ລິ້ງ ສຳຫລັບເຂົ້າຫາ

ບັນດາຜູ້ນໍາສາສະໜາ ຫາທາງແກ້ໄຂ ບັນຫາ ການກ່າວຄໍາເຫັນ ທີ່ຍຸຍົງ ໃຫ້ຊັງກັນ ໃນມຽນມາ (ວີດິໂອ)


ພະອາຈານ Wirathu (ກາງ), ຜູ້ນໍາຂະບວນການ 969 ກ່າວສະບາຍດີຕໍ່ພະອົງອື່ນໆ ໃນຂະນະທີ່ເຂົ້າຮ່ວມກອງປະຊຸມ ດ້ານກົດໝາຍປົກປ້ອງຊາດ ທີ່ວັດຢູ່ນອກນະຄອນຢ່າງກຸ້ງ ໃນວັນທີ 27 ມິຖຸນາ 2013.
ວາລະສານ Time ສະບັບອອກໃນອາທິດແລ້ວນີ້ ຊຶ່ງ​ໄດ້ລົງ
ຂ່າວໜ້າປົກ ທີ່ມີຮູບຂອງພະອາຈານ Wirathu, ຄູບາທີ່ກໍາ
ລັງຢູ່ໃນການພິຈາລະນາຂອງນາໆຊາດວ່າ ​ເປັນ​ຜູ້ເຜີຍແຜ່​ປຸກລະດົມທີ່ຍຸແຍ່ໃຫ້ກຽດຊັງພວກມຸສລິມນັ້ນ ໄດ້ຖືກຫ້າມບໍ່​
ໃຫ້ຈໍາໜ່າຍຢູ່ໃນມຽນມາ.

ຄໍາເວົ້າທີ່ພາໃຫ້ກຽດຊັງກັນທີ່ເຜີຍແຜ່ຢູ່ໃນອິນເຕີແນັດ ແລະ
ໃນຄໍາເທດສະໜາຂອງຄູບາອົງ​ນີ້ ພາໃຫ້ເກີດການກໍ່ຄວາມ
ຮຸນແຮງທາງສາສະໜາ ແລະລັດຖະບານ ໄດ້ເຮັດໜ້າທີ່ຮັບ
ຜິດຊອບຂອງຕົນ ຢ່າງເຕັມສ່ວນໃນການຮັບມື ກັບການເຜີຍ
ແຜ່ຄໍາເວົ້າທີ່ພາໃຫ້ເກີດຄວາມກຽດຊັງກັນ​ເຫຼົ່ານີ້ ບໍ່? ນັກຂ່າວ
ວີໂອເອມີລາຍງານເລື້ອງນີ້ມາຈາກນະຄອນຢ້າງກຸ້ງ ຊຶ່ງບົວສະ
ຫວັນ ຈະ​ນຳ​ມາສະ​ເໜີ​ທ່ານ ​ໃນ​ອັນ​ດັບ​ຕໍ່​ໄປ.


ມຽນມາຫາກໍ່ຍຸຕິການກວດກາການພິມຂ່າວຕ່າງໆ ຂອງສື່ມວນຊົນ ເມື່ອໝໍ່ໆມານີ້ ແຕ່ເມື່ອ
ວາລະສານ Time ທີ່ລົງຂ່າວໜ້າປົກກ່ຽວ​ກັບລາຍລະ ອຽດ​ໃນ​ການ​ປຸກລະດົມ​ໃຫ້​ກຽດຊັງ
ຊາວມຸສລິມຂອງພະອາຈານ Wirathu ທີ່ມີອິດທິພົນສູງນັ້ນ ວາລະສານສະບັບດັ່ງກ່າວ
ກໍໄດ້ຖືກເກືອດຫ້າມເພາະວ່າກະຊວງຖະແຫລງຂ່າວຂອງມຽນມາຢ້ານວ່າ ມັນອາດ​ຍຸຍົງ
ໃຫ້ມີການກໍ່ຄວາມຮຸນແຮງເພີ້ມຂຶ້ນ.

ນັບແຕ່ເດືອນມິຖຸນາປີກາຍນີ້​ເປັນຕົ້ນມາ ເຫດການກໍ່ຄວາມຮຸນແຮງຕໍ່ຕ້ານຊາວ​ມຸສລິ​ມ
ຫ້າ​ຄັ້ງ​ໃນ​ທົ່ວ​ປະ​ເທດ ເຮັດ​ໃຫ້​ມີ​ຜູ້​ເສຍ​ຊີວິດ​ຈຳນວນນຶ່ງ ແລະຫລາຍ​ກວ່າ 1 ແສນ 5 ໝື່ນ
ຄົນຕ້ອງ​ໄດ້ອົບພະຍົບຫລົບໜີ ຈາກເຮືອນຊານບ້ານ​ຊ່ອງຂອງຕົນ.

ຢູ່ໃນການຝຶກອົບຮົມທີ່ປ້ອງກັນບໍ່ໃຫ້ມີການເວົ້າຍຸແຍ່ໃຫ້ກຽດຊັງກັນ ຢູ່ໃນມຽນມາ ​ເມື່ອ
ວັນສຸກຜ່ານມານັ້ນ ເອກອັກຄະລັດຖະທູດສະຫະລັດ ທ່ານ Derek Mitchell ກ່າວໃນ
ຄໍາປາໄສ ໃນພິທີເປີດການຝຶກອົບຮົມ ທີ່ທ່ານ ເວົ້າວ່າ ຄວາມສາມາດຂອງລັດຖະບານ ໃນການຮັບມືກັບການປຸກລະດົມ ຫຼືໃຊ້ຄໍາເວົ້າຍຸແຍ່ໃຫ້ກຽດຊັງກັນ ຈະເປັນການກຳນົດ
ອະນາຄົດຂອງປະເທດແລະໄດ້ເຕືອນກ່ຽວ​ກັບການໃຊ້ຄໍາເວົ້າ​ເພື່ອຍຸແຍ່ໃຫ້ກຽດຊັງ
ກັນເກີນຄວາມສາມາດຄວບຄຸມໄດ້ ຈະຍຸຍົງໃຫ້ເກີດຄວາມຮຸນແຮງ.

ເບິ່ງວີດິໂອກ່ຽວກັບຂ່າວນີ້:




ທ່ານ Mitchell ​ເວົ້າວ່າ “ປະເທດນີ້ ມີສົງຄາມກັບຕົນເອງ. ໄດ້ຫລາຍທົດສະ
ວັດມາແລ້ວ ການເວົ້າລົມກັນໄດ້ກາຍເປັນນຶ່ງ ໃນສັດຕູ ຢູ່ພາຍໃນຕົວ. ນິໄສ
ອັນນີ້ ​ແມ່ນເປັນສາເຫດອັນ​ສຳຄັນ ທີ່ພາໃຫ້ປະ​ເທດ​ນີ້ ບໍ່​ໄດ້​ຮັບການພັດ
ທະນາ. ໃນນາມທີ່ເປັນຜູ້ສັງເກດການທີ່ໃກ້ຊິດທີ່ມີຄວາມເປັນຫ່ວງຢ່າງ
ເລິກເຊິ່ງຕໍ່ອະນາຄົດຂອງປະເທດພວກທ່ານ ມັນເປັນເລື້ອງ ທີ່ໜ້າເສົ້າໃຈ
ຫລາຍ ທີ່ເຫັນວ່າ ການໂອ້ລົມ​ແບບ​ນີ້ ຍັງສືບຕໍ່ມີຢູ່ ແລະມີມາ​ໃນຮູບໃໝ່.”


ສຳນວ​ນ​ຄຳ​ເວົ້າຂອງພະອາຈານ Wirathu ​ແມ່ນ​ລວມທັງການຮຽກຮ້ອງໃຫ້ເອົາເລືອດ
ຂອງຊາວມຸສລິມມາ ຢູ່ໃນຄໍາເທດສະໜາຕໍ່ຊຸມຊົນທົ່ວໄປ ບ່ອນທີ່ພວກໄປຟັງເທດມີ
ຫລາຍພັນຄົນ.

ທ່ານ Ye Htut ຮອງລັດຖະມົນຕີກະຊວງຖະແຫລງຂ່າວເຊື່ອວ່າ ມີຄວາມຈໍາເປັນ ທີ່ຕ້ອງ
ໄດ້ເກືອດຫ້າມບໍ່ໃຫ້ຂາຍວາລະສານດັ່ງກ່າວ ແລະຕໍາໜິສື່ສັງຄົມ ເຊັ່ນ Facebook ວ່າ ນໍາເອົາຄໍາເວົ້າ ທີ່ພາໃຫ້ກຽດຊັງກັນໄປເຜີຍແຜ່. ທ່ານໄດ້ຖິ້ມໂທດໃສ່ການຄວບຄຸມສື່
ມວນຊົນຢ່າງເຂັ້ມງວດຂອງມຽນມາໃນອະດີດຜ່ານມາ ທີ່​ມີ​ສ່ວນ​ເຮັດ​ໃຫ້ປະຊາຊົນບໍ່​
ສາມາດທີ່ຈະຮັບມືຢ່າງມີປະສິດທິຜົນກັບເສລີພາບທີ່ໄດ້ມາໃໝ່ໆ ແລະເວົ້າວ່າ ທ່ານບໍ່
ເຊື່​ອວ່າ ຄໍາເວົ້າຂອງອາຈານ Wirathu ຖືກຈັດ ເປັນຄໍາເວົ້າທີ່ຍຸແຍ່ໃຫ້ກຽດຊັງກັນ.

ທ່ານ Htut ໃຫ້ຄໍາເຫັນວ່າ: “ພວກເຮົາຕ້ອງໄຈ້ແຍກໃຫ້ໄດ້ ລະຫວ່າງຄໍາຄິດ
ເຫັນຢ່າງແຮງ ແລະຄໍາເວົ້າຍຸແຍ່ໃຫ້ກຽດຊັງກັນ. ພວກເຮົາຕ້ອງ ອະນຸຍາດ
ໃຫ້ມີເສລີພາບໃນການປາກເວົ້າ ແລະພ້ອມກັນນັ້ນ ພວກເຮົາຕ້ອງໃຫ້ມີຄໍາ
ແນະນໍາອັນຈະແຈ້ງວ່າ ຄໍາເວົ້າຍຸແຍ່ໃຫ້ກຽດຊັງກັນແມ່ນ ຫຍັງ. ສະນັ້ນ ຄູບາ
ອົງນຶ່ງ ຈຶ່ງໄດ້ເຕືອນໃຫ້ອາຈານ U Wirathu ໃຫ້ ຄວບຄຸມອາລົມຂອງເພິ່ນ.”

ອາຈານ Wirathu ໄດ້ຖືກຈໍາຄຸກໃນປີ 2003 ຍ້ອນວ່າໄດ້ຍຸຍົງໃຫ້ມີການກໍ່ຄວາມຮຸນແຮງ
ແລະກໍໄດ້ຖືກປ່ອຍຕົວໃນປີ 2011. ເພິ່ນຍັງສືບຕໍ່ທໍາການເຜີຍແຜ່ຄໍາເວົ້າແບບນັ້ນຢູ່ ໂດຍ
ທີ່ບໍ່ມີການແຊກແຊງຈາກລັດຖະບານແຕ່ຢ່າງໃດ.

ໃນຈໍານວນເຫດຜົນຫລາຍໆຢ່າງນັ້ນ ປະຊາຊົນຫລາຍຄົນ ບໍ່ພໍໃຈຕໍ່ການຮັບມືຂອງລັດ
ຖະບາກ່ຽວ​ກັບການຄວບຄຸມຄວາມຄິດຕໍ່ຕ້ານຊາວມຸສລິມ ເພາະສານຂອງມຽນມາໄດ້
ຕັດສິນວ່າ ພວກມຸສລິມເປັນຜູ້ຜິດ ລຸນຫລັງທີ່ ມີເຫດການກໍ່ຄວາມຮຸນແຮງທາງ​ສາສະ
ໜາ ແຕ່ທີ່ຍັງບໍ່ທັນມີຊາວພຸດຜູ້ໃດ ຖືກຕັດສິນວ່າກະທໍາຜິດເທື່ອ ໃນການຍຸຍົງສົ່ງເສີມ
ໃຫ້ມີການກຽດຊັງຊາວ ມຸສລິມນັ້ນ.

ທ້າວ Thet Ko Ko ​ເປັນຊາວມຸສລິມ ຈາກເມືອງ Moulmein ຊຶ່ງເປັນ ບ່ອນຕັ້ງວັດທີ່
ຂະບວນການຕໍ່ຕ້ານຊາວມຸສລິມ “969” ໄດ້ກໍ່ຮ່າງສ້າງຕົວຂຶ້ນນັ້ນ ໄດ້ເດີນທາງໄປຍັງ
ນະຄອນຢ່າງກຸ້ງ ເພື່ອເຂົ້າຮ່ວມການຝຶກອົບຮົມ ແລະວ່າ ລາວມີຄວາມຜິດຫວັງຫລາຍ ຕໍ່ສິ່ງທີ່ເວົ້າກັນ ຢູ່ໃນການຝຶກອົບຮົມນັ້ນ.

ທ້າວ Thet Ko Ko ເວົ້າວ່າ: “ສາສະໜາຂອງຂ້ອຍ ຖືກຈໍາແນກກີດ​ກັນຈາກ
ລັດແລະຊຸມຊົນສ່ວນໃຫຍ່ ໂດຍສະເພາະແມ່ນ ຄູບາບາງອົງ. ຂ້ອຍບໍ່ພໍໃຈ
ຕໍ່ເລື້ອງນີ້. ພວກເຮົາຕ້ອງການໃຫ້ລັດຖະບານປ້ອງກັນ ບໍ່ໃຫ້ມີການໃຊ້ຄໍາ
ເວົ້າທີ່ຍຸແຍ່ໃຫ້ກຽດຊັງກັນຢູ່ໃນມຽນມາ ໂດຍສະເພາະ ແລ້ວ ແມ່ນຢູ່​ໃນ
ກົດໝາຍ. ຂ້ອຍໝາຍເຖິງການ​ເທດ​ສະໜາ​ຕໍ່​ຊຸມ​ຊົນທົ່ວໄປ ແມ່ນມີຂໍ້ມູນ
ຫລາຍອັນຢູ່ໃນໝູ່ບ້ານຕ່າງໆ ທີ່ພວກເຂົາເຈົ້າ ໄດ້ແຈກຢາຍຂໍ້ມູນດັ່ງກ່າວ.
ເປັນຫຍັງພວກເຂົາເຈົ້າຈຶ່ງບໍ່ປ້ອງກັນ ບໍ່ໃຫ້ມີ ກິດຈະກໍາແບບນີ້ ແມ່ນເປັນ
ຈຸດສຳຄັນ ທີ່ຂ້ອຍຢາກເວົ້າ.”


ໃນອາທິດນີ້ ຄາດກັນວ່າກະຊວງຮັບຜິດຊອບວຽກງານສາສະໜາ ຈະປະກາດກ່ຽວກັບ ການຮ່າງກົດໝາຍໃໝ່ທີ່ເປັນຂໍ້ໂຕ້ແຍ້ງກັນ ຊຶ່ງຈະຂັດຂວາງ ບໍ່ໃຫ້ມີການແຕ່ງງານກັນ
ລະຫວ່າງຜູ້ຍິງທີ່ເປັນຊາວພຸດ ແລະຜູ້ຊາຍທີ່ເປັນຊາວມຸສລິມ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG