ບັນດາເຈົ້າໜ້າທີ່ເກົາຫຼີໃຕ້ກ່າວວ່າ ມຽນມາຕົກລົງທີ່ຈະປະຕິບັດຕາມມະຕິຂອງສະຫະປະ
ຊາຊາດ ທີ່ແນເປົ້າໝາຍໃສ່ຍຸດຕິໂຄງການນິວເຄລຍແລະລູກສອນໄຟຂອງເກົາຫຼີເໜືອນັ້ນ.
ໄດ້ມີການປະກາດການເຄື່ອນໄຫວນີ້ໃຫ້ຮູ້ໃນວັນອັງຄານມື້ນີ້ ໂດຍໂຄສົກປະຈໍາປະທານາ
ທິບໍດີ Lee Myung-bak ແຫ່ງເກົາຫຼີໃຕ້ ຊຶ່ງເວລານີ້ກໍາລັງມ້ວນທ້າຍການຢ້ຽມຢາມມຽນ
ມາ ຄັ້ງປະຫວັດສາດ ເປັນເວລາ 2 ມື້.
ປະທານາທິບໍດີມຽນມາ ທ່ານ Thein Sein ໄດ້ຍອມຮັບໃນລະຫວ່າງການພົບປະກັບ
ທ່ານ Lee ໃນວັນຈັນວານນີ້ ວ່າ ຜ່ານມາ ມຽນມາໄດ້ມີການຕົກລົງກັບເກົາຫລີເໜືອແທ້
ກ່ຽວກັບການຊື້ຂາຍອາວຸດປະເພດທໍາມະດາ ແຕ່ທ່ານປະຕິເສດວ່າ ບໍ່ໄດ້ທໍາການຕົກລົງ
ໃດໆກັບພຽງຢາງກ່ຽວກັບເລື້ອງນິວເຄລຍ ອັນເປັນບັນຫາທີ່ຢູ່ໃນຄວາມກັງວົນເປັນຫ່ວງ
ຂອງກຸງໂຊລມາ ເປັນເວລານານ.
ທ່ານ Lee ຍັງໄດ້ພົບປະໃນວັນອັງຄານມື້ນີ້ ກັບຜູ້ນໍາຝ່າຍຄ້ານຂອງມຽນມາ ທ່ານນາງ
ອອງ ຊານ ຊູຈີ ທີ່ກ່າວວ່າ ເກົາຫລີໃຕ້ກັບມຽນມາແມ່ນມີຫລາຍສິ່ງຫລາຍຢ່າງຄ້າຍຄືກັນ
ໃນການທີ່ຕ້ອງໄດ້ເດີນໄປບົນຫົນທາງທີ່ລະອິດລະອ້ຽວ ໄປສູ່ປະຊາທິປະໄຕນັ້ນ.
ທ່ານ Lee ເປັນປະທານາທິບໍດີເກົາຫຼີໃຕ້ຄົນທໍາອິດທີ່ໄປຢ້ຽມຢາມມຽນມາ ນັບແຕ່ປີ 1983
ເປັນຕົ້ນມາ ເວລາໜ່ວຍກ້າຕາຍຂອງເກົາຫລີເໜືອໄດ້ພະຍາຍາມລອບສັງຫານປະທານາທິ
ບໍດີ Chun Doo-hwan ທີ່ນະຄອນຢ່າງກຸ້ງ ຊຶ່ງໄດ້ເຮັດໃຫ້ມີຄົນເສຍຊີວິດ 21 ຄົນ ແຕ່ທ່ານ
Chun Doo-hwan ລອດຊີວິດມາໄດ້.