ທີມກິລາ baseball Cubs ຂອງນະຄອນ Chicago ໄດ້ຮັບໄຊຊະນະຕຳແໜ່ງແຊ້ມ World Series ເປັນເທື່ອທຳອິດໃນຮອບ 108 ປີ ໂດຍຊະນະທີມ Indians ຂອງ ນະຄອນ Cleveland 8 ຕໍ່ 7 ໃນຊ່ວງເວລາຫຼືອິນນິ່ງທີ 10 ຂອງການແຂງຂັນ.
ທີມ Cubs ໄດ້ນຳໜ້າໄປກ່ອນ 6 ຕໍ່ 3 ຫຼັງການແຂງຂັນຮອບທີ 6 ທຳອິດ ແຕ່ວ່າທີມນະຄອນ Cleveland ແມ່ນໄດ້ຕາມມາຕິດໆ ຈົນທຳຄະແນນຕື່ມອີກ 3 ຄະແນນ ໃນຊ່ວງເວລາທີ 8 ຈົນມີຄະແນນເທົ່າກັນ. ບໍ່ມີທີມໃດ ໄດ້ຄະແນນໃນຊ່ວງເວລາທີ 9 ຂອງການແຂ່ງຂັນ ແລະຫຼັງຈາກທີ່ໄດ້ມີຝົນຕົກແດ່ເລັກນ້ອຍ ເຮັດໃຫ້ການແຂ່ງຂັນຊັກຊ້າລົງ ຈຶ່ງເຮັດໃຫ້ມີການຕໍ່ເວລາພິເສດ ເພີ້ມອີກຊ່ວງນຶ່ງ.
ທັງສອງທີມຕ່າງກໍຫວັງວ່າ ຈະເຮັດໃຫ້ການລໍຄອຍຖ້າຕຳແໜ່ງແຊ້ມ World Series ຂອງຕົນສິ້ນສຸດລົງ ຊຶ່ງທີມ Cubs ເຄີຍໄດ້ຊະນະເທື່ອສຸດທ້າຍ ໃນປີ 1908 ໃນຂະນະທີ່ທີມ Indian ຂອງນະຄອນ Cleveland ເຄີຍໄດ້ຄອງຕຳແໜ່ງດັ່ງກ່າວ ເທື່ອສຸດທ້າຍໃນປີ 1948.
ເຖິງແມ່ນວ່າ ທີມ Cubs ມີຄະແນນເປັນຕໍ່ ໃນການຄາດຫວັງທີ່ຈະເປັນຜູ້ຊະນະຕຳແໜ່ງ World Series ກໍຕາມ ແຕ່ທີມຂອງນະຄອນ Cleveland ແມ່ນເຫຼືອພຽງແຕ່ນຶ່ງເກມ ທີ່ຈະຄວ້າເອົາຄອງຕຳແໜ່ງນີ້ໄປຄອງ ຫຼັງຈາກທີ່ໄດ້ຊະນະ ເກມທີ 1 ທີ 3 ແລະທີ 4 ຂອງການແຂ່ງຂັນຊິງແຊ້ມ World Series. ແຕ່ວ່າ ທີມ Chicago ໄດ້ຊະນະ 3 ເກມຕິດຕໍ່ກັນ ຮວມທັງ 2 ເກມສຸດທ້າຍ ທີ່ນະຄອນ Cleveland ເຮັດໃຫ້ ການຄອງຄອຍຖ້າເອົາຕຳແໜ່ງຕຳແໜ່ງ World Series ທີ່ດົນນານທີ່ສຸດ ໂດຍທີມ ກິລາ baseball ໃດໆ ໃນປະຫວັດສາດສິ້ນສຸດລົງ.
