ລິ້ງ ສຳຫລັບເຂົ້າຫາ

ວິກິດການ ດ້ານການເມືອງ ຂອງເບີກີນາ ຟາໂຊ ໃກ້ຈະ ສິ້ນສຸດ ລົງແລ້ວ


ປະທານາທິບໍດີ ເບນິນ ທ່ານ Thomas Boni Yayi ຖະແຫລງຕໍ່ສື່ມວນຊົນ ຫຼັງຈາກທ່ານໄດ້ ເຈລະຈາກັບ ນາຍພົນ Gilbert Diendere ຜູ້ຖືກແຕ່ງຕັ້ງໃຫ້ເປັນຜູ້ນຳ ຂອງເບີກີນາ ຟາໂຊ, ໃນນະຄອນຫຼວງອົວກາດູກູ, ວັນທີ 19 ກັນຍາ 2015.

ບັນດາ​ຜູ້​ໄກ່​ເກ່ຍກຳລັງ​ທຳ​ງານ ​ເພື່ອ​ຍຸດຕິ​ຄວາມ​ບໍ່​ສະຫງົບທາງ​
ດ້ານ​ການ​ເມືອງ ຢູ່​ໃນ​ປະ​ເທດ ​ເບີ​ກີ​ນາ ຟາ​ໂຊ ​ຊຶ່ງ​ເປັນ​ປະ​ເທດ
​ໜຶ່ງ​ໃນ​ອາ​ຟຣິກາ​ຕາ​ເ​ວັນ​ຕົກ ​ແລະ ຄາດ​ກັນ​ວ່າ ຈະ​ມີ​ການ​ປະ
ກາດ​ການ​ແກ້​ໄຂ​ບັນຫາ ສຳລັບ​ວິ​ກິດ​ການດັ່ງກ່າວ ​ໃນ​ວັນ
​ອາທິດ​ມື້​ນີ້.

ປະທານາທິບໍດີ ​ເບ​ນິນ ທ່ານ Thomas Boni Yayi ​ໄດ້ໂອ້ລົມ
ເຖິງສະພາບ​ການ​ ຂອງ​ການ​ເຈລະຈາ ກັບ​ບັນດາ​ນັກ​ຂ່າວ ​ໃນ
​ວັນ​ເສົາ​ວານ​ນີ້ ຢູ່​ທີ່​ນະຄອນຫລວງອົວກາ​ດູ​ກູ ຂອງ​ປະ​ເທດ
ເບີ​ກີ​ນາ ຟາ​ໂຊ ​ແຕ່​ບໍ່​ໄດ້​ໃຫ້​ລາຍ​ລະອຽດ​ໃດໆ ​ກ່ຽວ​ກັບ​ຂໍ້​ຕົກລົງ​
ທີ່​ອາດເປັນ​ໄປ​ໄດ້ນັ້ນ.

ທ່ານ Boni Yayi ​ແລະ ປະທາ​ນາ​ທິບໍດີ ​ເຊ​ເນ​ກາລ ທ່ານ Macky Sall ພວມ​ນຳພາ​ການ​ເຈລະຈາ ກັບ​ນາຍພົນ​ Gilbert Diendere ຜູ້​ທີ່​ໄດ້​ຍຶດ​ເອົາອຳນາດ ​ໃນ​ວັນ​ພະຫັດຜ່ານ​ມາ ຫຼັງຈາກ​ທີ່​ບັນດາ​ສະມາຊິກ ​ຂອງໜ່ວຍອາລັກຂາປະທານາທິບໍດີ ໄດ້ບຸກເຂົ້າໄປໃນ ກອງປະຊຸມຄະນະລັດຖະບານ ມື້​ນຶ່ງ​ກ່ອນ​ໜ້າ​ນັ້ນ ​ແລະ ​ໄດ້​ລັກ​ພາ​ຕົວ ຜູ້ວ່າການປະທາ​ນາ​ທິບໍດີຊົ່ວຄາວ ທ່ານ Michel Kafando ​ແລະ ບັນດາ​ລັດຖະມົນຕີ​ຂອງທ່ານ​ນຳ​.

ການ​ກໍ່​ລັດຖະປະຫານ ​ໄດ້ສົ່ງ​ຜົນ​ໃຫ້​ເກີດ​ການ​ປະ​ທ້ວງ​ຢ່າງຮ້າຍ​ແຮງ​ຂຶ້ນ ຢູ່​ຕາມ​ຖະໜົນເສັ້ນ​ຕ່າງໆ​ ໃນນະຄອນຫລວງອົວກາ​ດູ​ກູ ຈົນ​ທະວີ​ຂຶ້ນ​ເຖິງຂັ້ນ​ປະ​ທະ​ກັນ​ຢ່າງ​ນອງ​ເລືອດ ລະຫວ່າງ​ພວກ​ປະ​ທ້ວງ ​ແລະ ພວກ​ທະຫານ ທີ່​ເຮັດ​ໃຫ້​ມີ 10 ຄົນ​ເສຍ​ຊີວິດ ​ແລະ ຫຼາຍກວ່າ 100 ຄົນ​ໄດ້​ຮັບ​ບາດ​ເຈັບ. ຄວາມ​ຮຸນ​ແຮງ​ໄດ້​ຫລຸດຜ່ອນ​ລົງ ​ໃນ​ວັນ​ເສົາ​ວານ​ນີ້ ​ໃນ​ຂະນະ​ທີ່​ມີ​ທະຫານ​ບໍ່​ທໍ່​ໃດ​ຄົນ ລາດ​ຕາ​ເວນຢູ່ ນະຄອນຫລວງອົວກາ​ດູ​ກູ.

ລັດຖະບານ​ຂອງ ທ່ານ Kafando ​ໄດ້​ຖືກ​ກໍ່ຕັ້ງຂຶ້ນ ຫຼັງຈາກ​ທີ່​ປະທານາທິບໍດີ Blaise
Compaore ​ໄດ້​ຖືກ​ຂັບ​ໄລ່​ອອກ​ຈາກ​ຕຳ​ແໜ່​ງ ​ເມື່ອ​ເດືອນ​ຕຸລາ​ປີ​ກາຍ​ນີ້ ຍ້ອນ​ການ​ລຸກ​ຮື​
ຂຶ້ນຂອງ​ປະຊາຊົນ. ລັດຖະບານ​ດັ່ງກ່າວ ​ໄດ້​ກຳນົດການ​ເລື​ອກຕັ້ງ ສຳ​ຫລັບ​ລັດຖະບານ
ຖາ​ວອນຊຸດ​ໃໝ່ ​ໃສ່​ວັນ​ທີ 11 ​ເດືອນ​ຕຸລາ ຈະ​ມາ​ເຖິງ​ນີ້. ການ​ກໍ່​ລັດຖະປະຫານນີ້ ​ໄດ້​ຖືກ
​ປະນາມ ​ໂດຍ​ສະຫະລັດ ​ແລະ ຝຣັ່ງ ອະດີດຜູ້​ປົກຄອງປະ​ເ​ທດ​ເບີ​ກີ​ນາ ຟາ​ໂຊ ​ທີ່ເຄີຍ​ເປັນ
ຫົວ​ເມືອງ​ຂຶ້ນນັ້ນ ພ້ອມ​ດ້ວຍ ອົງການ​ສະຫະ​ປະຊາ​ຊາດ ​ແລະ ສະຫະພາບ​ອາ​ຟຣິກາ ຊຶ່ງ​
ໄດ້​ສັ່ງ​ງົດ​ ການ​ເປັນ​ສະມາຊິກ​ຂອງ​ປະ​ເທດ ເມື່ອ​ວັນ​ສຸກ​ຜ່ານ​ມາ.

XS
SM
MD
LG