ລິ້ງ ສຳຫລັບເຂົ້າຫາ

ເຈົ້າໜ້າທີ່ ກຳປູເຈຍ ບຸກຄ້າຍ ພວກປະທ້ວງ ແລະຫ້າມບໍ່ໃຫ້ ເດີນຂະບວນ (ສະໄລດ໌/ວີດີໂອ)


ເຈົ້າໜ້າທີ່ຮັກສາຄວາມສະຫງົບກຳປູເຈຍ ທຸບຕີພະສົງ ທີ່ເຂົ້າຮ່ວມ ການປະທ້ວງ ຂອງພັກກູ້ຊາດກຳປູເຈຍ ທີ່ກຸງພະນົມເປັນ ໃນວັນເສົາ (4 ມັງກອນ 2014)
ຕຳຫຼວດກຳປູເຈຍ ໄດ້ບັງຄັບໃຫ້ພວກປະທ້ວງຕໍ່ຕ້ານລັດຖະບານ
ອອກໄປຈາກຄ້າຍໂຮມຊຸມນຸມ ທີ່ນະຄອນຫຼວງພະນົມເປັນ ແລະ
ຫ້າມບໍ່ໃຫ້ຈັດການປະທ້ວງຕໍ່ຕ້ານລັດຖະບານນາຍົກລັດຖະມົນຕີ
ຮຸນເຊນ ໃດໆຕື່ມອີກ.

ກຳລັງຮັກສາຄວາມສະຫງົບ ຫລາຍຮ້ອຍຄົນ ທີ່ມີໄມ້ຄ້ອນ ແລະ
ເຄື່ອງປ້ອງກັນເປັນອາວຸດ ໄດ້ບຸກເຂົ້າໄປໃນຄ້າຍພວກປະທ້ວງ
ທີ່ສວນອິດສະຫຼະພາບ ໃນນະຄອນຫຼວງພະນົມເປັນໃນວັນເສົາ
ມື້ນີ້ເຮັດໃຫ້ພວກປະທ້ວງຫຼາຍຮ້ອຍຄົນຕ້ອງໄດ້ພາກັນຫລົບໜີ.

ທ່ານ Pa Socheatvong ເຈົ້າຄອງນະຄອນຫຼວງພະນົມເປັນ
ໄດ້ອອກຖະແຫຼງການສະບັບນຶ່ງ ຫ້າມບໍ່ໃຫ້ໃຊ້ສວນດັ່ງກ່າວ ແລະເດີນຂະບວນຢູ່ຕາມຖະ ໜົນຫົນທາງສາຍຕ່າງໆໃນນະຄອນຫຼວງໂດຍອ້າງເຫດຜົນດ້ານຄວາມປອດໄພ. ຖະແຫຼງ ການສະບັບນີ້ພາໃຫ້ເກີດມີຄວາມສົງໄສບໍ່ແນ່ໃຈກ່ຽວກັບການປະທ້ວງເປັນເວລາ 3 ມື້ ທີ່ ກຳນົດຈະເລີ້ມໃນວັນອາທິດນີ້ ຈະດຳເນີນໄປຕາມໝາຍກຳນົດຫຼືບໍ່.



ການບຸກເຂົ້າໄປໃນຄ້າຍຂອງພວກປະທ້ວງ ມີຂຶ້ນນຶ່ງມື້ຫຼັງຈາກຕຳຫຼວດໄດ້ຍິງປືນເຂົ້າໃສ່ ພວກຄົນງານຕັດຫຍິບ ທີ່ພວມພາກັນນັດຢຸດງານ ໂດຍໄດ້ສັງຫານຢ່າງໜ້ອຍ 4 ຄົນ.

ພວກທີ່ເຫັນເຫດການກ່າວວ່າ ຕຳຫຼວດໄດ້ຍິງປືນເຂົ້າໃສ່ພວກປະທ້ວງ ທີ່ນະຄອນພະນົມ ເປັນ ຂະນະທີ່ພວກເຂົາເຈົ້າໄດ້ຕັນທາງສາຍນຶ່ງ ແລະແກວ່ງກ້ອນຫີນ ເຂົ້າໃສ່ຕຳຫຼວດ.

ກຸ່ມປົກປ້ອງສິດທິມະນຸດ ທ້ອງຖິ່ນກຸ່ມນຶ່ງ ກ່າວວ່າ ມີຫລາຍກວ່າ 20 ຄົນ ໄດ້ຮັບບາດເຈັບ ແລະບໍ່ຕໍ່າກວ່າ 10 ຄົນ ຖືກຈັບຢູ່ນອກໂຮງງານ Yak Jin ໃກ້ໆນະຄອນຫຼວງພະນົມເປັນ ແລະກຸ່ມປົກປ້ອງສິດທິມະນຸດກຸ່ມນີ້ ກໍໄດ້ປະນາມຄວາມຮຸນແຮງດັ່ງກ່າວ ແລະການສົ່ງກຳ ລັງພິເສດຂອງທະຫານ ໄປປາບປາມພວກປະທ້ວງ.

XS
SM
MD
LG