ຜູ້ແທນຂັ້ນສູງຂອງສະຫະລັດຄະນະນຶ່ງ ຈະເດີນທາງໄປຈີນໃນສັບປະດາໜ້າ ເພື່ອຊຸກຍູ້ຂໍ້ໂຕ້ແຍ້ງຂອງຕົນ ທີ່ວ່າກຸງປັກກິງຈະຕ້ອງດໍາເນີນການຫລາຍຂຶ້ນເພື່ອຂັດຂວາງເກົາຫລີເໜືອ ບໍ່ ໃຫ້ທໍາການຮຸກຮານຫລືບຸກລຸກຕື່ມອີກ.
ລາຍງານສື່ມວນຊົນສະຫະລັດກ່າວວ່າ ໃນເວລາດຽວກັນ ທ່ານ Bill Richardson ຜູ້ວ່າ ການລັດແລະອະດີດເອກອັກຄະລັດຖະທູດສະຫະລັດປະຈໍາສະຫະປະຊາຊາດຈະເດີນທາງ ໄປຍັງກຸງພຽງຢາງ ເພື່ອທໍາການໂອ້ລົມສົນທະນາເປັນທາງສ່ວນຕົວກັບບັນດາເຈົ້າໜ້າທີ່ເກົາຫລີເໜືອ.
ຄະນະຜູ້ແທນໄປຍັງຈີນ ແມ່ນຈະນໍາພາໂດຍທ່ານ James Steinburg ເຈົ້າໜ້າທີ່ສູງສຸດອັນດັບສອງຂອງກະຊວງການຕ່າງປະເທດ. ໃນການຖະແຫລງໃນວັນອັງຄານວານນີ້ ທ່ານ Steinburg ເວົ້າວ່າ ໄພອັນຕະລາຍທີ່ແຫລມເກົາຫລີນັ້ນແມ່ນ ສືບເນື່ອງມາຈາກການທີ່ວ່າ ບໍ່ມີສິ່ງຍັບຍັ້ງທີ່ມີປະສິດທິພາບໃດໆຕໍ່ເກົາຫລີເໜືອ. ທ່ານເວົ້າຕໍ່ໄປວ່າ ຈີນສາມາດຫລິ້ນບົດບາດທີ່ສໍາຄັນໄດ້ ໂດຍເຮັດໃຫ້ກຸງພຽງຢາງຮູ້ຢ່າງຈະແຈ້ງວ່າ ມີຜົນຮັບທີ່ຈະຕິດຕາມ ມາພາຍຫລັງ ສໍາລັບພຶດຕິກໍາຂອງເກົາຫລີເໜືອນັ້ນ.
ຄະນະຜູ້ແທນຂອງທ່ານ Steinburg ຈະເດີນທາງໄປຮອດກຸງປັກກິງໃນວັນອັງຄານໜ້າ ແລະຈະພັກຢູ່ທີ່ນັ້ນເປັນເວລາ 3 ມື້.