ລາຍງານສະບັບໃໝ່ທໍານາຍວ່າ ຈີນຈະໃຊ້ຈ່າຍໃນການປ້ອງກັນປະເທດພາຍໃນປີ 2015 ຫລາຍກວ່າຈໍານວນຄ່າໃຊ້ຈ່າຍຂອງພວກປະເທດໃນເອເຊຍແລະໃນຍ່ານມະຫາສະມຸດປາຊີຟິກທັງໝົດຮວມເຂົ້າກັນ.
ການສຶກສາທີ່ພິມອອກເຜີຍແຜ່ໃນວັນອັງຄານມື້ນີ້ໂດຍບໍລິສັດວ່າດ້ວຍຄວາມປອດໄພ HIS Jane’s ກ່າວວ່າ ຈີນໃຊ້ຈ່າຍເງິນເກືອບ 120 ຕື້ໂດລາ ໃນການປ້ອງກັນປະເທດໃນປີແລ້ວນີ້ ແລະກ່າວຕື່ມວ່າ ຄາດວ່າຈໍານວນໂຕເລກດັ່ງກ່າວຈະເພີ່ມຂຶ້ນເປັນເກືອບສອງເທົ່າ ຄືຈໍານວນ 238 ຕື້ໂດລາພາຍໃນປີ 2015 ຂະນະທີ່ຈີນປັບປຸງ ພວກເຮືອບີນລົບໄອພົ່ນແລະອຸບປະກອນດ້ານທະຫານອື່ນໆຂອງຕົນໃຫ້ທັນສະໄໝນັ້ນ.
ຈໍານວນທີ່ວ່ານີ້ຈະຫລາຍກວ່າ 4 ເທົ່າຂອງຈໍານວນທີ່ຍີ່ປຸ່ນວາງແຜນຈະໃຊ້ຈ່າຍໃນດ້ານທະຫານຂອງຕົນໃນຖານະເປັນຄ່າໃຊ້ຈ່າຍທາງທະ ຫານຫລາຍທີ່ສຸດອັນດັບສອງຂອງໂລກ.
ຈີນໄດ້ເພີ່ມງົບປະມານທາງທະຫານຂອງຕົນຢ່າງສະມໍ່າສະເໝີມາໃນຂະນະທີ່ຜົນຜະລິດຮວມຂອງຊາດເພີ່ມຂຶ້ນໃນຫວ່າງບໍ່ເທົ່າໃດປີຜ່ານມານີ້. ແຕ່ລາຍງານສະບັບນີ້ກ່າວວ່າ ງົບປະມານດ້ານທະຫານ ຂອງກຸງ ປັກກິ່ງຄາດວ່າ ຈະເຕີບໂຕຂຶ້ນໃນອັດຕາສູງຂຶ້ນຢ່າງຫລວງຫລາຍກວ່າ ອັດຕາເພີ່ມຂຶ້ນຂອງຜົນຜະລິດຮວມຂອງຊາດພາຍໃນ 3 ປີຕໍ່ໜ້ານີ້.
ການສຶກສາຂອງບໍລິສັດ HIS Jane’s ທຳນາຍວ່າ ເສດຖະກິດຂອງຈີນຈະເຕີບໂຕຂຶ້ນໃນອັດຕາ 8 ຫາ 9 ເປີເຊັນ ໃນໄລຍະ 4 ປີຕໍ່ໜ້າ.
ແຕ່ກົງກັນຂ້າມ ບໍລິສັດນີ້ທໍານາຍວ່າ ງົບປະມານປ້ອງກັນປະເທດຂອງຈີນຈະເຕີບໂຕຂຶ້ນໃນອັດຕາສະເລ່ຍເກືອບ 19 ເປີເຊັນຕໍ່ປີ.