ລິ້ງ ສຳຫລັບເຂົ້າຫາ

ບໍລິສັດ ຈີນ ຈະສົ່ງດາວທຽມ ໜ່ວຍທຳອິດຂອງ ລາວ ຂຶ້ນສູ່ ອາວະກາດ


ລັດຖະບານ ລາວ ແລະ ຈີນ ຕົກລົງກັນໃນການສົ່ງດາວທຽມ ໜ່ວຍທຳອິດຂອງ ລາວ ຂຶ້ນສູ່ ອາວະກາດ ໃນທ້າຍ ປີ 2015 ນີ້.

ບໍລິສັດ​ຈີນ ກຳນົດທີ່ຈະ​ສົ່ງ​ດາ​ວທຽມ​ດວງ​ທຳ​ອິດ​ຂອງ​ລາວ ຂຶ້ນສູ່​ວົງ​ໂຄຈອນ ​ໃນ​ທ້າຍ​ເດືອນ​ພະຈິກ​ປີ​ນີ້ ​ເພື່ອ​ເປັນ​ການສະ​ເຫຼີມ ສະຫຼອງ​ ​ໃນ​ໂອກາດ​ການ​ສະຖາປະນາ ສປປ ລາວ ຄົບຮອບ 40 ປີ ​ໃນ​ວັນ​ທີ 2 ທັນວາ​ນີ້.

ທ່ານ​ ຫຽມ ພົມມະຈັນ ລັດຖະມົນຕີ​ວ່າການ ກະຊວງ​ໄປສະນີ ​ແລະ ​ໂທລະ​ຄົມມະນາຄົມ ​ໃຫ້ການ​ຢືນຢັນ​ວ່າ ບໍລິສັດ China APMT ​ແລະ​ບໍລິສັດ​ອຸດສາຫະກຳ ກຳ​ແພງ​ຍັກ​ແຫ່ງປະ​ເທດ ​ຈີນ ຊຶ່ງ​ເປັນ​ບໍລິສັດ ທີ່​ຮັບຜິດຊອບ ​ໃນ​ກາ​ນສ້າງ​ດາວ​ທຽມ​ດວງ​ທຳ​ອິດ​ຂອງ​ລາວ ​ໄດ້​ມີ​ກຳນົດ​ການ​ຢ່າງ​ຄັກ​ແນ່​ແລ້ວ​ວ່າ ຈະ​ດຳ​ເນີນ​ການ​ສົ່ງ​ດາວທຽມ​ດວງ​ທຳ​ອິດ​ຂອງ​ລາວ​ຂຶ້ນສູ່​ວົງ​ໂຄຈອນ ​ໃນ​ທ້າຍເດືອນ​ພະຈິກ 2015 ນີ້ ​ເພື່ອ​ເປັນ​ການສະ​ເຫຼີມສະຫຼອງ ​ໃນ​ໂອກາດ​ການ​ສະຖາປະນາ ສປປ ລາວ​ຄົບຮອບ 40 ປີ ​ໃນ​ວັນ​ທີ 2 ທັນວາ​ປີ​ນີ້.

ຮູບພາບຂອງຈະຫຼວດ ທີ່ຈະນຳດາວທຽມໜ່ວຍທຳອິດຂອງ ລາວ ຂຶ້ນສູ່ອາວະກາດ

ຮູບພາບຂອງຈະຫຼວດ ທີ່ຈະນຳດາວທຽມໜ່ວຍທຳອິດຂອງ ລາວ ຂຶ້ນສູ່ອາວະກາດ

​ໂດຍ​ກ່ອນ​ໜ້າ​ນີ້ ທ່ານ ​ຈູມ​ມະ​ລີ ​ໄຊ​ຍະ​ສອນ ປະທານ​ປະ​ເທດ​ລາວ ພ້ອມ​ດ້ວຍ​ພັນ​ລະ​ຍາ ​ແລະ​ຄະນະ ກໍ​ໄດ້​ເດີນທາງ​ໄປ​ຢ້ຽມ ຢາມ​ປະ​ເທດ​ຈີນ ຢ່າງ​ເປັນ​ທາງ​ການ ​ແລະ​ໄດ້​ຖື​ໂອກາດ​ເດີນທາງ​ໄປ​ຢ້ຽມ​ຊົມ​ຄວາມ​ຄືບ​ໜ້າ​ໃນ​ການ​ສ້າງ ​ແລະ​ການ​ຕຽມ​ຄວາມ​ພ້ອມ​ ໃນ​ການ​ສົ່ງດາວ​ທຽມ​ດວງ​ທຳ​ອິດ​ຂອງ​ລາວ ຂຶ້ນສູ່​ວົງ​ໂຄຈອນ​ດັ່ງ ກ່າວມາ​ແລ້ວ​ເມື່ອ​ວັນ​ທີ 2 ກັນຍາ 2015 ທີ່​ຜ່ານ​ມາ ຊຶ່ງ​ກໍ​ພົບ​ວ່າ ການ​ດຳ​ເນີນ​ງານ​ໄດ້​ເປັນ​ໄປ ຕາມ​ແຜນການ​ທີ່​ວາງ​ໄວ້ ​ໃນ​ທຸກ​ດ້ານດັ່ງ​ທີ່ ທ່ານ​ ສົມ​ສະຫວາດ ​ເລັ່ງ​ສະຫວັດ ຮອງ​ນາຍົກລັດຖະ ມົນຕີ ຜູ້​ຊີ້​ນຳ​ຂົງ​ເຂດ​ເສດຖະກິດການ​ຜະລິດ ​ແລະ ຈະລາຈອນ ​ໄດ້​ໃຫ້ການ​ຢືນຢັນ​ວ່າ:

“ຕາມ​ແຜນການ​ທີ່​ວາງ​ໄວ້ ດາວ​ທຽມ​ດວງ​ນີ້​ນິ ຈະ​ໄດ້​ສົ່ງ​ຂຶ້ນ​ເພື່ອ​ສະຫຼອງ ສປປ ລາວ 40 ປີ ຂ້າພະ​ເຈົ້າ​ໄດ້​ຕິດຕາມ​ປະທານ​ປະ​ເທດ ​ໄປຢາມ​ຮອດ​ບ່ອນ​ເຂົາ​ກຽມ​ຕົວ​ດາວ​ທຽມ​ຫັ້ນ​ແຫລະ ກັບ​ລູກ​ສອນ​ໄຟ ​ເຂົາກໍ​ຢືນຢັນ​ກັບ​ຜູ້ນຳ​ເດ້ ວ່າ​ແມ່ນ​ຈະ​ຖື​ວ່າ​ເປັນ​ເຫດການ​ປະຫວັດສາດ ທີ່​ສົ່ງ​ຂຶ້ນ​ໃນ​ເວລາ​ນັ້ນ.”

ການ​ສ້າງ​ແລະ​ສົ່ງ​ດາວ​ທຽມ​ດວງ​ທຳ​ອິດ​ຂອງ​ລາວ ຂຶ້ນ​ສູ່​ວົງ​ໂຄຈອນ​ດັ່ງກ່າວ ຖື​ເປັນ​ພາກ ສ່ວນ​ໜຶ່ງ​ຂອງ​ການ​ຮ່ວມ​ມື ​ໃນ​ການ​ພັດທະນາ​ເທັກ​ໂນ​ໂລ​ຈີ້​ດ້ານ​ຂໍ້​ມູນ​ຂ່າວສານ ລະຫວ່າງ​ລັດຖະບານ​ລາວ ກັບ​ຈີນ ທີ່​ໄດ້​ລົງ​ນາມ​ຮ່ວມ​ກັນ​ໃນ​ປີ 2011 ຊຶ່ງ​ລັດຖະບານ​ຈີນ​ໄດ້​ຕົກລົງ ​ໃຫ້​ເງິນ​ກູ້​ແກ່​ລັດຖະບານ​ລາວ ​ໃນ​ມູນ​ຄ່າ 254 ລ້ານ​ໂດ​ລາ ສຳ​ຫລັບ​ເປັນ​ຄ່າ​ຈ້າງ​ບໍລິສັດ​ຈີນ ​ໃນ​ການ​ສ້າງ ​ແລະ​ສົ່ງ​ດາວ​ທຽມ​ດວງ​ງທຳ​ອິດ​ຂຶ້ນສູ່​ວົງ​ໂຄຈອນ​ດັ່ງກ່າວ.

ນອກຈາກ​ນັ້ນ ລັດຖະບານ​ລາວ​ຍັງ​ມີ​ແຜນການ ທີ່​ຈະ​ສ້າງດາວ​ທຽມ​ດວງ​ທີ 2 ​ເພື່ອ​ໃຫ້​ຄົບ​ຖ້ວນ​ຕາມ​ທີ່​ໄດ້​ຮັບ​ສິດ​ຈາກ​ອົງການ​ດາວ​ທຽມ​ສາກົນ​ອີກ​ດ້ວຍ ​ໂດຍ​ຈະ​ເປັນ​ການ​ຮ່ວມ​ທຶນ​ລະຫວ່າງ​ທາງ​ການ​ລາວ ກັບ​ບໍລິສັດ​ເອກະ​ຊົນ​ຈີນ ຊຶ່ງ​ຄາດໝາຍ​ວ່າ ຈະ​ຕ້ອງ​ໃຊ້​ເງິນ​ລົງທຶນ​ໃນ​ມູນ​ຄ່າ​ເຖິງ 960 ລ້ານ​ໂດ​ລາ ​ເນື່ອງ​ຈາກ​ວ່າ ​ເປັນ​ດາວ​ທຽມ​ທີ່​ມີ​ເຖິງ 36 ຊ້ອງ​ສັນຍານ ​ໃນ​ການ​ຮັບ-ສົ່ງ​ສັນຍານ​ໂທລະພາບ ​ແລະ​ໂທລະສັບ ຈຶ່ງ​ຕ້ອງ​ໃຊ້​ເງິນ​ລົງທຶນ​ສູງ​ກວ່າ ດາວ​ທຽມ​ດວງ​ທຳ​ອິດ ຂອງ​ລາວ​ນັ້ນ​ເອງ.

ອີກ​ດ້ານ​ໜຶ່ງ ສະມາຊິກ​ສະພາ​ແຫ່ງ​ຊາດ​ລາວ ​ໄດ້​ລົງມະຕິ​ຮັບຮອງ​ເອົາ​ຮ່າງ​ກົດໝາຍ​ຕ້ານ ​ແລະ​ສະກັດ​ກັ້ນອາຊະຍາ​ກຳ ທາງ​ລະບົບ​ຄອມ​ພິວ​ເຕີ້ ​ໃນໂອກາດ​ກອງ​ປະຊຸມ​ສະ​ໄໝ​ສາມັນ​ຄັ້ງທີ 9 ທີ່​ໄດ້​ດຳ​ເນີນ​ກອງ​ປະຊຸມ​ໃນ​ຊ່ວງ​ເດືອນ​ກໍລະກົດ ທີ່​ຜ່ານ​ມາ ​ໂດຍ​ຮ່າງ​ກົດໝາຍ​ສະບັບ​ນີ້ ​ເປັນຄວາມ​ຮັບຜິດຊອບ ຂອງ​ກະຊວງ​ໄປສະນີ ​ແລະ​ໂທລະ​ຄົມມະນາຄົມ ຊຶ່ງ​ປະກອບ​ດ້ວຍ 9 ພາກ 2 ໝວດ ​ແລະ 60 ມາດຕາ ທີ່​ແນ​ໃສ່​ການ​ປ້ອງ​ກັນ​ຜົນ​ກະທົບຕໍ່​ຄວາມ​ສະຫງົບ​ຮຽບຮ້ອຍ ​ແລະຄວາມ​ໝັ້ນຄົງ​ແຫ່ງ​ຊາດ​ລາວ ຊຶ່ງ​ຈະ​ເກີດ​ຈາກ​ອາ​ຊະ​ຍາ​ກຳ ທາງ​ລະບົບ​ຄອມ​ພິວ​ເຕີ້ ​ໃນ​ທຸກ​ຮູບ​ແບບ​ເປັນ​ສຳຄັນ.

​ໂດຍ​ສະ​ເພາະ ​ແມ່ນ​ການ​ກວດກາ​ ການ​ນຳ​ໃຊ້​ສື່​ສັງຄົມ Social Media ​ໃນ​ລະບົບ Internet ຊຶ່ງ​ມີ​ການ​ຮັບ-ສົ່ງ​ຂໍ້​ມູນ-ຂ່າວສານ ລະຫວ່າງ​ກັນ ຕະຫຼອດ​ເວລາ​ນັ້ນ ຈຶ່ງ​ເຮັດ​ໃຫ້​ຕ້ອງ​ມີ​ການ​ເພີ້​ມມາດ​ຕະການ​ເຂັ້ມງວດຫຼາຍຂຶ້ນ ​ເພາະ​ປາກົດ​ວ່າ ​ໄດ້​ມີ​ການ​ນຳ​ໃຊ້​ສື່​ສັງຄົມ ​ໄປ​ໃນ​ທາງ​ທີ່​ບໍ່​ສ້າງສັນຫຼາຍຂຶ້ນນັບ​ມື້ ທັງ​ຍັງ​ມີ​ການ​ໃຫ້​ຂ່າວສານ ​ແລະ​ຂໍ້​ມູນ​ທີ່​ບໍ່​ມີ​ມູນ​ຄວາມ​ຈິງ​ອີກ​ດ້ວຍ.

ຍິ່ງ​ໄປ​ກວ່າ​ນັ້ນ ຈາກ​ການ​ດຳ​ເນີນ​ມາດ​ຕະການ​ກວດກາ​ ໃນ​ລະຍະ​ທີ່​ຜ່ານ​ມາ ກໍ​ຍັງ​ພົບ​ວ່າ ມີ​ການ​ນຳ​ໃຊ້​ສື່​ສັງຄົມ ອິນ​ເຕີ​ເນັດ ​ໄປ​ໃນ​ທາງ​ຂອງ​ການ​ວິພາກ​ວິຈານທາງ​ການ​ເມືອງ​ໃນ ລາວ ​ແລະໃສ່​ຮ້າຍ​ປ້າຍ​ສີ ການ​ນຳ​ໃນ​ພັກປະຊາຊົນ​ປະຕິວັດ​ລາວ ​ແລະ​ລັດຖະບານ​ ອັນ​ຈະ​ສົ່ງ​ຜົນ​ກະທົບ​ຕໍ່​ຄວາມ​ໝັ້ນຄົງ​ແຫ່ງ​ຊາດ​ໄດ້ອີກ​ດ້ວຍ ​ເພາະສະນັ້ນ ຈຶ່ງ​ເຮັດ​ໃຫ້​ຕ້ອງ​ມີ​ການ​ດຳ​ເນີນ ມາດ​ຕະການ​ປິດກັ້ນ ​ສື່​ສັງຄົມອິນ​ເຕີ​ເນັດ ດັ່ງກ່າວ​ຢ່າງ​ເຂັ້ມງວດ​ທີ່​ສຸດ ​ໃນ​ລະຍະ​ຕໍ່​ໄປ​ນີ້ ​ໂດຍ​ນຳ​ໃຊ້​ດາວ​ທຽມ​ດວງ​ທຳ​ອິດ​ຂອງ​ລາວ​ນັ້ນ​ເອງ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG