ລິ້ງ ສຳຫລັບເຂົ້າຫາ

ວິກິດການດ້ານມະນຸດສະທໍາ ເພີ່ມຄວາມຮຸນແຮງຂຶ້ນ ທີ່ມຽນມາ

  • ສິງ ບູຣົມມະວົງ
  • ບົວສະຫວັນ

ນາຍພົນ Than Shwe, ຜູ້ນໍາລັດຖະບານທະຫານມຽນມ້າ

ການຕໍ່ສູ້ກັນທີ່ເພີ່ມທະວີຂຶ້ນນັບມື້ລະຫວ່າງອໍານາດປົກຄອງທະຫານມຽນມ້າ ແລະພວກປະ ຊາຄົມກຸ່ມນ້ອຍ ໄດ້ເຮັດໃຫ້ວິກິດການດ້ານມະນຸດສະທໍາເພີ່ມຄວາມຮຸນແຮງຂຶ້ນ ໃນພາກ ຕາເວັນອອກຂອງມຽນມ້າ. ໃນຂະນະທີ່ປະຊາຊົນໃນຈໍານວນຫລາຍຂຶ້ນ ຕ້ອງໄດ້ຍົກ ຍ້າຍ ໜີຈາກບ້ານເຮືອນໄປ ສູນເສຍການລ້ຽງຊີບແລະລາຍໄດ້. ນາຍແພດຊາວກະຫລ່ຽງຄົນນຶ່ງ ທີ່ເຮັດວຽກໃນໄທເຕືອນວ່າ ການຍົກຍ້າຍທາງດ້ານເສດຖະກິດຂອງປະຊາຊົນຫລາຍພັນຄົນ ຈະສົ່ງຜົນໃຫ້ມີເດັກນ້ອຍຖືກປະຖິ້ມ ໃນຈໍານວນຫລາຍຂຶ້ນ.

ອົງການຈັດ​ຕັ້ງ​ທີ່​ຊື່ວ່າ ​ກຸ່ມ​ປະສົມ​ຊາຍ​ແດ​ນຮ່ວມ​ໄທ​-ມຽນມາ ກ່າວ​ວ່າ ມີ​ປະຊາຊົນ​ຈໍານວນ​ຫລາຍ​ເຖິງ 4​ ແສນ 7 ໝື່ນ​ຄົນ ຕ້ອງໄດ້​ພັດ​ພາກ​ຈາກ​ຖິ່ນ​ຢູ່​ອາ​ໃສ​ ຫລື​ກາຍ​ເປັນ​ອົບ​ພະຍົບ​ພາຍ​ໃນປະ​ເທ​ດ ​ໃນເຂດ​ຊົນນະບົດ​ທາງ​ພາກ​ຕາ​ເວັນ​ອອກ​ຂອງ​ມຽນມາ ຊຶ່ງ​ຈໍານວນທີ່​ເພີ່ມ​ຂຶ້ນ​ນີ້ ​ແມ່ນ​ເນື່ອງ​ມາ​ຈາກ​ການ​ຂັດ​ແຍ້​ງສູ້​ລົບ​ທີ່​ກໍາລັງ​ດໍາ​ເນີນໄປ​ ໃນຂະນະ​ທີ່​ພວກ​ທະຫານ​ຂະຫຍາຍ​ການ​ຄວບ​ຄຸມ​ດ້ານ​ເສດຖະກິດຂອງ​ຕົນ ​ໃນ​ຂົງ​ເຂດ​ດັ່ງກ່າວ.

ອີງ​ຕາມ​ກຸ່ມປະສົມ​ຊາຍ​ແດນ​ຮ່ວມ​ດັ່ງກ່າວ ຂົງ​ເຂດ​ສໍາຄັນ​ທີ່​ໄດ້​ຮັບ​ຜົນ​ກະທົບກໍ​ແມ່ນ​ບັນດາ ​ລັດ​ຫລື​ແຄວ້ນ​ຂອງພວກ​ຊົນ​ເຜົ່າ Shan, ກະຫລ່ຽງ, Karenni ​ແລະ​ເຜົ່າ​ມອນ ໂດຍ​ທີ່​ເວລາ​ນີ້ ມີ​ພວກ​ຊົນ​ເຜົ່າ​ເຫລົ່າ​ນີ້ຈໍານວນ 230 ພັນ​ຄົນ ພາກັນ​ພໍານັກ​ຫລົບ​ໄພຢູ່​ບ່ອນຢູ່ອາ​ໃສ​ຊົ່ວຄາວ​ ໃນ​ຫລາຍໆ​ເຂດຢຸດ​ຍິງ ​ແລະ​ອີກ​ຫລາຍ​ກວ່າ 110 ພັນ​ຄົນ​ພາກັນ​ລີ້​ຊ່ອນ​ຢູ່​ໃນ ​ປ່າດົງ​ຕຶບ​ທີ່​ສອກຫລີກ​ຫ່າງ​ໄກຍ້ອນ​ການ​ຕໍ່ສູ້​ກັນນັ້ນ​. ນອກນີ້ ພວກທີ່​ຖືກ​ບັງຄັບ​ໃຫ້​ໜີ​ອອກ ​ຈາກໝູ່​ບ້ານ​ໄປ ຈໍານວນອີກ 128 ພັນ​ຄົນ ຈໍາ​ເປັນ​ຕ້ອງ​ໄດ້ໄປອາ​ໄສ​ຢູ່​ໃນເຂດ​ທີ່​ທາງ​ການ​ລະບຸ​ວ່າ ​ເປັນ​ເຂດ​ສໍາລັບ​ໃຫ້ຍ້າຍໄປ​ຢູ່​ນັ້ນ.

ການ​ຍົກຍ້ານທາງ​ສັງຄົມ​ທີ່​ວ່າ​ນີ້​ໄດ້​ພາ​ໃຫ້​ປະຊາຊົນ​ໃນ​ຈໍານວນ​ຫລາຍຂຶ້ນ ​ອົບ​ພະຍົບ​ເຂົ້າ​ໄປ​ອາ​ໄສ​ຢູ່​ໃນ​ໄທ ຫລື ສະ​ແຫວ​ງ​ຫາ​ການ​ຮັກສາ​ພະຍາບານທີ່​ຕ້ອງການ​ດ່ວນ​ນັ້ນ​ ທີ່​ສຸກສາລາ​ແຫ່ງ​ນຶ່ງ​ໃນ​ແມ່​ສອດ ​ເມືອງ​ຊາຍ​ແດນ​ຂອງ​ໄທ.

ສຸກສາລາ​ແຫ່ງ​ນີ້​ແມ່ນ​ຢູ່​ພາຍ​ໃຕ້​ການ​ດູ​ແລ​ຂອງ​ທ່ານ​ນາງ Dr. Cynthia Muong ແພດ​ຍິງ ຊາວ​ກະຫລ່ຽງປະ​ຈໍາ​ສຸກສາລາ ຊຶ່ງ​ຜູ້ກ່ຽວ​ໄດ້​ອົບ​ພະຍົບໜີ​ຈາກ​ມຽນມ້າ​ໃນປີ 1988 ​ຕອນ​ທີ່​ຝ່າຍທະຫານ​ທໍາ​ການ​ປາບ​ປາມ​ພວກ​ເດີນ​ຂະ​ບວນປະ​ທ້ວງ​ເພື່ອ​ປະຊາທິປະ​ໄຕ ຊຶ່ງ​ໄດ້ເຮັດ​ໃຫ້ຫລາຍ​ພັນ​ຄົນເສຍ​ຊີວິດ ​ແລະ​ບາດ​ເຈັບ ແລະ​ເຮັດ​ໃຫ້​ປະຊາ ຊົນ​ໃນ​ຈຳນວນ​ຫລາຍ​ກວ່າ​ນັ້ນ ພາກັນ ຫລັ່ງ​ໄຫລ​ເຂົ້າ​ໄປ​ຍັງ​ໄທ​ ໃນ​ຖານະ​ອົບ​ພະຍົບ ຊຶ່ງ​ທ່ານໝໍ Muong ກ່າວ​ຊີ້ແຈງ​ວ່າ:

“ພວກທະຫານສືບຕໍ່ເສີມຂະຫຍາຍກໍາລັງຂອງພວກເຂົາຢູ່​ໃນ ບັນດາແຄວ້ນທີ່​ມີ ຊົນເຜົ່າຕ່າງໆ ແລະ ຈາກນັ້ນກໍລົງມື​ເຮັດອັນທີ່ ເອີ້ນວ່າໂຄງການພັດທະນາ, ເຊັ່ນ ສ້າງຂົວ ແລະເຂື່ອນໄຟຟ້ານ້ຳຕົກ. ຢູ່​ບ່ອນໃດມີການພັດທະນາໃໝ່ ທີ່ນັ້ນກໍ​ແມ່ນ ຈະມີການຍົກຍ້າຍປະຊາຊົນ ​ຢ່າງ​ຂະໜານໃຫຍ່. ສະນັ້ນ ພວກເຮົາຈຶ່ງມີຄວາມ ເປັນຫ່ວງຫລາຍວ່າ ຖ້າຫາກພວກທະຫານຍັງສືບຕໍ່ກຳອຳນາດຢູ​ຕໍ່​ໄປ ກໍຈະມີການ ຍ້າຍຖິ່ນຖານຂອງປະຊາຊົນເພີ້ມຫລາຍຂຶ້ນ ​ແລະມີວິກິດການດ້ານມະນຸດສະທໍາ ຢູ່ເຂດຊາຍແດນຫລາຍ ກວ່າເກົ່າ.”

ໃນ​ປັດຈຸບັນ​ ສຸກ​ສາລາ​ແຫ່ງ​ນີ້​ໃຫ້ການ​ປິ່ນປົວ​ພວກ​ຄົນ​ເຈັບ​ ​ຫລາຍ​ກວ່າ 1 ​ແສນ​ຄົນຕໍ່​ປີ ​ແລະ​ຈໍານວນ​ຂອງ​ການ​ຮັກສາພະຍາບານ ​ກໍາລັງ​ເພີ່ມ​ຂຶ້ນ 20 ​ເປີ​ເຊັນ​ໃນ​ແຕ່ລະ​ປີ ອັນ​ເປັນ​ຮ່ອງຮອຍ​ທີ່​ສະ​ທ້ອນໃຫ້​ເຫັນເຖິງ ຈໍານວນ​ພວກຜູ້​ຄົນ​ທີ່​ຖືກ​ຍົກຍ້າຍພາຍ​ໃນ​ປະ​ເທດ ​ແລະ​ລະບົບ​ການ​ຮັກສາ​ສຸຂະພາບ​ບໍ່​ດີຂອງ​ມຽນມ້າ.

ສຸກສາລາ​ດັ່ງກ່າວ​ໄດ້​ຮັບ​ພວກ​ຄົນ​ເຈັບ​ ​ທີ່​ເປັນໂຣກ AIDS ຫລື​ຕິດ​ເຊື້ອ​ໄວຣັສ HIV ທີ່​ພາ​ໃຫ້​ເປັນ​ໂຣກ​ເອດ​ສ໌ນັ້ນ ໃນ​ຈໍານວນ​ຫລາຍ​ຂຶ້ນ​ແລະ​ໃນ​ຂະນະ​ດຽວ​ກັນ​ ພວກເມ່ຍິງ​ຖືພາ​ມານ​ ຈໍານວນ​ຫລາຍ​ເຖິງ 8 ​ເປີ​ເຊັນ ​ເປັນໂຣກຕັບ​ອັກ​ເສບ​ປະ​ເພດ ‘B” ​ຊຶ່ງ​ Dr. Cynthia Muang ​ກ່າວ​ວ່າ​ ຮ້າຍ​ແຮງ​ເຖິງ​ຂັ້ນ​ລະບາດ​ແລ້ວ​ນັ້ນ.

ນອກ​ນີ້​ແລ້ວ ປະຊາ​ຄົມ​ໃນ​ເມືອງ​ແມ່​ສອດ​ແຫ່ງ​ນີ້​ຍັງເບິ່ງ​ແຍງ​ພວກ​ເດັກນ້ອຍ​ທີ່​ຖືກ​ປະຖິ້ມ ​ທີ່ມີ​ຫລາຍ​ຂຶ້ນນັບ​ມື້​ເຊັ່ນ​ກັນ. ສຸກສາລາແຫ່ງ​ນີ້ແລະ​ເຄືອ​ຂ່າຍ​ຂອງ​ໂຮງຮຽນປະຊາ​ຄົມ 62 ​ແຫ່ງ​ ​ໃຫ້ການສິດສອນ​ແກ່​ເດັກນ້ອຍ​ຈໍານວນ 12 ພັນ​ຄົນ​ຂອງພວກ​ແຮງ​ງານ​ຍ້າຍ​ຖິ່ນຕາມ ລະດູ ການ​ແລະ​ພວກ​ອົບ​ພະຍົບທີ່​ອາ​ໄສ​ຢູ່ໃນ​ເຂດຈັງຫວັດ​ແມ່​ສອດ. Dr. Muang ກ່າວ​ ວ່າ ​ເວລາ​ທີ່ພວກພໍ່​ແມ່​ສູນ​ເສຍ​ວຽກ​ງານ​ທໍາ​ມາຫາ​ລ້ຽງ​ຊີບນັ້ນ ພວກ​ເດັກນ້ອຍກໍຖືກ​ປະ​ຖິ້ມ ໄວ້ເບື້ອງ​ຫລັງ ຊຶ່ງ Dr. Muang ອະທິບາຍ​ດັ່ງ​ນີ້:

“ຍ້ອນວ່າ ພວກເຂົາເຈົ້າບໍ່ມີອາຊີບທີ່ດີກວ່າເກົ່າ ແລະ ບໍ່ມີຊີວິດການເປັນຢູ່ທີ່ດີຂຶ້ນ. ສະ ນັ້ນ ພວກເຮົາຈຶ່ງ​ໄດ້ເຫັນວ່າມີເດັກນ້ອຍ ທີ່ຖືກພໍ່ແມ່ປະຖິ້ມນັ້ນ ​ໃນ​ຈໍານວນ ຢ່າງຫລວງຫລາຍ. ມີເດັກນ້ອຍຫລາຍຂຶ້ນນັບມື້ ທີ່ເຂົ້າມາປະເທດໄທໂດຍບໍ່ມີພໍ່ ແມ່ມານຳ ແລະ ເດັກນ້ອຍ​ຫລາຍ​ຄົນ ຖືກປະ​ຖີ້ມ​ໄວ້ໃນໂຮງໝໍ. ບາງຄົນໄດ້ໄປ​ ອອກລູກແລ້ວຫລັງ ຈາກນັ້ນກໍໜີໄປ ໂດຍປະລູກໄວ້ໃນໂຮງໝໍ.”

ນອກ​ນັ້ນ​ແລ້ວ ກໍ​ຍັງ​ມີ​ການ​ປະ​ຖິ້ມພວກ​ເດັກນ້ອຍໄວ້​ທີ່​ສຸກສາລາ​ເຊັ່ນ​ກັນ​ ໃນ​ຕອນ​ທີ່​ພໍ່​ແມ່​ພາ​ເຂົາ​ໄປສັກ​ຢາ​ປ້ອງ​ກັນ​ໂຣກ ຫລື​ເວລາ​ມາ​ຮ່ວມ​ໃນ​ການວາງ​ແຜນ​ຄອບຄົວ. ບາງ​ເທື່ອ ​ເດັກ ນ້ອຍກໍ​ຖືກ​ປະ​ຖິ້ມ​ໄວ້​ຢູ່​ໂຮງຮຽນ​ ຊຶ່ງ Dr Muang ກ່າວ​ວ່າ ເປັນ​ສິ່ງ​ທີ່​ສະ​ແດງ​ໃຫ້​ເຫັນ​ຢ່າງ ຈະແຈ້ງ​ເຖິງ​ວິ​ກິດ​ການ​ດ້ານ​ມະນຸດສະ​ທໍາ ຢູ່​ໃນ​ເຂດ​ຊາຍ​ແດນ​ນັ້ນ.

Dr. Muang ຍັງມີ​ຄວາມ​ຮູ້ສຶກ​ໃນ​ແງ່​ທີ່ບໍ່​ດີ​ ກ່ຽວ​ກັບ​ອະນາຄົດ​ຂອງ​ມຽນມາ ​ເຖິງ​ແມ່ນຈະ​ມີ​ ການ​ຈັດການເລືອກ​ຕັ້ງ​ສະພາ​ຂຶ້ນ​ໃນ​ປະ​ເທດ​ໃນ​ເດືອນ​ພະຈິກ​ປີ​ນີ້​ ກໍ​ຕາມ.

ບັນດາ​ນັກວິ​ເຄາະ​ຄາດ​ວ່າ ກອງທັບ​ຈະ​ຍັງມີ​ອໍານາດ​ຄວບ​ຄຸມ​ລັດຖະບານ​ພົນລະ​ເຮືອນ​ຢູ່​ຕໍ່​ໄປ​ ​ໂດຍ​ມີ​ການ​ຄາດ​ຄະ​ເນ​ກັນ​ວ່າ ພັກ​ທີ່​ໄດ້​ຮັບ​ການ​ໜຸນຫລັງ​ຈາກ​ພວກ​ທະຫານ​ ຈະ​ກໍາ​ສຽງ​ສ່ວນ​ຫລາຍ​ຢູ່​ໃນ​ສະພາ​ຊຸດ​ໃໝ່​. ພວກ​ນັກວິ​ເຄາະ​ກ່າວ​ວ່າ ຄວາມ​ຈິງ​ແລ້ວ ພວກ​ທະຫານ​ມີ ​ບ່ອນ​ນັ່ງ​ທີ່​ຮັບປະກັນ​ໄວ້​ໃຫ້​ພວກ​ເຂົາ​ເຈົ້າ​ແລ້ວ ​ຢູ່​ໃນ​ສະພາ​ນັ້ນ.

D​r. Muang ກ່າວ​ວ່າ ຜົນ​ຂອງ​ການ​ເລືອກ​ຕັ້ງ​ ທີ່​ມີ​ພວກ​ທະຫານ​ກໍາບົດບາດ​ນໍາພາ​ໃນ​ ຄະນະ​ລັດຖະບານ​ຊຸດ​ຕໍ່​ໄປ​ນັ້ນ ​ມີ​ທາງຈະ​ຍັງ​ຜົນ​ເຮັດ​ໃຫ້​ມີ​ການ​ຂັດ​ແຍ້​ງສູ້​ລົບກັນຫລາຍ​ຂຶ້ນ​ອີກ ໃນ​ຂົງ​ເຂດ​ຊາຍ​ແດນນັ້ນ ຊຶ່ງ​ຈະ​ເປັນ​ການເຮັດ​ໃຫ້ວິ​ກິດ​ການ​ທີ່ມີ​ຢູ່​ແລ້ວ ​ເພີ້ມທະວີ​ຮ້າຍ​ແຮງ​ຍິ່ງຂຶ້ນໄປ​ອີກ​.

XS
SM
MD
LG