ທໍານຽບສີຟ້າຂອງປະທານາທິບໍດີເກົາຫຼີໃຕ້ ໄດ້ອອກຖະແຫຼງການ ສະບັບນຶ່ງເມື່ອວັນອັງຄານຜ່ານມາວ່າ ປະທານາທິບໍດີ ທຽນ ເຊນ ຂອງມຽນມາ ໄດ້ໃຫ້ຄໍາໝັ້ນສັນຍາວ່າ ຈະຢຸດຊື້ອາວຸດຍຸດໂທປະກອນຕ່າງໆຈາກເກົາຫຼີເໜືອ.
ທ່ານ ທຽນ ເຊນ ໄດ້ໃຫ້ຄໍາສັນຍາດັ່ງກ່າວນີ້ ເມື່ອວັນຈັນແລ້ວນີ້ ໃນລະຫວ່າງການພົບປະກັບປະທານາທິບໍດີ ເກົາຫຼີໃຕ້ ທ່ານ ລີ ມຽງ-ບັກ ທີ່ກໍາລັງຢ້ຽມຢາມມຽນມານັ້ນ ຊຶ່ງທ່ານ ທຽນ ເຊນ ຍັງໄດ້ກ່າວອີກວ່າ ມຽນມາບໍ່ເຄີຍສະແຫວງຫາການຮ່ວມມືດ້ານນີວເຄລຍກັບພຽງຢ່າງຈັກເທື່ອ.
ຊາວມຽນມາທີ່ໂຕນໜີມາ ແລະໜ່ວຍສືບລັບຕ່າງປະເທດໄດ້ສະແດງຄວາມສົງໄສອອກມາ ຕັ້ງແຕ່ປີ 2006 ແລ້ວວ່າ ເກົາຫຼີເໜືອໄດ້ຊ່ວຍມຽນມາໃນ ການດໍາເນີນໂຄງການນີວເຄລຍລັບໆອັນນຶ່ງ ຊຶ່ງມຽນມາໄດ້ປະຕິເສດມາ ຕະຫລອດ.
ທ່ານ ລີ ໄດ້ບອກພວກນັກຂ່າວເມື່ອວັນອັງຄານແລ້ວນີ້ວ່າ ທ່ານໄດ້ຊຸກຍູ້ ປະທານາທິບໍດີ ທຽນ ເຊນ ບໍ່ໃຫ້ຝ່າຝືນມະຕິຂອງອົງການສະຫະປະຊາຊາດກ່ຽວກັບເກົາຫຼີເໜືອ ແຕ່ພ້ອມດຽວກັນ ທ່ານກໍໄດ້ຊົມເຊີຍຜູ້ນໍາມຽນມາ ທີ່ໄດ້ນໍາເອົາປະເທດຊາດຂອງທ່ານ ອອກຈາກການປົກຄອງໂດຍຝ່າຍທະຫານ ໄປສູ່ປະຊາທິປະໄຕ ໂດຍສົມທຽບໃສ່ກັບປະສົບການຂອງເກົາຫຼີໃຕ້ເອງນັ້ນ.
ທ່ານ ລີ ກ່າວວ່າ "ເກົາຫຼີໃຕ້ເປັນປະເທດທີ່ບໍ່ຄ່ອຍຈະພົບເຫັນ ທີ່ປະສົບຜົນສໍາເລັດດ້ານການອຸດສາຫະກໍາ ພ້ອມທັງການເປັນປະຊາທິປະໄຕ ແລະ ທ່ານສະແດງຄວາມໝັ້ນໃຈວ່າ ມຽນມາຈະເດີນທາງໄປຕາມເສັ້ນທາງທໍາ ນອງດຽວກັນນີ້ ໃນການກາຍເປັນປະເທດທີ່ບໍ່ພຽງແຕ່ຈະມີຄວາມຈະເຣີນ ຮຸ່ງເຮືອງຫລາຍຂຶ້ນ ແລະສະໜອງຊີວິດທີ່ດີຂຶ້ນໃຫ້ແກ່ປະຊາຊົນຂອງຕົນເທົ່ານັ້ນ ແຕ່ທີ່ສໍາຄັນຫລາຍກ່ວານັ້ນ ກໍຄືມີປະຊາທິປະໄຕຢ່າງແທ້ຈິງນັ້ນນໍາ."
ທ່ານ ລີ ໄດ້ໃຫ້ຄໍາເຫັນດັ່ງກ່າວນີ້ ຫຼັງຈາກທ່ານໄດ້ພົບປະກັບທ່ານນາງ ອອງຊານ ຊູຈີ ຜູ້ນໍາຝ່າຍຄ້ານຂອງມຽນມາ.
ທ່ານນາງອອງຊານເອງ ໄດ້ບອກພວກນັກຂ່າວວ່າ ຄືກັນກັບຢູ່ໃນເກົາຫຼີໃຕ້ ປະຊາຊົນໃນມຽນມາ ກໍຕ້ອງໄດ້ເອົາໃນສີ່ງທີ່ທ່ານນາງເອີ້ນວ່າ ເສັ້ນທາງທີ່ລໍາບາກ ໄປສູ່ການເປັນຜູ້ນໍາໃນດ້ານປະຊາທິປະໄຕນັ້ນ.
“ຕອນນີ້ ພວກເຮົາແມ່ນຢູ່ໃນຈຸດນຶ່ງໃນປະວັດສາດຂອງພວກເຮົາ ທີ່ມີຄວາມເປັນໄປໄດ້ສໍາລັບການຜັນປ່ຽນ. ແຕ່ຂ້າພະເຈົ້າບໍ່ຄິດວ່າ ພວກເຮົາສາມາດໝັ້ນໃຈໄດ້ວ່າ ເລຶ່ອງການຜັນປ່ຽນນີ້ຈະເກີດຂຶ້ນຢ່າງແນ່ນອນ. ຄວາມຕັ້ງໃຈແມ່ນມີຢູ່ແລ້ວ ແລະກໍມີຄວາມຫວັງດີຈາກທົ່ວໂລກ. ແຕ່ວ່າ ພວກເຮົາຕ້ອງໃຫ້ແນ່ໃຈວ່າ ພວກເຮົາຈະບໍ່ເຮັດໃຫ້ຄວາມຫວັງດີນັ້ນເລືອນຫາຍໄປ ແລະພວກເຮົາຈະນໍາໃຊ້ມັນໃຫ້ໄດ້ດີທີ່ສຸດເທົ່າທີ່ຈະເປັນໄປໄດ້ ໂດຍການເຮັດໃຫ້ເປັນທີ່ແນ່ໃຈວ່າ ມັນຖືກນໍາໃຊ້ໃນວີທີທາງທີ່ດີທີ່ສຸດເທົ່າທີ່ຈະເຮັດໄດ້ ຊຶ່ງກໍຄືເພື່ອຜົນປະໂຫຍດຂອງປະຊາຊົນຂອງພວກເຮົານັ້ນເອງ"
ໜັງສືພິມ New Light of Myanmar ຂອງທາງການ ເວົ້າເມື່ອວັນອັງຜ່ານມານີ້ວ່າ ມຽນມາຢາກໃຫ້ເກົາຫຼີໃຕ້ແບ່ງປັນປະສົບການໃຫ້ຕົນ ໃນດ້ານການພັດທະນາເສດຖະກິດແລະການປະຕິຮູບການເມືອງ.
ເກົາຫຼີໃຕ້ແມ່ນປົກຄອງໂດຍຝ່າຍທະຫານ ລຸນຫຼັງສົງຄາມເກົາຫຼີໃນຊຸມປີ 1950 ທີ່ໄດ້ແບ່ງແຍກເກົາຫຼີອອກເປັນເໜືອແລະໃຕ້ນັ້ນ ຊຶ່ງຝ່າຍໃຕ້ໄດ້ ຜັນປ່ຽນມາເປັນການປົກຄອງແບບພົນລະເຮືອນ ໃນເວລາຕໍ່ມາ.
ທ່ານ Ralph Cossa ປະທານອົງການ Pacific Forum ທີ່ເມືອງໂຮໂນລູລູ ລັດຮາວາຍ ກ່າວໃນການໃຫ້ສໍາພາດຜ່ານລະບົບ Skype ທາງອິນເທີເນັດ ວ່າ ເກົາຫຼີໃຕ້ພ້ອມດ້ວຍເກາະໃຕ້ຫວັນ ເປັນຕົວຢ່າງໃນບໍ່ເທົ່າໃດປະເທດ ທີ່ມຽນມາສາມາດຮຽນເອົາແບບຢ່າງໄດ້ ຊຶ່ງທ່ານເວົ້າວ່າ:
“ຂ້າພະເຈົ້າຄິດວ່າ ມຽນມາສາມາດຮຽນຮູ້ຈາກເກົາຫຼີໃຕ້ໄດ້ຫຼາຍສົມຄວນ ແລະວິທີການທີ່ເກົາຫຼີໃຕ້ທໍາການຜັນປ່ຽນໄປສູ່ປະຊາທິປະໄຕນັ້ນຢ່າງໃດ ເພາະວ່າເກົາຫຼີໃຕ້ເຮັດໄດ້ຢ່າງສໍາເລັດຜົນຫຼາຍທີ່ສຸດ. ຄືເກົາຫຼີໃຕ້ໄດ້ຜັນປ່ຽນຈາກການປົກຄອງແບບຜະເດັດການໂດຍທະຫານ ໃນໄລຍະບໍ່ເທົ່າໃດປີ ມາເປັນປະເທດທີ່ມີການເລືອກຕັ້ງປະທານາທິບໍດີ ແບບມີການຄວບຄຸມ ເໝືອນດັ່ງທີ່ມຽນມາເຮັດຢູ່ໃນເວລານີ້ ຄືມີການເລືອກຕັ້ງປະຊາທິປະໄຕທີ່ຖືກຄວບຄຸມ ຊຶ່ງໃນບັດນີ້ ເກົາຫຼີໃຕ້ໄດ້ກາຍມາເປັນປະເທດປະຊາທິປະໄຕທີ່ເຂັ້ມແຂງແລະຢ່າງຄາດບໍ່ເຖິງ."
ທ່ານ Cossa ກ່າວວ່າ ການຢ້ຽມຢາມມຽນມາຄັ້ງນີ້ ຍັງໄດ້ອໍານວຍໃຫ້ ເກົາຫຼີໃຕ້ຊະນະເກົາຫຼີເໜືອ ໃນທາງການທູດແບບທີ່ບໍ່ຄ່ອຍຈະມີນັ້ນ.
ເມື່ອໝໍ່ໆມານີ້ ພຽງຢາງໄດ້ຕົກເປັນຂ່າວໄປທົ່ວໂລກ ຍ້ອນການຂົ່ມຂູ່ຕໍ່ເກົາ ຫຼີໃຕ້ ແລະການຍິງຈະຫລວດທີ່ອອກຂ່າວຢ່າງຄຶກໂຄມ ແຕ່ລົ້ມແຫຼວນັ້ນ.
ການຢ້ຽມຢາມຂອງທ່ານລີຄັ້ງນີ້
ແມ່ນເປັນການຢ້ຽມຢາມຄັ້ງທໍາ
ອິດໂດຍ ປະທານາທິບໍດີເກົາຫຼີ
ໃຕ້ຄົນນຶ່ງ ນັບຕັ້ງແຕ່ປີ 1983
ມາ ເວລາສາຍລັບ ເກົາຫຼີເໜືອ
ວາງລະເບີດໂຈມຕີຜູ້ແທນເກົາ
ຫຼີໃຕ້ຄະນະນຶ່ງທີ່ນໍາໂດບປະ
ທານາທິບໍດີ ຈຸນ ດູ ຮວນ
ໂດຍໄດ້ສັງຫານນັກການທູດ
ເກົາຫຼີໃຕ້ຫຼາຍຄົນ ແຕ່ພາດ
ປະທານາທິບໍດີ ເພາະເກີດ
ລົດຕິດກາງທາງ.
ໃນການຕອບໂຕ້ນັ້ນ ມຽນມາໄດ້ຕັດຄວາມສໍາພັນກັບເກົາຫຼີເໜືອ. ຄວາມສໍາພັນທາງການໄດ້ຮື້ຟື້ນຄືນອີກໃນປີ 2007 ທ່າມກາງຄວາມສົງໄສ ຕ່າງໆນາໆວ່າ ທັງສອງປະເທດມີການຮ່ວມມືທາງທະຫານແລະແມ່ນແຕ່ ນີວເຄລຍນັ້ນ.
ໃນວັນອັງຄານນັ້ນ ທ່ານ ລີ ມຽງ ບັກ ໄດ້ໄປຢ້ຽມຢາມເປັນເວລາສັ້ນໆ ບ່ອນວາງລະເບີດ ຄືສຸສານ Martyr’s Mausoleum ທີ່ເປັນອະນຸສອນສະຖານແດ່ບິດາຂອງທ່ານນາງອອງຊານ ຊູຈີ ຄືທ່ານອອງຊານ ວີລະບຸລຸດເອກະລາດຂອງມຽນມາ.
ທ່ານນາງ Suzanne DiMaggio ເປັນຮອງປະທານ ໂຄງການນະໂຍ ບາຍໂລກ ປະຈໍາມູນນິທິເອເຊຍ ທີ່ມີສໍານັກງານຢູ່ນີວຢ໊ອກ ເວົ້າຜ່ານອິນ ລະບົບ Skype ວ່າ ເຖິງແມ່ນເກົາຫຼີເໜືອຈະເປັນເລຶ່ອງສໍາຄັນ ແຕ່ການຢ້ຽມຢາມຄັ້ງນີ້ໂດຍເບື້ອງຕົ້ນແລ້ວ ແມ່ນສຸມໃສ່ການສົ່ງເສີມຊຸກຍູ້ຄວາມ ສໍາພັນທາງເສດຖະກິດ.
ທ່ານນາງ DiMaggio ເວົ້າວ່າ: "ແນ່ນອນຢູ່ແລ້ວວ່າ ເກົາຫຼີໃຕ້ແມ່ນໄດ້ມີຄວາມສໍາພັນທາງເສດຖະກິດກັບມຽນມາ ມາໄດ້ດົນນານສົມຄວນ ແລະທີ່ຈິງແລ້ວ ກໍເປັນຜູ້ລົງທຶນຕ່າງປະເທດລາຍໃຫຍ່ອັນດັບສີ່ຂອງມຽນມາ ແລະຂ້າພະເຈົ້າແນ່ໃຈວ່າ ຫຼັງຈາກການຢ້ຽມຢາມມຽນມາໃນຄັ້ງນີ້ ພວກເຮົາຈະເຫັນຄວາມສໍາພັນທາງການຄ້າ ແລະການເສດຖະກິດ ເພີ່ມທະວີຂຶ້ນ."
ບໍລິສັດ Daewoo ຂອງເກົາຫຼີໃຕ້ ພວມລົງທຶນຫຼາຍພັນລ້ານໂດລາ ໃນ ມຽນມາ ໂຮມທັງການຂຸດຄົ້ນບໍ່ແກສທໍາມະສາດແຫ່ງນຶ່ງທີ່ຈະສະໜອງຜ່ານ ທໍ່ສົ່ງທີ່ເນັ່ງໄປຍັງຈີນ ທີ່ເປັນຂໍ້ຂັດແຍ້ງກັນນັ້ນ.
ທ່ານນາງ DiMaggio ກ່າວອີກວ່າ ວົງການທຸລະກິດຂອງເກົາຫຼີໃຕ້ນັ້ນ ຈະຕ້ອງມີການຕື່ນຕົວຫຼາຍຂຶ້ນກ່ຽວກັບການເຄຶ່ອນໄຫວທີ່ເຕີບໂຕຂື້ນນັບມື້ພາຍໃນມຽນມາ ເພື່ອທີ່ຈະໄດ້ທໍາການລົງທຶນຢ່າງມີຄວາມຮັບຜິດຊອບ ທັງ ໃນດ້ານສັງຄົມ ແລະສະພາບແວດລ້ອມນັ້ນ.