ລິ້ງ ສຳຫລັບເຂົ້າຫາ

ກຸ່ມ​ລັດອິສລາມ ອ້າງ​ເອົາ​ຄວາມ​ຮັບຜິດຊອບ ​ໃນ​ການ​ໂຈມ​ຕີ​ ທີ່ນະຄອນ​ຫຼວງ ​​ອິນ​ໂດ​ເນ​ເຊຍ


ກຸ່ມ​ລັດອິສລາມ ​ໄດ້​ອອກ​ມາ​ອ້າງ​ເອົາ​ຄວາມ​ຮັບຜິດຊອບ​ໃນ
​ການ​ໂຈມ​ຕີ​ ດ້ວຍ​ລະ​ເບີດ ​ແລະ ອາວຸດ​ປືນ ແບບ​ມີ​ການ​ປະສານ
ງານ​ກັນ ໃນ​ວັນ​ພະຫັດ​ມື້​ນີ້ ​ໃນ​ນະຄອນ​ຫຼວງ​ຂອງ​ອິນ​ໂດ​ເນ​ເຊຍ
ທີ່ເຮັດ​ໃຫ້​ມີ 7 ຄົນ​ເສຍ​ຊີວິດ​ນັ້ນ ​ຮວມທັງພວກ​ໂຈມ​ຕີ 5 ຄົນ.

ອົງການ​ຂ່າວ Aamaq ​ທີ່ເປັນ​ເຄືອ​ຂ່າຍ​ຂອງກຸ່ມ​ລັດອິສລາມ ປະກາດວ່າ ການ​ໂຈມ​ຕີ​ ທີ່​ມີ ຂຶ້ນ​ໃນ​ຄຸ້ມ​ຄົນຮັ່ງມີ ​ໃນເຂດ​ໃຈກາງ​ນະຄອນ​ຈາ​ກາ​ຕ້າວ່າ “​ແນ​ເປົ້າ​ໝາຍ​ໃສ່​ຊາວ​ຕ່າງ​ຊາດ​ແລະ​ກອງ​ກຳລັງ​ຮັກສາ​ຄວາມ​ປອດ​ໄພ ​ທີ່ມີໜ້າ​ທີ່ໃນ​ການ​ຄຸ້ມ​ຄອງ​ພວກ​ເຂົາ​ເຈົ້າ​ນັ້ນ.”

ກ່ອນ​ໜ້າ​ນີ້​ ໂຄສົກ​ຂອງ​ອົງການ​ຕຳຫຼວດ​ແຫ່ງ​ຊາດອິນ​ໂດ​ເນ​ເຊຍທ່ານ Anton Charliyan ​ໄດ້​ກ່າວ​ວ່າ ​ເຄື່ອຂ່າຍ​ຂອງ​ກຸ່ມ​ອິສລາມແມ່ນ​ມີ​ທ່າ​ທາງ​ວ່າ​ເປັນ​ຜູຸ້ຢູ່​ເບື້ອງຫລັງ​ການ​ໂຈມ​ຕີ​ໃນ​ຄັ້ງ​ນີ້ ​ແລະ​ພວກ​ໂຈມ​ຕີ​ແມ່ນ​ມີ​ທ່າ​ທາງ​ວ່າ ພະຍາຍາມ​ຮຽນ​ແບບ​ ການ​ໂຈມ​ຕີ​ກໍ່​ການ​ຮ້າຍ​ທີ່​ນະຄອນປາຣີ​ເມື່ອ​ບໍ່​ດົນ​ມານີ້.

ຜູ້ຄົນພາກັນຊ່ອຍຫາມເອົາພວກຕຳຫຼວດທີ່ໄດ້ຮັບບາດເຈັບ ໃກ້ໆກັບສະຖານີຕຳຫຼວດທີ່ຖືກວາງລະເບີດ ໃນນະຄອນຈາກາຕາ, ອິນໂດເນຍເຊຍ, 14 ມັງກອນ, 2016.

ຜູ້ຄົນພາກັນຊ່ອຍຫາມເອົາພວກຕຳຫຼວດທີ່ໄດ້ຮັບບາດເຈັບ ໃກ້ໆກັບສະຖານີຕຳຫຼວດທີ່ຖືກວາງລະເບີດ ໃນນະຄອນຈາກາຕາ, ອິນໂດເນຍເຊຍ, 14 ມັງກອນ, 2016.

ຄວາມ​ຮຸນ​ແຮງ​ເລີ້ມຂຶ້ນດ້ວຍ​ເຫດ​ລະ​ເບີ​ດທີ່​ເກີດ​ຂຶ້ນ​ເປັນ​ລຳດັບ​ມາ ​ໃນ​ຕອນ​ເຊົ້າມື້ນີ້​ ​ໃກ້​ກັບ ສູນ​ການ​ຄ້າ​ພວກ​ຄົນ​ຮັ່ງ ​ໂຮງ​ແຮມ​ຫລູຫລາ ​ສະຖານທູດຕ່າງໆ ​ແລະ​ຕຶກ​ຫ້ອງການ​ອື່ນໆ.​ ມີ​ລາຍ​ງານ​ວ່າ ​ໄດ້​ເກີດລະ​ເບີດທັງ​ໝົດ​ 6 ​ເທື່ອ.

ພວກ​ຫົວ​ຮຸນ​ແຮງ​ໄດ້​ຍິງ​ຕໍ່ສູ້​ຢ່າງ​ດຸ​ເດືອດ​ກັບ​ຕຳຫລວດ​ຕະຫລອດ​ມື້. ມາ​ຮອດ​ຕອນ​ບ່າຍ​ມື້ນີ້​ ​ເຈົ້າໜ້າ​ທີ່​ປະກາດ​ວ່າ ການ​ໂຈມ​ຕີ​ໄດ້​ສິ້ນສຸດ​ລົງ​ແລ້ວ​ ​ໂດຍກ່າວ​ວ່າ ພວກ​ຫົວ​ຮຸນແຮງ 5 ຄົນ​ໄດ້​ຖືກ​ຂ້າ​ຕາຍ​ ຕຳຫລວດ​ກ່າວ​ວ່າ ນອກ​ນັ້ນຍັງ​ມີ​ພົນລະ​ເຮືອນ​ອີີກ​ 2 ຄົນ ພ້ອມ​ດ້ວຍ​ປະຊາຊົນໂຮ​ນລັງຄົນນຶ່ງ​ໄດ້​ເສຍ​ຊີວິດ.

ບັນດາຮ່າງທີ່ໄຮ້ວິນຍານໄດ້ກະຈາຍລະເດຍລະດາດໄປທົ່ວທ້ອງຖະໜົນ ໃນຂະນະທີ່ພວກຕຳຫຼວດ ກຳລັງຖືປືນ ຍ່າງຢູ່ຂ້າງຫຼັງລົດທີ່ໃຊ້ເປັນກຳບັງ ໃນນະຄອນ Jakarta, 14 ມັງກອນ, 2016.

ບັນດາຮ່າງທີ່ໄຮ້ວິນຍານໄດ້ກະຈາຍລະເດຍລະດາດໄປທົ່ວທ້ອງຖະໜົນ ໃນຂະນະທີ່ພວກຕຳຫຼວດ ກຳລັງຖືປືນ ຍ່າງຢູ່ຂ້າງຫຼັງລົດທີ່ໃຊ້ເປັນກຳບັງ ໃນນະຄອນ Jakarta, 14 ມັງກອນ, 2016.

​ໃນ​ເດືອນ​ທັນວາ​ຜ່ານ​ມາ ​ເຈົ້າໜ້າ​ທີ່​ອິນ​ໂດ​ເນ​ເຊຍ​ໄດ້​ຮັບ​ການ​ຂົ່ມຂູ່​ຈາກ​ກຸ່ມ​ລັດ​ອິສລາມ​ກ່ຽວກັບ​ການໂຈມ​ຕີ​ດ້ວຍ​ລະ​ເບີດ​ແບບ​ມີ​ການ​ປະສານ​ງານ​ກັນ​ ທີ່​ນະຄອນຫຼວງຈາກ​ກາ​ຕ້າ.

ນັກ​ຂ່າວ​ວີ​ໂອ​ເອປະຈຳ​ອິນ​ໂດ​ເນ​ເຊຍ Frans Demon ລາຍ​ງານ​ວ່າ ​ໃນ​ລະຫວ່າງເທດສະ ການຄຣິສມັສ​ແລະ​ປີ​ໃໝ່​ສາກົນ ກຸ່ມ​ລັດ​ອິສລາມ​ໄດ້​ຂົ່ມຂູ່​ວ່າ​ ຈະ​ດຳ​ເນີນ​ການ​ໃນ​ອັນ​ທີ່​ພວກ​ເຂົາ​ເອີ້ນວ່າ​ ຄອນ​ເສີດ​ທີ່​ນະຄອນຫຼວງຈາ​ກາ​ຕ້າ​ ຊຶ່ງ​ໝາຍ​ຄວາມ​ວ່າ ພວກ​ເຂົາ​ຈະ​ໂຈມ​ຕີ​ດ້ວຍ​ລະ​ເບີດ​ຢູ່ຫລາຍໆ​ຈຸດ​ ​ໃນ​ເວລາ​ດຽວ​ກັນ.

​ເຫດ​ລະ​ເບີດ​ຢ່າງ​ໜ້ອຍນຶ່ງ​ຄັ້ງ​ແມ່ນ​ເກີດ​ຢູ່​ໃກ້ໆ​ກັບ​ຮ້ານ​ກາ​ເຟ Starbucks ທີ່​ຊາວ​ຕ່າງ
ປະ​ເທດ​ມັກ​ພາກັນ​ໄປ​ກິນນັ້ນ.​ ຮ້ານ​ກາ​ເຟທີ່​ວ່າ​ນີ້ ກ່າວ​ໃນ​ເວລາ​ຕໍ່​ມາ​ວ່າ​ ຕົນ​ໄດ້​ປິດ​ຮ້ານ
ທັງໝົດ​ໃນ​ນະຄອນຫຼວງຈາ​ກາ​ຕ້າ​ເພື່ອ​ເປັນ​ມາດ​ຕະການ​ລະມັດລະວັງທາງ​ດ້ານ​ຄວາມ​ປອດ​ໄພ.

XS
SM
MD
LG