ລິ້ງ ສຳຫລັບເຂົ້າຫາ

ທ່ານ Thein Sein ຖືກ ເລືອກ ເປັນປະທານາທິບໍດີ ມຽນມາ

  • ໄພສານ ວໍຣະຈັກ

ທ່ານ Thein Sein ທີ່ສະພາແຫ່ງຊາດມຽນມາ ເລືອກໃຫ້ເປັນ ປະທານາທິບໍດີ ຂອງປະເທດ.

ສະພາແຫ່ງຊາດຊຸດໃໝ່ຂອງມຽນມາ ໄດ້ປະຊຸມກັນໃນວັນສຸກມື້ນີ້ ແລະເລືອກເອົາ ທ່ານ
Thein Sein ນາຍົກລັດຖະມົນຕີທີ່ຫາກໍພົ້ນຈາກຕຳແໜ່ງຂອງລັດຖະບານທະຫານເປັນ
ປະທານາທິບໍດີຂອງປະເທດ.

ທ່ານ Thein Sein ນາຍພົນທີ່ອອກກິນເບ້ຍບຳນານໃນເດືອນເມສາປີກາຍ ແມ່ນພິຈາ
ລະນາກັນວ່າ ເປັນຜູ້ທີ່ໄດ້ຮັບການສະໜັບສະໜຸນຫຼາຍທີ່ສຸດໃນບັນດາຜູ້ສະມັກທີ່ຖືກຄັດ
ເລືອກ 3 ຄົນໃນສັບປະດານີ້.ສ່ວນຜູ້ສະມັກອີກ 2 ຄົນ ກໍມີນາຍພົນເບ້ຍບຳນານ Tin
Aung Mying Oo ແລະທ່ານ Ai Mauk Kham ທ່ານໝໍທີ່ມີສະຖານທີ່ພະຍາບານ
ຫຼືຄລີນິກ ທີ່ລັດສານ.

ທ່ານ Thein Sein ຊຶ່ງເປັນພັນທະມິດທີ່ສຳຄັນຂອງນາຍພົນ Than Shwe ຜູ້ນຳ
ທາງທະຫານຂອງມຽນມານັ້ນ ໄດ້ຖືກແຈ້ງໃຫ້ຊາບກ່ຽວກັບຕຳແໜ່ງດັ່ງກ່າວກ່ອນທີ່ມີ
ການລົງຄະແນນສຽງດ້ວຍຊໍ້າ.

ນຶ່ງໃນບັນດາພາລະກິດອັນທຳອິດຂອງ ປະທານາທິບໍດີ Thein Sein ກໍແມ່ນຈະຕ້ອງ
ໄດ້ແຕ່ງຕັ້ງຄະນະລັດຖະບານຊຸດໃໝ່ຊຶ່ງພາໃຫ້ມີຄວາມຢ້ານກົວເພີ່ມຂຶ້ນໃນໝູ່ພວກນັກ
ວິເຄາະວ່າ ຂັ້ນຕອນດັ່ງກ່າວຈະຖືກນຳໃຊ້ເພື່ອປິດບັງອຳນາດຂອງພວກທະຫານຢູ່ທາງ
ຫຼັງການປົກຄອງຂອງພົນລະເຮືອນໃນມຽນມາ.

ສະພາແຫ່ງຊາດມຽນມາໄດ້ເປີດສະໄໝປະຊຸມປະຖົມມະເລີກໃນຮອບ 20 ກວ່າປີລຸນຫຼັງ
ການເລືອກຕັ້ງ ໃນເດືອນພະຈິກຜ່ານມາ ຊຶ່ງບ່ອນນັ່ງຫຼາຍກວ່າ 80% ໄດ້ຕົກເປັນຂອງ
ພວກອະດີດນາຍທະຫານ ແລະພັນທະມິດຂອງພວກເຂົາເຈົ້າ. ລັດຖະບານມຽນມາກ່າວ
ອ້າງວ່າ ຕົນກໍາລັງເຄື່ອນໄຫວ ໄປສູ່ການປົກຄອງແບບປະຊາທິປະໄຕ ແຕ່ພວກຕໍາໜິ
ຕິຕຽນເວົ້າວ່າ ມັນເປັນພຽງແຕ່ການເອົາໜ້າກາກຂອງພົນລະເຮືອນມາສວມໃສ່ການສືບ
ຕໍ່ການປົກຄອງຂອງພວກທະຫານທໍ່ນັ້ນ.

XS
SM
MD
LG