ລິ້ງ ສຳຫລັບເຂົ້າຫາ

ບໍລິສັດເອກະຊົນຈີນ ລົງທຶນໄປແລ້ວຫຼາຍກວ່າ 657 ລ້ານ ໂດລາ ໃນເຂດເສດຖະກິດພິເສດ ສາມຫລ່ຽມຄຳ


ພິທີລົງນາມ ສຳປະທານທີ່ດິນ ໃນເຂດເສດຖະກິດພິເສດ ສາມຫລ່ຽມຄຳ ແຂວງບໍ່ແກ້ວ ລະຫວ່າງ ລັດຖະບານ ສປປ ລາວ ແລະ ບໍລິສັດ ເອກະຊົນຈີນ Kings Romans International (HK) Co. Ltd.

ພິທີລົງນາມ ສຳປະທານທີ່ດິນ ໃນເຂດເສດຖະກິດພິເສດ ສາມຫລ່ຽມຄຳ ແຂວງບໍ່ແກ້ວ ລະຫວ່າງ ລັດຖະບານ ສປປ ລາວ ແລະ ບໍລິສັດ ເອກະຊົນຈີນ Kings Romans International (HK) Co. Ltd.

ບໍລິສັດເອກະຊົນຈີນ ລົງທຶນໄປແລ້ວຫຼາຍກວ່າ 657 ລ້ານໂດລາ
ເພື່ອພັດທະນາ ລະບົບພື້ນຖານໂຄງລ່າງ ໃນເຂດເສດຖະກິດພິ
ເສດ ສາມຫລ່ຽມຄຳ ຢູ່ແຂວງບໍ່ແກ້ວ ເພື່ອຮອງຮັບການຄ້າ ແລະ
ການທ່ອງທ່ຽວ.

ທ່ານນາງບົວທາ ຂັດຕິຍະ ຮອງປະທານຄະນະກຳມະການ ເພື່ອຄຸ້ມຄອງເຂດເສດ
ຖະກິດ ພິເສດ ແລະເຂດເສດຖະກິດສະເພາະແຫ່ງຊາດ ຖະແຫລງຢືນຢັນວ່າ ກຸ່ມ
ບໍລິສັດ ດອກງິ້ວຄຳ ຈາກຈີນ ໄດ້ນຳໃຊ້ເງິນລົງທຶນໄປແລ້ວ ຄິດເປັນມູນຄ່າເກີນກວ່າ
657 ລ້ານໂດລາ ເພື່ອພັດທະນາລະບົບພື້ນຖ່ານໂຄງລ່າງ ໃນເຂດເສດຖະກິດພິເສດ
ສາມຫລ່ຽມຄຳ ທີ່ເມືອງຕົ້ນເຜິ້ງ ແຂວງບໍ່ແກ້ວ ໂດຍຖືເປັນກຸ່ມບໍລິສັດ ທີ່ໄດ້ນຳໃຊ້ເງິນ ລົງທຶນ ໃນພາກຕົວຈິງໄປແລ້ວ ຫຼາຍທີ່ສຸດໃນຂະນະນີ້.

ພິທີ ມອບ-ຮັບ ທຶນຊ່ວຍເຫຼືອ ກໍ່ສ້າງເສັ້ນທາງເທດສະບານເມືອງຕົ້ນເຜິ້ງ ລະຫວ່າງ ບໍລິສັດ ດອກງິ້ວຄຳ ຈາກຈີນ ແລະ ທາງການແຂວງບໍ່ແກ້ວ.

ພິທີ ມອບ-ຮັບ ທຶນຊ່ວຍເຫຼືອ ກໍ່ສ້າງເສັ້ນທາງເທດສະບານເມືອງຕົ້ນເຜິ້ງ ລະຫວ່າງ ບໍລິສັດ ດອກງິ້ວຄຳ ຈາກຈີນ ແລະ ທາງການແຂວງບໍ່ແກ້ວ.

ໃນປັດຈຸບັນ ມີການລົງທຶນຂອງກຸ່ມທຸລະກິດຈາກຕ່າງປະເທດ
ຢູ່ໃນເຂດເສດຖະກິດພິເສດ ແລະ ເຂດເສດຖະກິດສະເພາະ
ທັງ 13 ແຫ່ງໃນລາວ ຄິດເປັນມູນຄ່າລວມຫຼາຍກວ່າ 4,000
ລ້ານໂດລາ ແລະໃນນີ້ ກໍໄດ້ມີການນຳເງິນທຶນເຂົ້າມາໃນລາວ
ແລ້ວ 1,200 ກວ່າລ້ານໂດລາ ທີ່ເປັນການລົງທຶນ ຂອງບໍລິສັດ
ເອກະຊົນຕ່າງຊາດ 500 ກວ່າລາຍ ຊຶ່ງໃນນີ້ ເປັນການລົງທຶນ
ຂອງບັນດາບໍລິສັດຈາກຈີນ 234 ລາຍ ຈຶ່ງຖືເປັນກຸ່ມທະລະກິດ
ຕ່າງຊາດ ທີ່ລົງທຶນໃນລາວຫຼາຍທີ່ສຸດ ແລະໄດ້ມີການຈ້າງງານ
ແລ້ວ ຫຼາຍກວ່າ 22,000 ຕຳແໜ່ງ.

ທັງນີ້ ລັດຖະບານລາວ ໄດ້ປັບປຸງທັງນະໂຍບາຍ ແລະນິຕິກຳ
ຕ່າງໆ ເພື່ອອຳນວຍຄວາມສະດວກ ແລະສົ່ງເສີມບໍລິສັດຕ່າງ
ຊາດ ໃຫ້ເຂົ້າມາລົງທຶນໃນລາວຫຼາຍຂຶ້ນນັບມື້ ໂດຍສະເພາະແມ່ນ ການກຳນົດ ກົດລະ
ບຽບ ຢ່າງລະອຽດ ທີ່ກ່ຽວກັບການສ້າງຕັ້ງເຂດເສດຖະກິດພິເສດ ແລະເຂດເສດຖະກິດ
ສະເພາະ ທີ່ລັດຖະບານລາວ ໄດ້ວາງເປົ້າໝາຍ ຈະສ້າງຕັ້ງໃຫ້ໄດ້ 58 ແຫ່ງ ໃນທົ່ວ ປະ ເທດ ພາຍໃນປີ 2020.

ທາງດ້ານກະຊວງແຜນການ ແລະການລົງທຶນ ລາຍງານວ່າ ເຂດທີ່ມີມູນຄ່າ ລົງທຶນຫຼາຍ
ທີ່ສຸດ ກໍຄືເຂດເສດຖະກິດພິເສດສາມຫລ່ຽມຄຳ ຢູ່ເມືອງຕົ້ນເຜິ້ງ ໃນແຂວງບໍ່ແກ້ວ ຊຶ່ງໃນ
ປັດຈຸບັນ ໄດ້ລົງທຶນໄປແລ້ວ 700 ກວ່າລ້ານໂດລາ ທີ່ລວມເຖິງ 657 ກວ່າລ້ານໂດລາ ທີ່
ໄດ້ນຳໃຊ້ໄປ ເພື່ອພັດທະນາລະບົບພື້ນຖານໂຄງລ່າງດັ່ງກ່າວດ້ວຍ ໂດຍກຸ່ມບໍລິສັດຈີນ
ໄດ້ວາງແຜນການ ຈະລົງທຶນໃນມູນຄ່າລວມເຖິງ 2,250 ລ້ານໂດລາ ທີ່ເປັນການລົງທຶນ
ທັງ 100 ເປີເຊັນ ຂອງກຸ່ມບໍລິສັດດອກງິ້ວຄຳນັ້ນເອງ.

ໂດຍການສ້າງຕັ້ງເຂດເສດຖະກິດພິເສດ ແລະເຂດເສດຖະກິດສະເພາະ ຂຶ້ນໃນລາວນັ້ນ
ກໍມີເປົ້າໝາຍ ເພື່ອໃຫ້ເປັນພາກສ່ວນສຳສຄັນ ໃນການພັດທະນາເສດຖະກິດຂອງລາວ
ໃຫ້ຈະເລີນກ້າວໜ້າ ທັງສ້າງວຽກເຮັດງານທຳ ໃຫ້ແກ່ລາວອີກດ້ວຍ ດັ່ງທີ່ ທ່ານນາງ
ບົວທາ ໄດ້ຖະແຫລງຢືນຢັນວ່າ:

“ວຽກງານການພັດທະນາເຂດເສດຖະກິດພິິເສດ ເປັນວຽກງານໃໝ່ ທີ່ຕັ້ງຂຶ້ນຕັ້ງ
ແຕ່ປີ 2000 ທີ່ລັດຖະບານ ສປປ ລາວ ມີຈຸດເປົ້າໝາຍເຮັດໃຫ້ວຽກງານດັ່ງກ່າວ
ເປັນຫົວຈັກ ໃຫ້ແກ່ການພັດທະນາ ແລະກໍ່ສ້າງປະກອບສ່ວນວຽກເຮັດງານທຳ
ໃຫ້ແກ່ປະເທດຊາດ ປະກອບສ່ວນໃຫ້ແກ່ການພັດທະນາເສດຖະກິດ ແລະສັງຄົມ
ແຫ່ງຊາດໃນແຕ່ລະລະຍະ ການພັດທະນານີ້ ຈະແຈ້ງຂຶ້ນ ກໍຍ້ອນການຈັດຕັ້ງພາກ
ລັດຖະບານ ໄດ້ເອົາໃຈໃສ່ຄົ້ນຄວ້າ ຫາວິທີແກ້ໄຂບັນຫາ.”

ໂດຍຫຼ້າສຸດ ຄະກຳມະການແຫ່ງຊາດເພື່ອການຄຸ້ມຄອງເຂດເສດຖະກິດພິເສດ ແລະເຂດ
ເສດຖະກິດສະເພາະ ກໍໄດ້ອະນຸຍາດໃຫ້ກຸ່ມບໍລິສັດພູສີຈຳກັດ ເປັນຜູ້ລົງທຶນພັດທະນາ
ເຂດເສດຖະກິດພິເສດ ບົນເນື້ອທີ່ ລວມ 4,850 ເຮັກຕາ ຢູ່ເຂດຊານເມືອງເກົ່າຫຼວງ
ພະບາງ ກັບເມືອງຈອມເພັດ ແຂວງຫຼວງພະບາງ.

ເຂດດັ່ງກ່າວນີ້ ມີອາຍຸສຳປະທານ 99 ປີ ໂດຍຈະນຳໃຊ້ເງິນລົງທຶນລວມເຖິງ 1,200 ລ້ານ
ໂດລາ ເພື່ອພັດທະນາໃຫ້ເປັນເຂດທ່ອງທ່ຽວ ແລະບໍລິການທີ່ທັນສະໄໝ ດ້ວຍການກໍ່ສ້າງ
ລະບົບ ພື້ນຖານໂຄງລ່າງ ແລະສິ່ງອຳນວຍຄວາມສະດວກຕ່າງໆ ຢ່າງຄົບຊຸດເຊັ່ນຖະໜົນ
ລະບົບໄຟຟ້າ ນ້ຳປະປາ ໂຮງໝໍ ໂຮງຮຽນ ໂຮງແຮມ ທະນາຄານ ສູນການຄ້າ ອາຄານສູງ
23 ຊັ້ນ ແລະບ້ານພັກ ສຳລັບຜູ້ສູງອາຍຸທີ່ ສ່ວນຫຼາຍ ຈະເປັນຊາວຕ່າງຊາດ.

ສະແດງຄວາມເຫັນໃຫ້ເບິ່ງ

XS
SM
MD
LG