ລິ້ງ ສຳຫລັບເຂົ້າຫາ

ຈີນ ບໍ່ຍອມຮັບເອົາ ການຂຶ້ນພາສີ ຂອງສະຫະລັດ

  • ໄພສານ ວໍຣະຈັກ

ແຜ່ນຮັບແສງຕາເວັນ ທີ່ພວມເປັນບັນຫາຂັດແຍ້ງ ລະຫວ່າງຈີນກັບສະຫະລັດ (18 ພຶດສະພາ 2012)

ຈີນ​ໄດ້​ຕຳ​ໜິຕິຕຽນ​ການ​ເກັບ​ພາສີ​ຕໍ່ຕ້ານ​ການ​ສົ່ງສິນຄ້າ​ເຂົ້າຕີີ​ຕະຫຼາດຂອງ​ສະຫະລັດຕໍ່
​ແຜ່ນ​ຮັບ​ແສງຕາ​ເວັນ​ຂອງ​ຈີນ ທີ່​ໄດ້​ກໍ່​ໃຫ້​ເກີດ​ຄວາມ​ເຄັ່ງ​ຕຶງ​ທາງ​ດ້ານການ​ຄ້າເພີ່ມ​ຂຶ້ນ
ລະຫວ່າງ​ສອງ​ປະ​ເທດ​ທີ່​ມີ​ເສດຖະກິດ​ໃຫຍ່​ສຸດ​ຂອງ​ໂລກ.

ທ່ານ Shen Danyang ​ໂຄສົກ​ກະຊວງ​ການ​ຄ້າ​ຂອງ​ຈີນ​ ​ໃນ​ວັນ​ສຸກ​ມື້ນີ້ ​ເອີ້ນການ​ເກັບ​
ພາສີ​ຂອງ​ສະຫະລັດ​ນັ້ນວ່າ ບໍ່​ຍຸຕິ​ທຳ ​ໂດຍ​ເວົ້າວ່າ​ມັນ​ໄດ້​ເນັ້ນ​ໃຫ້​ເຫັນ​ເຖິງ​ທ່າ​ອຽງ​ໄປ​ສູ່​
ລະບົບ​ການ​ຄຸ້ມ​ຄອງ​ອຸສາ​ຫະກຳ​ພາຍ​ໃນ​ປະ​ເທດ​ຂອງ​ຕົນ.

​ໃນ​ວັນ​ພະຫັດ​ວານ​ນີ້ ກະຊວງ​ການ​ຄ້າ​ຂອງ​ສະຫະລັດ​ໄດ້​ປະກາດ​ເກັບ​ພາສີ​ລະຫວ່າງ
31 ຫາ 250% ຕໍ່​ແຜ່ນ​ຮັບ​ແສງຕາ​ເວັນ​ທີ່​ເຮັດ​ໂດຍ​ຈີນ ​ໂດຍ​ຕັດສິນ​ວ່າ ສິນຄ້າ​ເຫຼົ່ານີ້​ໄດ້
​ທຸ້ມ​ເຂົ້າມາ​ຍັງ​ຕະຫຼາດສະຫະລັດ​ ໃນ​ລາຄາ​ທີ່​ຕໍ່າ​ກວ່າ​ຕົ້ນທຶນການຜະລິດ.

ພາສີ​ດັ່ງກ່າວ​ນີ້ ​ແມ່ນ​ຈະ​ເພີ່ມ​ໃສ່​ພາສີ​ທີ່​ຕັ້ງ​ໄວ້ ​ໃນ​ລະຫວ່າງ 2.9 ຫາ 4.7% ໃນ​ເດືອນ
​ມີນາ​ຜ່ານ​ມາ ຍ້ອນ​ອັນ​ທີ່​ສະຫະລັດ​ເວົ້າວ່າ ​ເປັນ​ການ​ໃຫ້​ເງິນ​ອຸດໜຸນ​ທີ່​ບໍ່ຍຸຕິ​ທຳ​ຂອງ​
ລັດຖະບານ​ຈີນຕໍ່​ອຸບປະກອນ​ຮັບ​ແສງຕາ​ເວັນ​.

ການ​ເຄື່ອນ​ໄຫວ​ທີ່​ວ່າ​ນີ້​ແມ່ນ​ໝາຍ​ຄວາ​ມວ່າ ຈະ​ເຮັດໃຫ້ອຸສາ​ຫະກຳ​ຜະລິດ​ແຜ່ນ​ຮັບ​ແສງ
ຕາເວັນ​ຂອງ​ສະຫະລັດ ທີ່​ພວມ​ດີ້ນຮົນ​ຕໍ່ສູ້​ກັບ​ການ​ແຂ່ງຂັນ​ຂອງ​ຈີນ​ຢູ່​ນັ້ນ ໄດ້​ຮັບ​ການ
​ເສີມ​ຂະຫຍາຍ.

​ເຖິງ​ແມ່ນ​ໄດ້​ມີ​ການ​ຄາດ​ກັນ ກ່ຽວ​ກັບ​ການ​ຕັດສິນໃນເລື່ອງ​ນີ້ກໍ​ດີ ​ແຕ່​ມັນ​ກໍເປັນການສ່ຽງ
ຕໍ່ຈະ​ສ້າງ​ຄວາມ​ເຄັ່ງ​ຕຶງ​ ໃຫ້ແກ່ສາຍສຳພັນ​ດ້ານ​ການ​ຄ້າ​ລະຫວ່າງ​ຈີ​ນ​ແລະ​ສະຫະລັດ ຊຶ່ງ
​ໄດ້​ມີ​ການ​ປະ​ເຊີນ​ໜ້າ​ກັນ​ກ່ຽວກັບ​ບັນຫາ​ຂັດ​ແຍ້​ງ ​ໃນເ​ລື່ອງການ​ຄ້າດ້ານ​ອື່ນໆຈຳນວນ​ນຶ່ງ
​ຢູ່​ແລ້ວ ໃນ​ໄລຍະ​ສອງ​ສາມ​ເດືອນ​ຜ່ານ​ມານີ້.

XS
SM
MD
LG