ຈີນໄດ້ສະແດງເຮືອບິນລົບ J-20 ທີ່ເຣດາຈັບບໍ່ໄດ້ ໃນວັນອັງຄານມື້ນີ້ ຢູ່ທີ່ ບ່ອນການສະແດງເຮືອບິນ ທີ່ເມືອງ Zhuhai ໃນພາກໃຕ້ຂອງປະເທດ.
ເຮືອບິນລົບ J-20 ສອງລໍາໄດ້ປາກົດໂຕພຽງລະຍະສັ້ນໆຢູ່ໃນພິທີເປີດໂດຍໄດ້ ສະແດງການເຄື່ອນໄຫວຕ່າງໆ ແລະໄດ້ສົ່ງສຽງຢ່າງແຮງ ທີ່ເຮັດໃຫ້ສັນຍານເຕືອນໄພລົດດັງຂຶ້ນ ຢູ່ບ່ອນຈອດລົດໃກ້ໆນັ້ນ ອີງຕາມລາຍງານຂອງອົງການຂ່າວຮອຍເຕີ.
ເຮືອບິນລົບນີ້ ເປັນເຮືອບິນລົບຮຸ້ນທີສອງທີ່ເຣດ້າຈັບບໍ່ໄດ້ຂອງຈີນ. ເຮືອບິນລົບJ-31 ໄດ້ຖືກເປີດເຜີຍຕໍ່ສາທາລະນະຢູ່ການສະແດງການບິນທີ່ເມືອງ Zhuhai ເມື່ອສອງປີກ່ອນ.
ໃນຂະນະທີ່ເຮືອບິນລົບ J-31 ຄາດວ່າຈະເປັນການກ້າວເຂົ້າສູ່ຕະຫລາດອາວຸດໂລກຂອງຈີນ ຊຶ່ງເຮືອບິນ J-20 ຊຶ່ງມີຮູບຮ່າງຄ້າຍຄືກັບ ເຮືອບິນລົບ F-22 Raptor ຂອງສະຫະລັດແມ່ນບໍ່ມີທ່າທາງວ່າຈະຖືກສົ່ງອອກໄປຂາຍຕ່າງ ປະເທດ.
ເຈົ້າໜ້າທີ່ອຸດສາຫະກຳການບິນກ່າວຕໍ່ອົງການຂ່າວຣອຍເຕີວ່າ “ນີ້ແມ່ນເຮືອບິນສຳລັບ ຈີນ ທີ່ J-31 ເບິ່ງແລ້ວບໍ່ແມ່ນ. “ນີ້ແມ່ນການພັດທະນາໃຫ້ເຂົາເຈົ້າເອງ.”
ສະມັດຖະພາບຂອງເຮືອບິນລົບ J-20 ຍັງບໍ່ເປັນທີ່ຊາບໄດ້. ການປາກົດໂຕເປັນລະຍະສັ້ນໆໃນວັນອັງຄານມື້ນີ້ ແມ່ນພຽງແຕ່ໄດ້ໃຫ້ບັນດາຜູ້ສັງເກດການ ເຫັນແຕ່ພຽງເລັກນ້ອຍ ກ່ຽວກັບສະພາບທີ່ເຣດາສາມາດຈັບບໍ່ໄດ້ຂອງເຮືອບິນ ການສະແດງຫລືພະລັງສະມັດຖະພາບ. ບັນດາຜູ້ເຂົ້າຮ່ວມການສະແດງ ຈະບໍ່ສາມາດແນມເຫັນເຮືອບິນລົບນີ້ ຢູ່ພື້ນດິນທີ່ເມືອງ Zhuhai.
ເຈົ້າໜ້າທີ່ກອງທັບອາກາດຈີນທີ່ບໍ່ບອກຊື່ ກ່າວຕໍ່ໜັງສືພິມ the South China Morning Post ວ່າ ເຮືອບິນນີ້ບັນຈຸ “ຄວາມລັບສຸດຍອດດ້ານເທັກໂນໂລຈີ ຂອງຈີນຢູ່ໃນເຮືອບິນທີ່ເຣດາຈັບບໍ່ໄດ້ ພ້ອມທັງຄວາມລັບຂອງກອງທັບ.” ເຈົ້າໜ້າທີ່ກ່າວວ່າ ຄວາມລັບຈຳນວນນຶ່ງຈະຖືກເປີດເຜິຍຖ້າຫາກບັນດາຜູ້ຊ່ຽວຊານເຂົ້າໄປເບິ່ງຢູ່ໃກ້ກັບປີກ ແລະຮ່າງເຮືອບິນ.
ເຮືອບິນລຳອຶ່ນໆທີ່ມີກຳນົດໄປປາກົດໂຕຢູ່ບ່ອນສະແດງ ຮວມທັງເຮືອບິນຂົນສົ່ງ Y-20 ແລະ AG600 ທີ່ເປັນຄືກັບເຮືອທີ່ບິນໄດ້ ໂດຍພວກຈັດການສະແດງ ກ່າວວ່າ ເປັນເຮືອບິນທີ່ສະເທີນນ້ຳສະເທີນບົກ ທີ່ໃຫຍ່ທີ່ສຸດທີ່ກຳລັງສ້າງຢູ່.
