ໃນທ້າຍເດືອນນີ້ ຄືວັນທີ 26 ຈະມານີ້ ຈີນຈະເຂົ້າຮ່ວມເປັນ
ເທື່ອທຳອິດ ໃນການຝຶກຊ້ອມທາງທະເລນາໆຊາດໃນເຂດ
ມະຫາສະມຸດປາຊີ ຟິກຄັ້ງໃຫຍ່ສຸດ ພາຍໃຕ້ການນຳພາຂອງ
ສະຫະລັດ ທີ່ເອີ້ນຫຍໍ້ໃນພາສາອັງກິດວ່າ RIMPAC ຫລື
ອ້ອມຝັ່ງມະຫາສະມຸດປາຊີຟິກ. ການເຂົ້າປະກອບສ່ວນຂອງ
ປັກກິ່ງໃນຄັ້ງນີ້ ແມ່ນມີຂຶ້ນໃນທ່າມກາງ ຄວາມເຄັ່ງຕຶງທີ່ເພີ້ມ
ທະວີຂຶ້ນ ລະຫວ່າງຈີນແລະບັນດາປະເທດເພື່ອນບ້ານໃນ
ເອເຊຍ ອັນສືບເນື່ອງມາຈາກຂໍ້ຂັດແຍ້ງກັນເລື້ອງດິນແດນ
ທາງທະເລນັ້ນ. ຜູ້ສື່ຂ່າວວີໂອເອ Bill Ide ມີລາຍງານຈາກ
ປັກກິ່ງ ຊຶ່ງໄຊຈະເລີນສຸກ ຈະນຳມາສະເໜີທ່ານ.
ເບິ່ງວີດີໂອ ພາສາລາວ ກ່ຽວກັບລາຍງານນີ້:
ໃນໄລຍະ 2-3 ອາທິດຜ່ານມານີ້ ເຮືອຂອງຈີນ ແລະ ຫວຽດນາມ ໄດ້ ປະທະກັນ
ເລື້ອຍໆ ຢູ່ໃນເຂດນ້ຳທີ່ມີການຂັດແຍ້ງກັນໃນທະເລຈີນໃຕ້. ສ່ວນຢູ່ໃນນ່ານຟ້ານັ້ນ
ເຮືອບິນຈາກຍີ່ປຸ່ນ ແລະ ຈີນ ກໍໄດ້ບິນກາຍກັນ ໃນລະຍະໃກ້ໆ ເກືອບຕຳກັນ ຊຶ່ງ
ທັງສອງຝ່າຍຕ່າງກໍຖິ້ມໂທດໃສ່ກັນແລະກັນ.
ການປະທ້ວງຕໍ່ຕ້ານຈີນກຳລັງຂະຫຍາຍອອກໄປ. ເມື່ອໄວໆມານີ້ ພົນລະເມືອງ
ຂອງຟີລີປິນກໍພາກັນອອກມາປະທ້ວງ ຢູ່ຕາມຖະໜົນຫົນ ທາງ. ນາງ Marimi Dela
Fuente ກໍໄດ້ອອກມາປະທ້ວງກັບເຂົາ ເຈົ້າ.
ນາງ Marimi Dela Fuente ເວົ້າວ່າ “ຈີນກຳລັງບຸກລຸກອະທິປະໄຕ ຂອງພວກ
ເຮົາ. ດ້ວຍເຫດຜົນອັນນັ້ນ ຂ້ອຍຈຶ່ງອອກມາຊ່ວຍລະດົມ ພົນລະເມືອງຂອງ
ພວກເຮົາ ເພື່ອຕໍ່ຕ້ານ ການລະເມີດຕ່າງໆຂອງຈີນ ຕໍ່ປະຊາຄົມໂລກ ແລະ
ປະເທດພວກເຮົາ ແລະ ບັນດາປະເທດໃນອາຊຽນ.”
ແລະບໍ່ແມ່ນແຕ່ພຽງບັນດາປະເທດເພື່ອນບ້ານຂອງຈີນເທົ່ານັ້ນ ທີ່ມີ ຄວາມກັງວົນ.
ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Chuck Hagel ກໍໄດ້ກ່າວ
ຫາຈີນ ເມື່ອບໍ່ດົນມານີ້ວ່າ ຈີນໄດ້ປະຕິບັດການຂ້າງດຽວ ທີ່ບ່ອນທຳລາຍສະຖຽນ
ລະພາບໃນຂົງເຂດ ເພື່ອຢືນຢັດ ການອ້າງເອົາກຳມະສິດຂອງຕົນ ໃນດິນແດນ
ຢູ່ທະເລຈີນໃຕ້ນັ້ນ.
ໃນເມື່ອກ່ອນ ປັກກິ່ງອາດໄດ້ຖອຍຫ່າງອອກໄປ ທ່າມກາງການຕິຕຽນ ທີ່ເພີ້ມທະວີ
ຂຶ້ນເລື້ອຍໆແບບນັ້ນ. ແຕ່ວ່າການຕັດສິນໃຈຂອງຈີນ ທີ່ຈະເຂົ້າຮ່ວມໃນການເຝິກແອບ
RIMPAC ຄັ້ງນີ້ ທີ່ໄດ້ກຳນົດໃສ່ວັນທີ 26 ມິຖຸນາ ຫາ ວັນທີ 1 ສິງຫານັ້ນ ແມ່ນສະແດງ
ໃຫ້ເຫັນເຖິງ ຄວາມເຕັມໃຈ ທີ່ຢາກມີຄວາມໂປ່ງໃສຫຼາຍຂຶ້ນ ແລະ ເນັ້ນໃຫ້ເຫັນເຖິງ
ສາຍພົວພັນທາງດ້ານທະຫານທີ່ໜັກແໜ້ນຂຶ້ນ ກັບວໍຊິງຕັນ ອິງຕາມທ່ານ Wang
Dong ນັກລັດຖະສາດການເມືອງຈາກມະຫາວິທະຍາໄລປັກກິ່ງ ທີ່ມີຄວາມເຫັນວ່າ:
ທ່ານ Wang Dong ເວົ້າວ່າ “ແນ່ນອນ ຍັງມີຊ່ອງຫວ່າງຢ່າງຫຼວງຫຼາຍໃນຄວາມ
ຄິດເຫັນ ລະຫວ່າງ ຈີນກັບສະຫະລັດ ແລະບັນດາພັນທະມິດ ແລະມັນມີຄວາມ
ສຳຄັນຫຼາຍ ທີ່ຕ້ອງຫລຸດຊ່ອງຫວ່າງອັນນັ້ນ ໃຫ້ແຄບລົງ ແລະຂ້າພະເຈົ້າຄິດວ່າ
ທາງທີ່ດີສຸດກໍແມ່ນຜ່ານການສື່ສານ ແລະ ການແລກປ່ຽນກັນຕ່າງໆ.”
ທ່ານ Lin Chong-Pin ອະດີດຮອງລັດຖະມົນຕີ ກະຊວງປ້ອງກັນປະເທດໄຕ້ຫວັນ
ກ່າວວ່າ ສະຫະລັດໄດ້ມີບົດບາດເປັນຜູ້ນຳພາຢູ່ຂົງເຂດ ປາຊີຟິກ ມາເປັນເວລາດົນ
ນານແລ້ວ ແຕ່ຍ້ອນຂໍ້ຈຳກັດຮັດແຄບດ້ານ ງົບປະມານ ທີ່ເພີ້ມຂຶ້ນນັບມື້ຢູ່ໃນປະເທດ
ແລະ ການເຕີບໂຕຂຶ້ນຢ່າງໄວຂອງຈີນ ທັງສອງປະເທດຈຶ່ງກຳລັງປັບໂຕໃຫ້ເຂົ້າກັບ
ສະພາວະໃໝ່ນີ້ ແລະແນ່ນອນ ບັນຫາຫຍຸ້ງຍາກຕ່າງໆລະຫວ່າງກັນກໍຈະຕ້ອງເກີດ
ຂຶ້ນ. ທ່ານໄດ້ລົມກັບວີໂອເອ ຜ່ານທາງ Skype.
ທ່ານ Lin Chong-Pin ອະທິບາຍວ່າ “ທັງສອງກຳລັງຊອກຫາຈຸດຢືນອັນໃໝ່.
ແລະ ໃນລະຍະທີ່ມີການທົດສອບແລະການປັບຕົວນີ້ ມັນຕ້ອງມີຄວາມຫຍຸ້ງ
ຍາກເຈັບປວດຕ່າງໆ ແລະອັນນັ້ນແມ່ນສິ່ງທີ່ພວກເຮົາກຳລັງເຫັນຢູ່ເວລານີ້.”
ທ່ານ Lin ໄດ້ໂຕ້ແຍ້ງວ່າ ແຕ່ຄວາມແຂງແກ່ງຂອງປັກກິ່ງກໍມີຂໍ້ຈຳ ກັດຢູ່. ທ່ານກ່າວວ່າ
ສ່ວນນຶ່ງຂອງເຫດຜົນທີ່ ຈີນກຳລັງເພີ້ມທະວີ ຄວາມເຄັ່ງຕຶງຂຶ້ນ ກັບບັນດາປະເທດ
ເພື່ອນບ້ານ ຂອງຕົນນັ້ນ ກໍຍ້ອນວ່າ ປະທານປະເທດຈີນ ທ່ານ Xi Jinping ບໍ່ສາມາດ
ທີ່ຈະປ່ອຍໃຫ້ ໂລກ ພາຍນອກ ມອງເຫັນວ່າ ຕົນອ່ອນແອໄດ້.
ທ່ານ Lin ໃຫ້ຂໍ້ສັງເກດວ່າ “ເພື່ອທີ່ຈະກ້າວໜ້າຕໍ່ໄປໃນດ້ານການປະຕິ ຮູບນັ້ນ
ທ່ານ Xi ຈຳເປັນຕ້ອງໄດ້ຮັບການປົກປ້ອງ ເພາະວ່າການປະຕິຮູບຕ່າງໆເຫຼົ່ານັ້ນ ແມ່ນຈະສົ່ງຜົນກະທົບຕໍ່ຜົນປະໂຫຍດຂອງຫຼາຍໆ ຄົນທີ່ມີອຳນາດໃນລັດຖະບານ ແລະ ນອກລັດຖະບານ. ດັ່ງນັ້ນ ທ່ານບໍ່ ສາມາດສະແດງໃຫ້ເຫັນສະພາບທີ່ອ່ອນ ແອ ຕໍ່ມວນຊົນພາຍໃນປະເທດ.”
ຈີນໄດ້ສົ່ງເຮືອ 4 ລຳ ໄປເຂົ້າຮ່ວມການຝຶກຊ້ອມ ທີ່ຈະດຳເນີນໄປ ເປັນເວລາດົນເຖິງ 1
ເດືອນນັ້ນ ອັນມີ ເຮືອພິຄາດຕິດລູກສອນໄຟ ເຮືອລົບຂະໜາດນ້ອຍລູກສອນໄຟ
ເຮືອລຳລຽງສຳພາລະ ແລະ ກຳປັ່ນ ພະຍາບານຂອງຕົນ ທີ່ຊື່ວ່າ Peace Ark. ໃນ
ລະຫວ່າງການຝຶກຊ້ອມນີ້ ທະຫານ ແລະ ນາຍຮ້ອຍກອງທັບເຮືອຈີນ ຫຼາຍກວ່າ
1,000 ຄົນ ຈະເຝິກແອບຄຽງບ່າຄຽງໄຫລ່ ກັບຄູ່ຕຳແໜ່ງຈາກຫຼາຍກວ່າ 20 ປະເທດ.
