ບັນດາກຸ່ມປົກປ້ອງສິດທິມະນຸດສະແດງຄວາມຍິນດີນໍາການຕັດສິນໃຈຂອງກໍາປູເຈຍໃນການຫ້າມສົ່ງແມ່ຍິງກໍາປູເຈຍໄປຍັງມາເລເຊຍເພື່ອໄປເຮັດວຽກເປັນຄົນໃຊ້ໃນເຮືອນນັ້ນ ໃນຂະນະທີ່ລັດຖະບານພະນົມເປັນ ທໍາການສືບສວນຫລາຍກໍລະນີຫວ່າງໄວໆມານີ້ ກ່ຽວ
ກັບການລວນລາມທາງເພດແລະການລະເມີດສິດທິອື່ນໆຂອງພວກແມ່ຍິງເຫລົ່ານັ້ນ.
ບັນດາກຸ່ມປົກປ້ອງສິດທິມະນຸດໃນທັງສອງປະເທດ ກ່າວໃນວັນຈັນມື້ນີ້ວ່າ ການເກືອດຫ້າມດັ່ງກ່າວບໍ່ຄວນຈະຖືກຍົກເລີກ ຈົນກວ່າຈະມີການຈັດຕັ້ງມາດຕະການຂຶ້ນມາ ເພື່ອໃຫ້ໝັ້ນໃຈວ່າພວກຄົນໃຊ້ເຫລົ່ານີ້ຈະບໍ່ຖືກສວາຍໃຊ້ເອົາຜົນປະໂຫຍດສ່ວນໂຕ ໂດຍພວກອົງການຊອກແຮງງານແລະພວກນາຍຈ້າງນັ້ນເສຍກ່ອນ.
ການເກືອດຫ້າມທີ່ໄດ້ປະກາດໃຊ້ໃນວັນເສົາຜ່ານມານີ້ ໂດຍນາຍົກລັດ ຖະມົນຕີຮຸນແຊນ ສາມາດເພີ່ມບັນຫາການຂາດແຮງງານຂຶ້ນໄດ້ໃຫ້ແກ່ ມາເລເຊຍ ທີ່ອາໄສກາງຕໍ່ນໍາພວກຄົນງານຈາກຕ່າງປະເທດ ສໍາລັບເຮັດວຽກເປັນຄົນໃຊ້ໃນບ້ານເຮືອນນັ້ນ. ອິນໂດເນເຊຍກໍໄດ້ຫ້າມພົນລະເມືອງຂອງຕົນ ບໍ່ໃຫ້ໄປເຮັດວຽກເປັນຄົນໃຊ້ຢູ່ໃນມາເລເຊຍ ມາໄດ້ 2 ປີແລ້ວ ຍ້ອນບັນຫາດັ່ງກ່າວ.
ການເຄື່ອນໄຫວຂອງກໍາປູເຈຍມີຂຶ້ນ ຫລັງຈາກມີຫລາຍກໍລະນີທີ່ໄດ້ເປັນຫົວຂໍ້ຂ່າວໃນກຸງພະນົມເປັນ ຮວມທັງຫລາຍກໍລະນີກ່ຽວກັບການຊອກເກນເອົາແມ່ຍິງອາຍຸບໍ່ເຖິງກະສຽນໄປເຮັດວຽກຢູ່ໃນມາເລເຊຍ. ໃນກໍລະນີນຶ່ງນັ້ນ ມີການພົບເຫັນສົບຄົນໃຊ້ທີ່ບໍ່ເຖິງອາຍຸເຮັດວຽກຄົນນຶ່ງ ຢູ່ນອກບ້ານນາຍຈ້າງຂອງລາວ.
ກຸ່ມປົກປ້ອງສິດທິມະນຸດ Tenaganita ທີ່ມາເລເຊຍ ກ່າວວ່າ ຕົນໄດ້ຊ່ອຍກູ້ຊີວິດຄົນໃຊ້ກໍາປູເຈຍໄວ້ຫລາຍຄົນໃນປີນີ້ ຊຶ່ງຈໍານວນຫລາຍກວ່າເຄິ່ງນຶ່ງ ຖືກລະເມີດທາງເພດຫລືບໍ່ໄດ້ຮັບອາຫານບໍາລຸງຮ່າງກາຍພຽງພໍ.
ມີການກະປະມານກັນວ່າ ມີການວ່າຈ້າງຄົນໃຊ້ໃນບ້ານເຮືອນຈາກຕ່າງປະເທດ ຈໍານວນ 320 ພັນຄົນໃນມາເລເຊຍ ຊຶ່ງປະມານ 15 ເປີເຊັນ ແມ່ນໄປຈາກກໍາປູເຈຍ.
