ລິ້ງ ສຳຫລັບເຂົ້າຫາ

ສະຫະລັດ ເຕືອນຊີເຣຍ

  • ໄພສານ ວໍຣະຈັກ

ລັດຖະມົນຕີ ການຕ່າງປະເທດ ສະຫະລັດ ທ່ານນາງຮິລລາຣີ ຄລິນຕັນ ກ່າວວ່າ ການໂອນອາວຸດ ຂອງຊີເຣຍ ຕາມທີ່ມີການກ່າວຫາ ໃຫ້ແກ່ກຸ່ມ ຫົວຮຸນແຮງເຮສໂບລລາ ໃນເລບານອນນັ້ນ ແມ່ນເປັນໄພຂົ່ມຂູ່ ຢ່າງຮ້າຍແຮງ ຕໍ່ອິສະຣາແອລ ແລະອາດ ພາໃຫ້ເກີດ ຄວາມບໍ່ທຸ່ນທ່ຽງ ໃນພາກ ຕາເວັນອອກກາງ ທ່ານນາງຄລິນຕັນ ໃຫ້ທັດສະນະ ດັ່ງກ່າວ ທີ່ກຸງວໍຊິງຕັນ ໃນວັນພະຫັດ ວານນີ້ ຄຽງຂ້າງ ລັດຖະມົນຕີ ປ້ອງກັນປະເທດ ອິສະຣາແອລ ທ່ານເອຮູດ ບາຣັກ ຕໍ່ໜ້າຄະນະ ກຳມະການ ຊາວອະເມລິກັນ ເຊື້ອສາຍຢິວ ຊຶ່ງເປັນກຸ່ມ ນິຍົມອິສະຣາແອລ ທີ່ມີສຳນັກງານ ໃນສະຫະລັດ. ທ່ານນາງຄລິນຕັນ ເວົ້າວ່າ ການກ່າວຫາວ່າ ຊີເຣຍຕິດອາວຸດ ໃຫ້ແກ່ກຸ່ມເຮສໂບລລານັ້ນ ອາດນຳພາໄປສູ່ ການເກີດສົງຄາມໄດ້ ແຕ່ທ່ານນາງ ໄດ້ກ່າວປ້ອງກັນ ການຕັດສິນໃຈ ຂອງປະທານາທິບໍດີ ສະຫະລັດ ທ່ານບາຣັກ ໂອບາມາ ທີ່ຈະສົ່ງ ເອກອັກຄະລັດຖະທູດ ສະຫະລັດ ຄົນທຳອິດ ໄປຍັງຊີເຣຍ ນັບແຕ່ປີ 2005 ເປັນຕົ້ນມາ. ທ່ານນາງ CLINTON ເວົ້າວ່າ ມັນເປັນເລື່ອງສຳຄັນ ສຳລັບສະຫະລັດ ຕ້ອງໄດ້ຕິດຕໍ່ໂດຍກົງ ກັບຊີເຣຍ ຂະນະທີ່ ປະເທດດັ່ງກ່າວ ຍັງໄດ້ຟັງສຽງ ຂອງອີຣ່ານ ແລະ ກຸ່ມຫົວຮຸນແຮງເຮສໂບລລາ ແລະຮາມັສນັ້ນ. ສ່ວນທ່ານບາຣັກ ກ່າວວ່າ ກຸ່ມເຮສໂບລລາ ອາດມີລູກຈະຫລວດ ຫລາຍເຖິງ 45 ພັນລູກ ຊຶ່ງຈຳນວນນຶ່ງ ອາດມີຄວາມສາມາດ ໃນການຍິງໂຈມຕີ ເປົ້າໝາຍຕ່າງໆ ໃນທົ່ວອິສະຣາແອລໄດ້. ລັດຖະມົນຕີ ປ້ອງກັນປະເທດ ອິສະຣາແອລ ເວົ້າວ່າ ຖ້າສະຖານະການ ຫາກລະເບີດ ເປັນສົງຄາມຂຶ້ນມາ ອິສະຣາແອລ ຈະຖິ້ມໂທດໃສ່ ລັດຖະບານ ເລບານອນ ພ້ອມໆກັບ ກຸ່ມເຮສໂບລລາວ່າ ເປັນຜູ້ຮັບຜິດຊອບ.

XS
SM
MD
LG