ລິ້ງ ສຳຫລັບເຂົ້າຫາ

ບໍລິສັດ​ຈີນ ​ລົງທຶນ​​ໄປ​ແລ້ວ ຫຼາຍກວ່າ​ 100 ລ້ານ​ດອນ​ລາ ໃນໂຄງການພັດທະນາ ບຶງທາດຫລວງ


ການ​ກໍ່ສ້າງ Condominium ສູງ 19 ຊັ້ນຈຳນວນ 12 ຕຶກ ຢູ່ໃນເຂດເສດຖະກິດສະເພາະ ບຶງທາດຫລວງ​ໄດ້ຄືບ​ໜ້າ​ໄປ​ແລ້ວ​ເຖິງ 50 ​ເປີ​ເຊັນ ຂອງ​ແຜນການ.

ການ​ກໍ່ສ້າງ Condominium ສູງ 19 ຊັ້ນຈຳນວນ 12 ຕຶກ ຢູ່ໃນເຂດເສດຖະກິດສະເພາະ ບຶງທາດຫລວງ​ໄດ້ຄືບ​ໜ້າ​ໄປ​ແລ້ວ​ເຖິງ 50 ​ເປີ​ເຊັນ ຂອງ​ແຜນການ.

ກຸ່ມ​ບໍລິສັດ​ຈີນ​ລົງທຶນໄປ​ແລ້ວຫຼາຍກວ່າ​ 100 ລ້ານ​ດອນ​ລາ ​ເພື່ອ
​ພັດທະນາ​ເຂດ​ເສດຖະກິດ​ສະ​ເພາະ​ບຶງ​ທາດຫລວງ​ ໃນ​ນະຄອນ​
ຫລວງ​ວຽງ​ຈັນ ​ໂດຍ​ຈະ​ສ້າງ Condo 19 ຊັ້ນ 12 ຕຶກ ​ໃຫ້ແລ້ວ​ເສັດ​
ໃນ​ເດືອນ​ຕຸລາ 2016.

ທ່ານ​ແຝງ ອິນ​ທິລາດ ຮອງ​ປະທານ​ຄະນະ​ຄຸ້ມຄອງ​ເຂດ​ເສດຖະກິດ​ສະ​ເພາະ​ບຶງ​ທາດຫລວງ ຖະ​ແຫລ​ງວ່າ ກຸ່ມ​ບໍລິສັດ Wan Feng Shanghai ຈາກ​ຈີນ​ໄດ້​ນຳ​ໃຊ້​ເງິນ​ທຶນ​ໄປ​ແລ້ວ​ຄິດ​ເປັນ​ມູນ​ຄ່າ​ເຖິງ 107 ລ້ານ​ດອນ​ລາ ​ເພື່ອ​ພັດທະນາ​ເຂດ​ເສດຖະກິດ​ສະ​ເພາະ​ບຶງ​ທາດຫລວງ ​ໃນ​ນະຄອນ​ຫລວງວຽງ​ຈັນ.

ທັງ​ນີ້​ໂດຍ​ການ​ດຳ​ເນີນ​ງານ​ນັບ​ຈາກ​ທ້າຍ​ປີ 2012 ​ເປັນຕົ້ນມາ​ຈົນ​ເຖິງ​ປັດຈຸບັນ ກໍ​ໄດ້​ຄືບ​ໜ້າ​ໄປຕາມ​ແຜນການ​ທີ່​ວາງ​ໄວ້​ເປັນ​ສ່ວນ​ໃຫຍ່ ​ເຊັ່ນ​ການ​ກໍ່ສ້າງ​ຖະໜົນ​ຍາວ 400 ​ແມັດ ກວ້າງ 36 ແມັດ​ເຊື່ອມ​ຕໍ່​ຈາກ​ສາມ​ແຍກ ​ໂພນ​ທັນ​ເຂົ້າມາ​ໃນ​ໂຄງການ ພ້ອມ​ດ້ວຍ​ການວາງ​ແນວ​ສາຍ​ສົ່ງ​ກະ​ແສ​ໄຟຟ້າ ລະບົບ​ນ້ຳປະປາ ລະບົບ​ກຳຈັດ​ນ້ຳເປື້ອນ ການ​ວາງ​ແນວ​ຖະໜົນ​ຢູ່​ພາຍ​ໃນ​ໂຄງການ ການ​ຂຸດ​ສວນ​ນ້ຳຂະໜາດ​ໃຫຍ່ ​ໃນ​ເນື້ອ​ທີ່​ກວ້າງ 50 ເຮັກຕາ ​ແລະ​ການ​ກໍ່ສ້າງ Condominium ສູງ 19 ຊັ້ນຈຳນວນ 12 ຕຶກ​ທີ່​ຄືບ​ໜ້າ​ໄປ​ແລ້ວ​ເຖິງ 50 ​ເປີ​ເຊັນ ຂອງ​ແຜນການ.

ແບບຈຳລອງ ຂອງໂຄງການພັດທະນາ ເຂດເສດຖະກິດສະເພາະ ບຶງທາດຫລວງ ຢູ່ນະຄອນຫລວງວຽງຈັນ.

ແບບຈຳລອງ ຂອງໂຄງການພັດທະນາ ເຂດເສດຖະກິດສະເພາະ ບຶງທາດຫລວງ ຢູ່ນະຄອນຫລວງວຽງຈັນ.

ໂດຍ​ສຳ​ຫລັບ Condominium ດັ່ງກ່າວ​ກໍ​ຄາດ​ໝາຍວ່າ ຈະ​ດຳ
​ເນີນ​ການ​ກໍ່ສ້າງ​ແລ້ວ​ເສັດ​ຢ່າງ​ສົມບູນ​ທັງ 12 ຕຶກ​ພາຍ​ໃນ​ເດືອນ​
ຕຸລາ 2016 ດັ່ງນັ້ນ ກຸ່ມ​ບໍລິສັດ​ຜູ້​ລົງທຶນ​ໃນ​ໂຄງການ ຈຶ່ງ​ໄດ້​ເລີ້ມ
​ເປີດ​ໃຫ້​ທັງ​ຄົນ​ລາວ ​ແລະ​ ຊາວ​ຕ່າ​ງ​ຊາດ​ເຂົ້າ​ໄປ​ຈອງ​ຊື້​ຫ້ອງ​ພັກ​
ອາ​ໄສ ຫຼື ສຳນັກງານ​ຢູ່ Condo ທັງ 12 ຕຶກ​ດັ່ງກ່າວ ​ໄດ້​ແລ້ວ​
ນັບ​ແຕ່​ເດືອນ​ມີນາ​ນີ້ ​ເປັນຕົ້ນ​ໄປ ​ໂດ​ຍມີ​ລາຄາ​ເລີ້ມ​ຕົ້ທີ່ 400,000
ດອນ​ລາ ຫ້ອງ​ຂະໜາດ 4 ຫ້ອງນອນ ​ແລະ 4 ຫ້ອງ​ນ້ຳ.

ກ່ອນ​ໜ້າ​ນີ້ ຄະນະ​ກຳມາ​ທິການ​ກົດໝາຍ ​ແລະ​ ກຳມາ​ທິການ
​ເສດຖະກິດ ​ແຜນການ ​ແລະ​ການ​ເງິນ ຂອງ​ສະພາ​ແຫ່ງ​ຊາດ​ລາວ
ກໍ​ໄດ້​ພິຈາລະນາ​ກ່ຽ​ວກັບ ​ການ​ໃຫ້​ສິດທິ​ພິ​ເສດ ​ແກ່​ກຸ່ມ​ບໍລິສັດ​ຜູ້​ລົງທຶນພັດທະນາໃນຫຼາຍ ດ້ານ ​ເຊັ່ນ​ສິດທິ​ພິ​ເສດ​ດ້ານ​ການ​ລົງທຶນ​ໃນ​ການ​ພັດທະນາ​ທຸລະ​ກິດ ອະສັງຫາລິມະ​ຊັບ
ການ​ອຳນວຍ​ຄວາມ​ສະດວກ​ ໃຫ້​ແກ່​ນັກ​ລົງທຶນ​ລາຍ​ຍ່ອຍ​ ໃນ​ເຂດ​ເສ​ດຖະກິ​ດສະ​ເພາະ
ການ​ໃຫ້​ສິດທິ​ພິ​ເສດ​ ໃນການ​ຮັກສາ​ຄວາມ​ສະ​ງົບ​ພາຍ​ໃນ​ ເຂດ​ເສ​ດຖະກິດສະ​ເພາະ
ສິດທິ​ພິ​ເສດ​ໃນ​ການ​ຄຸ້ມ​ຄອງ Condominium ຫຼື ທີ່ຢູ່​ອາ​ໄສ ​ແລະ​ການ​ໃຫ້ VISA ລະຍະ
​ຍາວ​ແກ່​ນັກ​ທຸລະ​ກິດ ໃນ​ເຂດ​ເສດຖະກິດ​ສະ​ເພາະ​ບຶງ​ທາດຫລວງ​ເປັນຕົ້ນ.

​ແຕ່​ຢ່າງ​ໃດ​ກໍ​ຕາມ ການ​ພິຈາລະນາ​ດັ່ງກ່າວ​ນີ້ ກໍໄດ້​ມີ​ຂຶ້ນ​ໃນ​ທ່າມກາງ​ສະພາບ​ການ ທີ່​ກຸ່ມ​ບໍລິສັດ​ຈີນ ກໍ​ຍັງ​ບໍ່​ສາມາດ​ຕົກລົງ​ກັບ​ປະຊາຊົນ​ລາວ​ທີ່​ພັກ​ອາ​ໄສ​ຢູ່​ໃນ​ເຂດ​ບຶງ​ທາດຫລວງ​ໄດ້​ເລີຍ ​ເນື່ອງ​ຈາກ​ກຸ່ມ​ບໍລິສັດ​ຈີນ​ຈະ​ຊົດ​ເຊີຍ​ຄ່າທີ່​ດິນ​ໃນ​ອັດຕາ​ທີ່​ຕ່ຳ​ກວ່າ​ຄວາມ​ເປັນ​ຈິງ ດັ່ງ​ທີ່​ເຈົ້າໜ້າ​ທີ່​ຂັ້ນສູງ ຂອງ​ລາວ​ໄດ້​ໃຫ້ການ​ຢືນຢັນ​ວ່າ:

ປະຕູທາງເຂົ້າ ເຂດບຶງທາດຫລວງ ບ່ອນນັກລົງທຶນຈີນ ຈະສ້າງເມືອງຈີນ ຂຶ້ນໃນນະຄອນຫລວງວຽງຈັນ.

ປະຕູທາງເຂົ້າ ເຂດບຶງທາດຫລວງ ບ່ອນນັກລົງທຶນຈີນ ຈະສ້າງເມືອງຈີນ ຂຶ້ນໃນນະຄອນຫລວງວຽງຈັນ.

“ຜ່ານ​ມາ​ນີ້ ກະຖື​ວ່າ​ມັນ​ບໍ່​ໄປ​ຕາມ​ລະບົບ ​ເລີຍ​ເກີດ​ມີ​ບັນຫາ​
ຄວາມ​ຫຍຸ້ງຍາກ ​ເພາະວ່າ ບໍລິສັດ​ນີ້ ​ໄປ​ກວມ​ເອົາ​ດິນ​ປະຊາ
ຊົນ ​ໂຕ​ນີ້​ນິ ຄັນວ່າ​ມັນ​ໄປ​ກວມ​ດິນ​ປະຊາຊົນ​ແລ້ວ ກໍ​ຕ້ອງ​ໄດ້​
ແກ້​ ໃຫ້ບໍລິສັດ​ເປັນ​ຜູ້​ທົດ​ແທນຫຼືວ່າ ຄັນ​ປະຊາຊົນ​ບໍ່​ໃຫ້ ບາງ​
ເທື່ອ​ນີ້ກະ​ບໍ່​ໄດ້ ​ເພາະວ່າ​ມັນບ່ອນ​ທຳ​ມາ​ຫາ​ກິນຂອງ​ເຂົາ​ເດ້.”

ທັງ​ນີ້​ໂດຍ​ໂຄງການ​ພັດທະນາ​ເມືອງ​ໃໝ່ ຢູ່​ບຶງ​ທາດຫລວງ​ມີ​ເນື້ອ​ທີ່​ສຳ​ປະທານ 365 ​ເຮັກຕາ ຊຶ່ງ​ເຮັດໃຫ້​ຈະ​ຕ້ອງ​ມີ​ການ​ເວນ​ຄືນ​ທີ່​ດິນ​ຂອງ​ປະຊາຊົນ​ລາວ​ຈຳນວນ​ທັງ​ໝົດ 480 ຕອນ ​ໂດຍຫຼ້າສຸດ ກຸ່ມ​ລົງທຶນ​ຈາກ​ຈີນ​ໄດ້​ລາຍ​ງານ​ວ່າ ສາມາດ​ຕົກລົງ ​ແລະ​ຈ່າຍ​ຄ່າ​ຊົດ​ເຊີຍ​ໃຫ້​ກັບ​ປະຊາຊົນ​ລາວ​ໄປ​ແລ້ວ 98 ​ເ​ປີ​ເຊັນ ຄິດ​ເປັນ​ມູນ​ຄ່າຫຼາຍກວ່າ 10 ລ້ານດອນ​ລາ
ຈຶ່ງ​ຍັງ​ເຫຼືອ ອີກພຽງ 2 ​ເປີ​ເຊັນ ​ເທົ່ານັ້ນ ທີ່​ຍັງ​ບໍ່​ສາມາດ​ຕົກ​ລົງ​ໄດ້.

​ໂຄງການ​ພັດທະນາ​ເຂດ​ເສດຖະກິດ​ສະ​ເພາະ​ບຶງ​ທາດຫລວງ ຈະ​ເປັນ​ເມືອງ​ແຫ່ງ​ການ
ທ່ອງທ່ຽວ ​ທີ່​ຕິດພັນ​ກັບ​ການ​ພັດທະນາ​ອະສັງຫາລິມະ​ຊັບ ທີ່​ມີ​ຄວາມ​ທັນ​ສະ​ໄໝ ທີ່​ຄຽງ​ຄູ່​
ກັບ​ການ​ປົກ​ປັກ​ຮັກສາ​ວັດທະນະທຳ ​ແລະ​ຮ່ອງຮອຍ​ປະຫວັດສາດ ​ເພື່ອ​ໃຫ້ເປັນ​ຕົວ​ແບບ
​ຂອງ​ການ​ພັດທະນາ​ເມືອງ ​ທີ່​ທັນສະ​ໄໝ ທີ່​ສາມາດ​ຮອງ​ຮັບ​ໄດ້ ​ທັງ​ການ​ດຳ​ເນີນ​ທຸລະ​ກິດ
​ແ​ລະ ກາ​ນຢູ່​ອາ​ໄສ ທີ່​ມີ​ສິ່ງ​ອຳນວຍ​ຄວາມ​ສະດວກ​ຢ່າງ​ຄົບ​ຊຸດ.

ສະແດງຄວາມເຫັນໃຫ້ເບິ່ງ

XS
SM
MD
LG