ລັດຖະມົນຕີການຕ່າງປະເທດສະຫະລັດທ່ານນາງ Hillary Clinton ໄດ້ກ່າວຊົມເຊີຍພວກ
ນັກເຄື່ອນໄຫວດ້ານສັງຄົມພົນລະເຮືອນ ແລະດ້ານສິດທິມະນຸດຣັດເຊຍກ່ຽວກັບວຽກງານ
ຂອງພວກເຂົາເຈົ້າທັງໆທີ່ໄດ້ຮັບອຸບປະສັກຂັດຂວາງຈາກລັດຖະບານຣັດເຊຍ.
ທ່ານນາງ Clinton ເວົ້າວ່າ “ພວກເຮົາເຊື່ອວ່າວຽກງານທີ່ພວກທ່ານເຮັດໄປນັ້ນມີຜົນໂດຍ
ກົງຕໍ່ອະນາຄົດຂອງຣັດເຊຍ ບໍ່ວ່າພວກທ່ານພວມໃຫ້ການສະໜັບສະໜຸນ ເພື່ອຊຸກຍູ້ການ
ເລືອກຕັ້ງເສລີ ແລະເປັນທຳ ການຕໍ່ສູ້ເພື່ອທັບມ້າງການຈຳແນກກີດກັນ ການປົກປ້ອງສິດທິ
ຂອງພວກຄົນງານ ຫຼືເປົ້າໝາຍອື່ນໆທາງດ້ານສັງຄົມພົນລະເຮືອນກໍຕາມ.
ລັດຖະມົນຕີການຕ່າງປະເທດ Clinton ໄດ້ພົບປະກັບພວກນັກເຄື່ອນໄຫວຊາວຣັດເຊຍຈຳ
ນວນນຶ່ງໃນມື້ວັນສຸກວານນີ້ທີ່ບ້ານພັກກົງສຸນໃຫຍ່ຂອງສະຫະລັດໃນນະຄອນ St. Peter-
sburg ຫົວເມືອງໃຫຍ່ອັນດັບສອງຂອງຣັດເຊຍ.
ທ່ານນາງກ່າວວ່າ ປະຊາຊົນຊາວຣັດເຊຍເປັນຄົນຂະຫຍັນຂັນແຂງ ແລະສົມຄວນຈະໄດ້ຮັບ
ລັດຖະບານ ທີ່ດຳເນີນງານເພື່ອປົກປ້ອງຜົນປະໂຫຍດຂອງພວກເຂົາເຈົ້າ ແລະເຄົາລົບນັບຖື
ສິດທິມະນຸດ.
ລັດຖະບານຣັດເຊຍໄດ້ຕຳໜິຕິຕຽນສະຫະລັດແລະສະຫະພາບຢູໂຣບຕໍ່ອັນທີ່ຣັດເຊຍເອີ້ນ
ວ່າ “ຍຸແຍ່ໃຫ້ເກີດຄວາມບໍ່ພໍໃຈຂຶ້ນຢູ່ໃນຣັດເຊຍ” ນັ້ນ.
ສະພາແຫ່ງຊາດຂອງຣັດເຊຍພວມສຶກສາເບິ່ງຮ່າງບົດແກ້ໄຂທີ່ຈະຈັດບັນດາອົງການຈັດຕັ້ງ
ທີ່ບໍ່ຂຶ້ນກັບລັດຖະບານ ທີ່ໄດ້ຮັບເງິນ ຈາກຕ່າງປະເທດນັ້ນວ່າ ເປັນເຈົ້າໜ້າທີ່ພະນັກງານ
ຂອງຕ່າງປະເທດ. ທ່ານນາງ Clinton ໄດ້ຮັບຮູ້ເຖິງຄວາມຍຸ່ງຍາກຕ່າງໆທີ່ກຳລັງປະເຊີນ
ໜ້າກັບພວກນັກເຄື່ອນໄຫວຣັດເຊຍ.
ການພົບປະທີ່ວ່ານີ້ມີຂຶ້ນ ກ່ອນການພົບປະທີ່ສຳຄັນ ຂອງທ່ານນາງ Clinton ກັບລັດຖະ
ມົນຕີການຕ່າງປະເທດຣັດເຊຍທ່ານ Sergei Lavrov ທີ່ແນໃສ່ເພື່ອໃຫ້ບັນລຸການຕົກລົງ
ກ່ຽວກັບວ່າຈະເຮັດແບບໃດກັບຊີເຣຍກ່ອນກອງປະຊຸມທີ່ໄດ້ຮັບການສະໜັບສະໜຸນຈາກ
ອົງການສະຫະປະຊາຊາດກ່ຽວກັບເລື່ອງດັ່ງກ່າວໃນວັນເສົາມື້ນີ້ທີ່ນະຄອນເຈນີວາ.