ລິ້ງ ສຳຫລັບເຂົ້າຫາ

ບັນດານັກເຄຶ່ອນໄຫວມຽນມາ ພິຈາລະນາວ່າ ຈະກັບຄືນເມືອບ້ານ ຫລືບໍ່ (ເບິ່ງວີດີໂອລາວ/ອັງກິດ)

  • ທອງປານ ເທບວົງສາ

ນາງ Khin Ohmar ນັກເຄຶ່ອນໄຫວພັດຖິ່ນຊາວມຽນມາ ທີ່ອາໃສຢູ່ໃນ ປະເທດໄທມາໄດ້ 23 ປີ ກ່າວກ່ຽວກັບການກັບຄືນບ້ານ

​ໃນ​ລະຫວ່າງ​ການ​ກົດ​ຂີ່​ປາບ​ປາມ​ທາງ​ການ​ເມືອງເປັນ​ເວລາ​ຫລາຍສິບ​ປີ​ ​ໃນ​ມຽນມານັ້ນ ພວກ​ທີ່​ເຄື່ອນ​ໄຫວຄັດຄ້ານ​ລັດຖະບານ​ຫລາຍ​ຄົນ ​ໄດ້​ພາກັນ​ຫລົບໜີ​ອອກ​​ໄປຢູ່ນອກປະ​ເທດແລະ ດໍາລົງຊີວິດ​ພັດ​ຖິ່ນ​ຢູ່​ຕ່າງ​ແດນ ​ໃນ​ຂະນະ​ປະຕິບັດ​ງານ​ເພື່ອ​ໃຫ້​ມີ​ການປ່ຽນ​ແປງ​​ໄປ​ສູ່ປະຊາທິ ປະ​ໄຕພາຍ​ໃນ​ປະ​ເທດ. ​​ໃນ​ຮອບ​ປີຜ່ານມາ​ນີ້ ມຽນມາໄດ້​ດໍາ​ເນີນ​ກາ​ນປະຕິ​ຮູບທາງ​ການ​ເມືອງ​ຫລາຍ​ຢ່າງ ແຕ່​ຫລາຍໆ​ຄົນກໍ​ຍັງ​ລັງ​ເລ​ໃຈ​ທີ່​ຈະ​ກັບ​ຄືນ​ເມືອ​ບ້ານ ຜູ້​ສື່​ຂ່າວ​ວີ​ໂອ​ເອ Steve Sandford ​ໄດ້​ໂອ້ລົມ​ກັບ​ພວກ​ນັກ​ເຄື່ອນ​ໄຫວ​ຊາວ​ມຽນມາ​ ທີ່​ອາ​ໃສ​ຢູ່​ທາງ​ພາກ​ເໜືອ​ຂອງ​ໄທ ຊຶ່ງ​ທອງ​ປານມີ​ລາຍ​ລະອຽດ​ຂອງເລຶ່ອງນີ້ ​ມາສະ​ເໜີ​ທ່ານ​.

ເບິ່ງວີດີໂອພາສາລາວ:

ການກວາດ​ລ້າງ​ທາງ​ການ​ເມືອງ​ໄດ້​ເປັນສິ່ງ​ທີ່ ຄັ້ງ​ນຶ່ງ​ ຊີ້​ບອກພາບພົດຂອງລັດຖະບານ​ທະ
ຫານ​ມຽນມາ​ທີ່ມີ​ຊື່​ສຽງ​ບໍ່​ດີນັ້ນ. ຄື​ນັບ​ຕັ້ງ​ແຕ່​ປີ 1988 ​ເປັນ​ຕົ້ນມາ ພົນລະ​ເຮືອນຫລາຍ​
ພັນ​ຄົນ​ຖືກ​ຂ້າ​ຕາຍ ຫລື​ບໍ່​ຖືກຈັບ​ເຂົ້າ​ຄຸກ. ຫລາຍໆ​ຄົນ​ໄດ້​ຫລົບໜີ​ອອກ​ໄປ​ຢູ່​ນອກ​ປະ​ເທດ.

ນັກ​ເຄື່ອນ​ໄຫວ ຄິນ ​ໂອ​ມາ ​ໄດ້​ອາ​ໃສ​ພັດ​ຖິ່ນ​ຢູ່​ໃນ​ປະ​ເທດ​ໄທ​ ມາ​ໄດ້ 23 ປີ​ແລ້ວ ​ແລະ​ກ່າວ​ວ່າ
ນາງຍັງ​ບໍ່​ພ້ອມ​ທີ່​ຈະ​ກັບ​ຄືນ​ປະ​ເທດ​.

“​ແທ້ໆ​ແລ້ວ​ ຂ້ອຍ​ກໍ​ຢາກ​ມີ​ສ່ວນ​ໃນ​ຂັ້ນ​ຕອນ​ໃນການ​ຊຸກ​ຍູ້ການ​ດໍາ​ເນີນ​ງານ​ຫັນ​ປ່ຽນ
​ໄປ​ສູ່​ປະຊາທິປະ​ໄຕ​ຢ່າງ​ແທ້​ຈິງ ​ແຕ່​ມັນ​ກໍ​ຍັງຍາກ​ທີ່​ຈະ​ຮູ້ໄດ້​ວ່າ​ມັນ​ເປັນ​ເວລາ​ທີ່​ເໝາະ
​ສົມ​ຫລື​ບໍ່​ ທີ່​ຈະ​ກັບ​ຄືນ​ປະ​ເທດ​ໃນ​ຕອນ​ນີ້. ຄື ຖ້າຫາກ​ພວກ​ເຮົາ​ເວົ້າຫຍັງ​ທີ່​ພວກ​ເຂົາ
​ເຈົ້າບໍ່​ພໍ​ໃຈ​ແລ້ວ ພວກ​ເຮົາ​ກໍ​ຍັງຈະໄດ້​ຮັບ​ຄວາມເດືອດຮ້ອນ​ໄດ້ຢູ່. ລັດຖະບານ​ຈະ​ຕ້ອງ​
ມີ​ນະ​ໂຍບາຍ​ທີ່​ແຈ້ງ​ຂາວວ່າ ມີ​ການ​ນິລະ​ໂທດ​ກໍາ​ໂດຍ​ທົ່ວ​ໄປ​ ໃຫ້​ແກ່​ພວກ​ເຮົາ​ທັງ​ໝົດ
​ທີ່​ອາ​ໃສ​ຢູ່​ໃນຕ່າງ​ແດນ​ ທີ່ຄໍ້າປະກັນຄວາມ​ປອດ​ໄພໃຫ້​ພວກ​ເຮົາ​.”

​ໃນ​ປີ 1988 ນັກ​ສຶກສາ​ທີ່​ເປັນ​ນັກ​ເຄຶ່ອນ​ໄຫວ ຊາ​ລາຍ ຢໍ ອອງ ​ເປັນ​ຜູ້ບັນຊາການ​ກໍາລັງ​ກະບົດ​ ສູ້​ລົບ​ກັບ​ທະຫານ​ລັດຖະບານ​ມຽນມາ. ​ໃນ​ໄລຍະ ຫລາຍໆ​ປີ​ຕໍ່​ມານັ້ນ ພໍ່​ແລະ​ອ້າຍ​ນ້ອງ​ຂອງ​ລາວຖືກ​ຈັບ​ເຂົ້າຄຸກ ຍ້ອນ​ກິດຈະ ກໍາ​ທາງ​ການ​ເມືອງ​ຂອງ​ພວກ​ເຂົາ​ເຈົ້າ ທີ່​ເຮັດ​ໃຫ້ ຊາ​ລາຍ ຍັງ​ມີ​ຄວາມ​ຊົງ​ຈໍາ​ອັນ​ຂົມ​ຂື່ນ ​ຢູ່​ຕະຫລອດ​ມາ.

“ພໍ່​ຂອງ​ຂ້ອຍ​ຖືກ​ເລືອກ​ຕັ້ງ​ເປັນ ​ສສ ​ໃນ​ປີ 1990 ສັງກັດ​ພັກ​ສັນນິບາດ​ແຫ່ງຊາດ​ເພື່ອ​
ປະຊາທິປະ​ໄຕ ຫລື NLD. ລາວເສຍ​ຊີວິດ​ຢູ່​ໃນ​ຄຸກໃນປີ 1998. ລາວໄດ້​ຖືກ​ຈັບ ​ແລະ
​ຖືກ​ຕັດສິນ​ຈໍາຄຸກ​ 11 ປີ. ​ເຈົ້າໜ້າ​ທີ່​ເຮືອນ​ຈໍາ​ທໍລະມານ​ລາວ.”

ການ​ພັດ​ຖິ່ນເປັນ​ເວລາ​ຫລາຍ​ປີ ​ໝາຍ​ເຖິງ​ການ​ປ່ຽນ​ແປງ​ຢ່າງ​ໃຫຍ່​ຫລວງ. ຫລາຍໆ​ຄົນ​ໄດ້​ສ້າງ​ຕັ້ງ​ຄອບຄົວ​ ແລະ​ກໍ​ເຖົ້າ​ແກ່​ຊະລາ​ຂຶ້ນ ​ໂດຍ​ທີ່​ບໍ່​ມີ​ໂອ ກາດ​ໄດ້ກັບ​ເມືອ​ເຫັນ​ບ້ານ​ເກີດ​ເມືອງ​ນອນ​ຂອງ​ພວກ​ເຂົາ​ເຈົ້າ. ນາຍ​ຊາ​ລາຍ ກ່າ​ວວ່າ ​ເຖິງ​ແມ່ນຄອບຄົວ​ຂອງ​ລາວ​ໄດ້​ເຮັດ​ໃຫ້​ລາວ​ມີ​ຄວາມ​ລະມັດລະວັງ​ຫລາຍຂຶ້ນ ​ແຕ່​ລາວ​ກໍ​ຍັງ​ມຸ້ງ​ໝັ້ນ​ນໍາ​ການ​ຕໍ່ສູ້​ຂອງ​ລາວຢູ່.

“ບັດ​ນີ້​ ຊີວິດ​ຂອງ​ຂ້ອຍ​ໄດ້​ປ່ຽນ​ແປງ​ໄປ​ແລ້ວ​ເພາະວ່າ​ຂ້ອຍ​ກັບ​ເມຍ​ມີ​ລູກ​ຄົນ​ນຶ່ງ. ​ແຕ່
​ກ່ອນນັ້ນ​ ຂ້ອຍ​ບໍ່ຫ່ວງ​ຫຍັງ​ໝົດ ສິ່ງ​ໃດ​ທີ່​ຢາກ​ເຮັດ ຂ້ອຍ​ກໍ​ຈະ​ເຮັດ​ຈະ​ທໍາ ​ແຕ່ບັດ​ນີ້ ​
ຂ້ອຍ​ຕ້ອງ​ຄິດ​ເຖິງ​ອະນາຄົດ​ຂອງ​ລູກ​ຊາຍ ລູກ​ກັບ​ເມຍ​ຂ້ອຍ​ຈະ​ເຮັດ​ຢ່າງ​ໃດ ​ຖ້າຂ້ອຍ
​ຕາຍ​ໄປ. ດັ່ງ​ນັ້ນ​ຂ້ອຍ​ຕ້ອງ​ຄິດ ​ແຕ່​ຂ້ອຍ​ກໍ​ຍັງເຮັດ​ວຽກ​ເຄື່ອນໄຫວ​ເພື່ອ​ປະຊາທິປະ​ໄຕ​ຢູ່.”

ນາຍ​ຊາ​ລາຍ ກ່າວ​ວ່າ ຕົນ​ຍັງ​ລໍຖ້າ​ເບິ່ງ​ຢູ່ ກ່ອນ​ທີ່​ຈະ​ຕັດສິນ​ໃຈວ່າ ຈະພາ​ຄອບຄົວ ກັບ​ຄືນໄປ​ຢູ່​ປະ​ເທດ​ບ້ານເກີດ​ ​ນັ້ນ​ຫລື​ບໍ່? ​ເວລາ​ນີ້ ​ພວກ​ເຮົາ​ຍັງ​ບໍ່​ມີ​ສັນຕິພາບ​ເທື່ອ​ດອກ. ບາງ​ຄົນ​ກໍ​ເວົ້າວ່າ​ຫລາຍ​ສິ່ງ ຫລາຍ​ຢ່າງ​ໄດ້​ປ່ຽນ​ແປງ​ໄປ​ແລ້ວ​ຢູ່​ໃນ​ມຽນມາ ​ແຕ່​ຂ້ອຍ​ຍັງ​ບໍ່​ຖື​ວ່າ​ເປັນ​ການ ປ່ຽນ​ແປງ​ທີ່​ແທ້​ຈິງ ​ເຮົາ​ຕ້ອງ​ລໍຖ້າ​ເບິ່ງ​ໄປນີ້​ຫລະ.

ສໍາລັບ​ຄວາມ​ຮູ້ສຶກ​ຂອງ​ນາຍ ຊາ​ລາຍ ​ແລະຄົນ​ອື່ນໆອີກ​ຫລາຍ​ຄົນແລ້ວ ມຽນມາ​ແມ່ນ​ຍັງ​ບໍ່​ໄດ້​
ປ່ຽນ​ແປງ​ຫລາຍ​ ພໍ​ທີ່ພວກ​ຕົນ​ຈະ​ກັບ​ຄືນ​ເມືອ ເທື່ອ.

ເບິ່ງວີດີໂອພາສາອັງກິດ:

XS
SM
MD
LG