ຜູ້ສະໝັກເປັນປະທານາທິບໍດີພັກເດໂມແຄຣັດ ທ່ານນາງ Hillary Clinton ໄດ້ເລືອກເອົາສະມາຊິກສະພາສູງ ຈາກລັດ Virginia ທ່ານ Tim Kaine ລົງສະໝັກເປັນຮອງປະທານາ ທິບໍດີ ຮ່ວມກັບທ່ານນາງ.
ທ່ານ Kaine ເປັນນັກການເມືອງທີ່ມີປະສົບການຂອງພັກເດໂມແຄຣັດ ທີ່ອະທິບາຍກ່ຽວກັບໂຕທ່ານເອງວ່າ “ບໍ່ມີຄວາມຕື່ນເຕັ້ນ.” ນອກນັ້ນ ທ່ານຍັງເປັນບຸກຄົນນິຍົມແນວທາງ ປານກາງ ຊຶ່ງອາດມີໂອກາດ ທີ່ຈະດືງດູດເອົາບັນດາຜູ້ມີສິດ ປ່ອນບັດ ທີ່ບໍ່ເຫັນພ້ອມກັບທ່ານ Donald Trump ແລະບັນດາຜູ້ທີ່ມີຄວາມຍາກລຳບາກ ທີ່ຈະໃຫ້ການສະໜັບສະ ໜຸນແກ່ທ່ານນາງ Clinton ຢ່າງເຕັມທີ່ນັ້ນ.
ທ່ານນາງ Clinton ກ່າວຕໍ່ໂທລະພາບ CBS ວ່າ “ທ່ານບໍ່ເຄີຍເສຍໄຊໃນການເລືອກຕັ້ງ. ທ່ານໄດ້ເປັນເຈົ້າຄອງກຳແພງເມືອງລະດັບໂລກ ເປັນຜູ້ປົກຄອງລັດ ແລະສະມາຊິກສະ ພາສູງ ແລະເປັນນຶ່ງໃນບັນດາສະມາຊິກສະພາສູງ ທີ່ໄດ້ຮັບ ການເຄົາລົບທີ່ສຸດ ເທົ່າທີ່ຂ້າພະເຈົ້າຮູ້.”
ທ່ານ Kaine ໄດ້ສົ່ງຂໍ້ຄວາມຜ່ານທາງ Twitter ວ່າ ທ່ານຮູ້ສຶກເປັນກຽດທີ່ໄດ້ຖືກເລືອກ ແລະທ່ານ “ອົດລໍຖ້າບໍ່ໄດ້ທີ່ຈະອອກໄປໂຄສະນາຫາສຽງ” ໃນວັນເສົາມື້ນີ້ທີ່ນະຄອນ Miami. ເປັນທີ່ຄາດກັນວ່າທ່ານຈະປາກົດໂຕຮ່ວມກັບທ່ານນາງ Clinton ຢູ່ໃນການໂຄສະນາຫາສຽງ ທີ່ມະຫາວິທະຍາໄລ Miami.
ທ່ານ Kaine ອາຍຸ 58 ປີ ເກີດຢູ່ລັດ Minnesota ແລະຈົບການສຶກສາເປັນທະນາຍຄວາມ ຈາກມະຫາວິທະຍາໄລ Havard. Harvard ແມ່ນໂຮງຮຽນກົດໝາຍດຽວກັນກັບທີ່ ປະທານາທິບໍດີ Barack Obama ໄດ້ຮຽນຈົບອອກມາ.
ແຕ່ວ່າ ທ່ານ Kaine ໄດ້ຢຸດຮຽນເປັນເວລານຶ່ງປີ ທີ່ Havard ເພື່ອເຮັດວຽກໃຫ້ແກ່ຄະນະສອນສາສະໜາ Catholic ແລະເປັນນາຍຄູສອນຢູ່ທີ່ປະເທດ Honduras.
ອີງຕາມປະຊີວະປະຫວັດຂອງທ່ານແລ້ວ ທ່ານ Kaine ໄດ້ໄປສັງເກດເບິ່ງຄວາມທຸກຈົນຢ່າງໃກ້ຊິດຢູ່ອາເມຣິກາກາງ ແລະໄດ້ພົບເຫັນໃນສິ່ງທີ່ທ່ານສາ ມາດເຮັດໄດ້ໃຫ້ແກ່ຊີວິດມະນຸດ. ກ່າວກັນວ່າ ການໃຊ້ເວລາຂອງທ່ານຢູ່ທີ່ນັ້ນ ໄດ້ຊ່ວຍປະກອບການສະໜັບສະ ໜູນຂອງທ່ານ ຕໍ່ການຂໍສັນຊາດຂອງພວກຄົນເຂົ້າເມືອງທີ່ບໍ່ມີເອກກະສານຢູ່ໃນສະຫະ ລັດ ອັນເປັນທ່າທີ ທີ່ມີທ່າທາງວ່າ ຈະດືງດູດເອົາບັນດາຜູ້ມີສິດປ່ອນບັດທີ່ເປັນຊາວລາຕິນອາເມຣິກັນ.
ທ່ານ Kaijne ໄດ້ເລີ້ມອາຊີບທາງການເມືອງ ໂດຍການເປັນສະມາຊິກສະພາ ເທດສະ ບານທີ່ເມືອງ Richmond ລັດ Virginia ໃນປີ 1994. ຕໍ່ມາທ່ານໄດ້ຖືກເລືອກເປັນເຈົ້າ ຄອງກຳແພງ ໄດ້ຖືກເລືອກເປັນຮອງຜູ້ປົກຄອງລັດ Virginia ໃນປີ 2002 ແລະໄດ້ຮັບ ຕຳແໜ່ງຜູ້ປົກຄອງລັດໃນປີ 2006.
ກ່ອນຖືກເລືອກເປັນສະມາຊິກສະພາສູງສະຫະລັດ ໃນປີ 2012 ທ່ານ Kaine ໄດ້ເປັນປະທານຄະນະກຳມະການພັກເດໂມແຄຣັດແຫ່ງຊາດ.
ອ່ານຂ່າວນີ້ເພີ້ມເປັນພາສາອັງກິດ
