ລິ້ງ ສຳຫລັບເຂົ້າຫາ

ທ່ານນາງຊູຈີ ຢ້ຽມຢາມ ຢູໂຣບ ຄັ້ງປະວັດສາດ

  • ທອງປານ ເທບວົງສາ

ທ່ານນາງ Aung San Suu Kyi ທີ່ສະໜາມບິນສາກົນຂອງນະຄອນຢ່າງກຸ້ງ ຂະນະທີ່ກໍາລັງຈະອອກເດີນທາງ ໄປຢ້ຽມຢາມຢູໂຣບ, ວັນທີ 13 ມີຖຸນາ 2012.

ທ່ານ​ນາງ​ອອງຊານ ຊູ​ຈີ ນັກ​ເຄຶ່ອນ​ໄຫວ​ປະຊາທິປະ​ໄຕ​ ມາ​ໄດ້​ດົນ​ນານ​ຂອງ​ມຽນມາ ​ໄດ້ອອກ​ເດີນທາງ​ຄັ້ງ​ປະວັດ​ສາດ​ເພື່ອ​ໄປ​ຢ້ຽມຢາມພາກພື້ນ ຢູ​ໂຣບ ທີ່​ຈະ​ໂຮມ​ທັງ​ການ​ໄປ​ຮັບ​ເອົາ​ລາງວັນ​ໂນແບ​ລຂະ​ແໜງ​ສັນຕິພາບ ຢ່າງ​ເປັນ​ທາງ​ການ ຊຶ່ງ​ເປັນ​ລາງວັນ​ທີ່​ໄດ້​ມອບ​ໃຫ້​ແກ່​ທ່ານ​ເມື່ອ 20 ກວ່າປີຜ່ານມາ​ແລ້ວນັ້ນ.

ຜູ້​ນໍາ​ພັກ​ຝ່າຍ​ຄ້ານຂອງ​ມຽນມາທ່ານ​ນີ້ ​ໄດ້​ໃຊ້​ເວລາສ່ວນໃຫຍ່​ ຖືກ​ກັກ​ບໍລິ​ເວນໃນ​ຮອບ 20 ປີຜ່ານມາ ​ໄດ້​ອອກ​ເດີນທາງ​ຈາກນະຄອນ​ຢ່າງ​ກຸ້ງ ໃນ​ວັນ​ພຸດ​ມື້​ນີ້ ​ເພື່ອ​ເດີນທາງ​ເປັນ​ເທື່ອ​ທໍາ​ອິດໄປ​ຍັງ​ພາກ​ພື້ນ​ຢູ​ໂຣບ​ໃນ​ໄລຍະ 24 ປີ. ກ່ອນ​ອອກ​ເດີນທາງ​ໄປ​ນັ້ນ ທ່ານ​ນາງ​ໄດ້​ກ່າວ​ຕໍ່​ບັນດານັກຂ່າວ​ທີ່ສະໜາມ​ບິນວ່າ ທ່ານ​ນາງ​ຄາດ​ວ່າການ​ເດີນທາງ​ຢ້ຽມຢາມ​ຄັ້ງ​ນີ້​ຈະ​ໄດ້​ເຫັນຫຼາຍສິ່ງຫຼາຍຢ່າງ ຊຶ່ງ​ທ່ານ​ນາງ​ກ່າວ​ວ່າ.

“​ແຕ່ລະ​ປະ​ເທດ​ຈ​ະ​ແຕກ​ຕ່າງ​ກັນ​ໄປ. ຂ້າພະ​ເຈົ້າຈະຮູ້​ວ່າ​ມຽນມາ​ຍັງ​ຢູ່​ລ້າ ຫຼັງຫຼາຍສໍ່າ​ໃດ ​ເວລາ​ຂ້າພະ​ເຈົ້າ​ໄປ​ເຖິງ​ປະ​ເທດ​ອື່ນໆ​ແລ້ວ”

ທີ່​ນະຄອນ​ເຈ​ນີວາ ​ເມື່ອ​ວັນ​ພະຫັດ​ມື້​ອື່ນ​ນີ້ ທ່ານ​ນາງ​ອອງຊານຊູ​ຈີ ຈະ​ກ່າວ​ຄໍາ​ປາ​ໄສຢູ່​ທີ່​ກອງ​ປະຊຸມ​ອົງການ​ແຮງ​ງານສາກົນ. ຕໍ່​ຈາກ​ນັ້ນ​ທ່ານ​ນາງ​ຈະ​ເດີນທາງ​ໄປ​ປະ​ເທດ​ນໍ​ເວ​ເພື່ອ​ກ່າວ​ຄໍາ​ປາໄສ​ຮັບ​ເອົາ​ລາງວັນ​ໂນ​ແບ​ລຂະ​ແໜງ​ສັນຕິພາບ​ປີ 1991 ທີ່​ລໍຄອຍ​ມາ​ເປັນ​ເວລາ​ດົນ​ນານ​ ນັ້ນ ຊຶ່ງ​ທ່ານນາງ​ບໍ່​ສາມາດ​ໄປ​ຮັບ​ເອົາໃນ​ທາງ​ສ່ວນ​ຕົວ​ໄດ້ ຍ້ອນ​ການ​ຖືກກັກ​ບໍລິ​ເວນ​ຂອງ​ທ່ານນາງ.

ຕໍ່​ຈາກ​ນັ້ນ ທ່ານ​ນາງ​ອອງຊານ ຊູ​ຈີ ຈະໄດ້​ຢຸດ​ແວ່​ເປັນ​ເວລາ​ສັ້ນໆ​ທີ່ປະ​ເທດໄອ​ແລນດ໌ ​ເພື່ອ​ຮັບ​ລາງວັນ​ສິດທິ​ມະນຸດ​ຂອງ​ອົງການ​ນີລະ​ໂທດກໍາ ​ສາກົນ ຈາກດາ​ຣານັກ​ຮ້ອງ​ເພງ​ຣ໊ອກ Bono ​ແລະ​ຈະ​ເດີນທາງ​ຕໍ່​ໄປ​ຍັງ ປະ​ເທດ​ອັງກິດ​ບ່ອນ​ທີ່​ທ່ານ​ນາງ​ຖືກ​ເຊື້ອ​ເຊີນ​ໃຫ້​ກ່າວ​ຄໍາ​ປາ​ໄສ​ຢູ່​ໃນ​ທັງສະ ພາຕໍ່າ​ແລະ​ສະພາ​ສູງ​ຂອງ​ອັງກິດ​ນັ້ນ.

XS
SM
MD
LG