ລັດຖະບານມຽນມາໄດ້ອະນຸຍາດໃຫ້ສະຫະປະຊາຊາດສົ່ງການຊ່ອຍເຫຼືອດ້ານມະນຸດ
ສະທໍາ ຮອບທີສອງ ໄປຍັງຂົງເຂດທີ່ຢູ່ພາຍໃຕ້ການຄວບຄຸມຂອງພວກກະບົດໃນລັດ
ກະຈິ່ນໃນພາກເໜືອຂອງປະເທດ. ແຕ່ສະຫະປະຊາຊາດກ່າວວ່າ ການຊ່ອຍເຫຼືອທີ່ວ່າ
ນີ້ ຍັງບໍ່ພຽງພໍກັບຄວາມຕ້ອງການຢ່າງຫຼວງຫຼາຍສໍາລັບພວກອົບພະຍົບຫຼາຍໝື່ນ
ຄົນທີ່ ພາກັນຫລົບໜີຈາກການສູ້ລົບກັນລະຫວ່າງກອງທັບມຽນມາແລະພວກກະບົດ
ຊົນເຜົ່າກະຈິ່ນນັ້ນ.
ສະຫະປະຊາດໄດ້ຮັບອະນຸຍາດ ໃຫ້ສົ່ງຂະບວນລົດບັນທຸກການຊ່ອຍເຫຼືອດ້ານມະນຸດ
ສະທໍາຮອບສອງໃນເຊົ້າວັນຈັນມື້ນີ້ ສໍາລັບປະຊາຊົນໃນຂົງເຂດທີ່ຢູ່ພາຍໃຕ້ການຄວບ
ຄຸມຂອງພວກກະບົດໃນລັດກະຈິ່ນຂອງມຽນມານັ້ນ.
ພວກລົດບັນທຸກເຫຼົ່ານີ້ ໄດ້ຂົນເຄື່ອງສໍາລັບປຸກສ້າງບ່ອນຢູ່ອາໄສຊົ່ວ ຄາວແລະເຂົ້າປາ
ອາຫານແລະເຄື່ອງຢຸກຢາປົວພະຍາດ ພຽງພໍທີ່ຈະກຸ້ມໄດ້ປະມານ 1 ເດືອນ ສໍາລັບ
ອົບພະຍົບຈໍານວນ 2,200 ຄົນ.
ຂະບວນລົດຊ່ອຍເຫຼືອອີກຊຸດຂອງສະຫະປະຊາຊາດ ໄດ້ໄປເຖິງໃນວັນເສົາຜ່ານມານີ້
ຊຶ່ງບັນທຸກເຄື່ອງຊ່ອຍເຫຼືອພຽງພໍ ສໍາລັບອົບພະຍົບ 1,100 ຄົນ.
ນັບວ່າເປັນພຽງເທື່ອທີສອງເທົ່ານັ້ນ ທີ່ລັດຖະບານມຽນມາໄດ້ອະນຸຍາດໃຫ້ການຊ່ອຍ
ເຫຼືອຂອງນາໆຊາດເຂົ້າໄປຍັງຂົງເຂດທີ່ຢູ່ພາຍໃຕ້ການ ຄວບຄຸມຂອງອົງການເພື່ອເອ
ກະລາດຂອງຊົນເຜົ່າກະຈິນ ແລະມີຂຶ້ນພາຍຫຼັງຖືກກົດດັນຂຶ້ນເລື້ອຍໆຈາກນາໆຊາດ.
ທ່ານ Aye Win ໂຄສົກສະຫະປະຊາຊາດໃນກຸງຢ້າງກຸ້ງ ກ່າວວ່າ ການຊ່ອຍເຫຼືອນີ້ ບໍ່
ພຽງພໍ ຊຶ່ງທ່ານກ່າວວ່າ ຢ່າງໜ້ອຍມີອົບພະຍົບຫລາຍເຖິງ 50 ພັນຄົນ ແລະຕ້ອງ
ການການຊ່ອຍເຫຼືອທີ່ຍືນຍົງ.
ພວກຊາວບ້ານຈໍານວນຫຼາຍເຖິງ 75 ພັນຄົນພາກັນຫລົບໜີຈາກການສູ້ລົບ ທີ່ພວມ
ດໍາເນີນໄປລະຫວ່າງກອງທັບມຽນມາແລະກະບົດຊົນເຜົ່າກະຈິ່ນ ທີ່ໄດ້ລະເບີດຂຶ້ນ
ໃນເດືອນມິຖຸນາປີຜ່ານມາ ເຮັດໃຫ້ການຢຸດຍິງກັນ ມາໄດ້ 17 ປີ ສິ້ນສຸດລົງ.
ພວກຊາວບ້ານອົບພະຍົບເຫຼົ່ານີ້ ໄດ້ພາກັນລຸລັ່ງເຂົ້າໄປໃນໂບດແລະຕັ້ງຄ້າຍອົບພະ
ຍົບຕູບຜ້າໃບຂຶ້ນ ຢູ່ເລາະຕາມຊາຍແດນຕິດກັບຈີນນັ້ນ.
ທາງການມຽນມາໄດ້ອະນຸຍາດໃຫ້ການຊ່ອຍເຫຼືອຂອງນາໆຊາດເຂົ້າໄປໃນຂົງເຂດ
ຕ່າງໆທີ່ຢູ່ພາຍໃຕ້ການຄວບຄຸມຂອງຝ່າຍລັດຖະບານ ແລະຜ່ານມາແມ່ນໄດ້ອະນຸ
ຍາດໃຫ້ສົ່ງການຊ່ອຍເຫຼືອແຕ່ພຽງແຕ່ຄັ້ງດຽວເທົ່ານັ້ນ ໄປຍັງເຂດແດນຂອງຝ່າຍກະ
ບົດ ໃນເດືອນທັນວາປີແລ້ວນີ້.