແຄຣັດ ພ້ອມທັງການເລືອກເອົາທ່ານນາງເປັນທາງການ ຄາດວ່າຈະມີຂຶ້ນທີ່ກອງປະຊຸມໃຫຍ່ຂອງພັກ ທີ່ນະຄອນ Philadelphia ໃນເດືອນໜ້ານີ້. ທ່ານ Sanders ຍັງສືບຕໍ່ການໂຄສະນາຫາສຽງຂອງທ່ານ ເຖິງແມ່ນວ່າ ມີຄະແນນເປັນຮອງ ໃນການແຂ່ງຂັນມາເປັນເວລາຫລາຍເດືອນແລ້ວ ຊຶ່ງໄດ້ອະນຸຍາດໃຫ້ທ່ານມີອິດທິພົນຈຳນວນນຶ່ງໃນ ການກຳນົດນະໂຍບາຍຂອງພັກ.
ທັງສອງຝ່າຍ ໄດ້ອອກຖະແຫລງການທີ່ຄ້າຍຄືກັນ ຫລັງຈາກການປະຊຸມໂດຍ ກ່າວວ່າ ທ່ານນາງ Clinton ແລະທ່ານ Sanders ໄດ້ສົນທະນາຫາກ່ຽວກັບ ບູລິມະສິດທີ່ສຳຄັນຕ່າງໆທີ່ທັງສອງຝ່າຍມີຮ່ວມກັນເຊັ່ນວ່າ ການຂຶ້ນເງິນເດືອນ ປະຕິຮູບກົດໝາຍການເງິນໃນການໂຄສະນາຫາສຽງ ແລະເຮັດໃຫ້ຄ່າຮຽນຂັ້ນມະຫາວິທະຍາໄລຖືກລົງເປັນທີ່ຈັບຈ່າຍໄດ້.
ນອກນັ້ນ ພວກເຂົາເຈົ້າຍັງໄດ້ເວົ້າເຖິງ “ໄພຂົ່ມຂູ່ທີ່ ທ່ານ Trump ມີຕໍ່ປະເທດຊາດຂອງພວກເຮົາ.”
ໃນການເລືອກຕັ້ງຂັ້ນຕົ້ນ ທີ່ນະຄອນຫລວງວໍຊິງຕັນນັ້ນ ທ່ານນາງ Clinton ໄດ້ຊະນະ 78 ເປີເຊັນຂອງການປ່ອນບັດ ທ່ານ Sanders ໄດ້ 21 ເປີເຊັນ. ນັ້ນໄດ້ເຮັດໃຫ້ທ່ານນາງ Clinton ໄດ້ຮັບຜູ້ຕາງໜ້າ 2,219 ຄົນ ແລະທ່ານ Sanders ໄດ້ 1,832 ຄົນ. ທ່ານນາງ Clinton ຍັງຂາດສຽງສ່ວນຫລາຍຈຳນວນ 2,383 ຄົນ ທີ່ຕ້ອງການຢ່າງເປັນທາງການ ຈຶ່ງຈະໄດ້ຮັບການສະເໜີຊື່ ແຕ່ວ່າທ່ານນາງໄດ້ຮັບການສະໜັບສະໜູນຂອງອັນທີ່ຮ້ອງວ່າ ບັນດາຜູ້ຕາງໜ້າພິເສດ ຫລື super delegates ຜູ້ທີ່ຈະຊຸກຍູ້ທ່ານນາງມີຄະແນນສຽງເກີນກວ່າ ພຽງພໍ ຢູ່ທີ່ກອງປະຊຸມໃຫຍ່ຂອງພັກ.
ກອງປະຊຸມໃຫຍ່ຂອງພັກເດໂມແຄຣັດຈະເລີ້ມແຕ່ວັນທີ 25 ຫາ 28 ເດືອນກໍ ລະກົດ. ພັກຣີພັບບລິກັນຈະຈັດກອງປະຊຸມໃຫຍ່ເຂົາເຈົ້າແຕ່ວັນທີ 18 ຫາ 21 ເດືອນກໍລະກົດ ຢູ່ທີ່ເມືອງ Cleveland.
ການຢັ່ງສຽງໃໝ່ຂອງໂທລະພາບ NBC ແລະການສຳຫຼວດ SurveyMonkey ທີ່ນຳອອກເຜີຍແຜ່ໃນວັນອັງຄານວານນີ້ິສະແດງໃຫ້ເຫັນວ່າ ທ່ານນາງ Clinton ມີຄະແນນນຳໜ້າທ່ານ Trump 49 ຕໍ່ 42 ເປີເຊັນ.
ຊາວອາເມຣິກັນຈະປ່ອນບັດໃນວັນທີ 8 ເດືອນພະຈິກຈະມານີ້ ເພື່ອເລືອກເອົາຜູ້ນຳຄົນຕໍ່ໄປແທນທ່ານ Barack Obama ທີ່ຈະອອກຈາກຕຳແໜ່ງໃນເດືອນ ມັງກອນ ຫລັງຈາກໄດ້ຮັບໃຊ້ຫລາຍສຸດແປດປີຂອງການເປັນປະທານາທິບໍດີ.
