ລິ້ງ ສຳຫລັບເຂົ້າຫາ

ເກີດເຫດລະເບີດ ໃນຕະຫຼາດ ທີ່ມີຜູ້ຄົນ ໜາແໜ້ນ ນອກນະຄອນຫຼວງ ຂອງຊີເຣຍ (ວີດີໂອ)


ພວກສະມາຊິກປ້ອງກັນພົນລະເຮືອນ ພະຍາຍາມມອດໄຟ ຫຼັງຈາກ ພວກນັກເຄື່ອນໄຫວ ອ້າງວ່າ ເປັນການລະເບີດໃນລົດ
ທີ່ຕະຫຼາດ ໃນເມືອງ Douma ໃກ້ກັບນະຄອນຫຼວງ ດາມັສກັສ ຂອງຊີເຣຍ, ວັນທີ 28 ມິຖຸນາ 2014.

ພວກສະມາຊິກປ້ອງກັນພົນລະເຮືອນ ພະຍາຍາມມອດໄຟ ຫຼັງຈາກ ພວກນັກເຄື່ອນໄຫວ ອ້າງວ່າ ເປັນການລະເບີດໃນລົດ ທີ່ຕະຫຼາດ ໃນເມືອງ Douma ໃກ້ກັບນະຄອນຫຼວງ ດາມັສກັສ ຂອງຊີເຣຍ, ວັນທີ 28 ມິຖຸນາ 2014.

ລະ​ເບີດ​ໃນ​ລົດ​ຄັນ​ນຶ່ງ​ໄດ້ແຕກ​ຂຶ້ນ ​ໃນ​ເຂດ​ຊານ​ເມືອງ​ແຫ່ງ​ນຶ່ງ​
ຂອງນະຄອນ​ຫຼວງ​ດາ​ມັສກັສ ທີ່ຢູ່​ໃຕ້​ການ​ຄວບ​ຄຸມ​ຂອງ​ພວກ
ກະບົດ ​ໃນວັນ​ເສົາ​ວານ​ນີ້ ​ເຮັດ​ໃຫ້​ປະຊາຊົນເສຍ​ຊີວິດ ​ຢ່າງ​
ໜ້ອຍ 2 ຄົນ ​ ​ແລະບາດ​ເຈັບ​ຕື່ມ​ອີກ​ຫຼາຍ​ຄົນ.

ພວກ​ເຫັນ​ເຫດການແລະ​ພວກ​ນັກ​ເຄື່ອນ​ໄຫວ​ເວົ້າ​ວ່າ​ ເຫດ
ລະເບີດດັ່ງກ່າວ​ເກີດ​ຂຶ້ນ ຢູ່​ຕະຫຼາດທີ່​ມີ​ຜູ້​ຄົນ​ອັ່ງ​ອໍ​ໜາ​ແໜ້ນ
​ໃນ​ເມືອງ Douma.

ບໍ່​ມີ​ຜູ້​ໃດ ອ້າງ​ເອົາ​ຄວາມ​ຮັບຜິດຊອບ​ເທື່ອ​ໃນ​ເວລາ​ນີ້. ກຸ່ມຈັດຕັ້ງລັດ​ອິສລາມ​ໃນ​ອີຣັກ ​
ແລະ Levant ຫຼື ISIL ຊຶ່ງ​ແຍກ​ອອກມາ​ຈາກ​ເຄືອ​ຂ່າຍ ອາລກາ​ອິດາ ມີການ​ຂັນ​ແຂ່ງ​
ກັນຢູ່ທີ່ນັ້ນ ກັບພວກກຸ່ມອື່ນໆ ທີ່ກຳລັງສູ້ລົບ ເພື່ອໂຄ່ນລົ້ມ ປະທານາທິບໍດີ Bashar
al-Assad ​ແຫ່ງ​ຊີ​ເຣຍ ອອກ​ຈາກ​ອຳນາດ​.

ກຸ່ມ ISIL ຍັງ​ໄດ້​ຍຶດ​ເອົາ​ຫຼາຍເຂດໃຫຍ່ໆໃນ​ພາກ​ເໜືອ​ຂອງ​ອີຣັກເຊັ່ນ​ກັນ ​ແລະຂົ່ມຂູ່​ທີ່
​ຈະ​ຍຶດ​ເອົາ​ນະຄອນຫລວງ​ແບັກ​ແດດ ​ໃນ​ເວລາ​ນີ້.

ທຳນຽບຂາວ ​ໄດ້ຮ້ອງ​ຂໍ​ງົບປະມານ 500 ລ້ານ​ດອນ​ລາ​ຈາກ​ລັດຖະ ສະພາ ​ເພື່ອ​ນຳ​ໄປ​ປະກອບ​ອາວຸດ ​ແລະ​ເຝິກ​ແອບ​ພວກ​ຝ່າຍ​ຄ້ານ​ຫົວ​ພໍ​ປານ​ກາງ​ຊີ​ເຣຍ ທີ່​ກຳລັງ​ທຳ​ການ​
ຕໍ່ສູ້​ກັບ​ພວກ​ກຸ່ມ ISIL ​ແລ​ະພວກ​ຫົວຮຸນແຮງ​ຈັດ​ອື່ນໆ​ນັ້ນ.

​ໃນ​ວັນ​ເສົາ​ວານ​ນີ້​ເຊັ່ນ​ກັນ ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານ John Kerry ​ໄດ້ໄປຢ້ຽມຢາມ​ນະຄອນ Jeddah ​ເພື່ອ​ເຂົ້າ​ຮ່ວມ​ໃນ​ອັນ​ທີ່​ກະຊວງການ​ຕ່າງປະ​ເທດ
ສະຫະ​ລັດ ​ເອີ້ນ​ວ່າ ການ​ໂອ້​ລົມ​ສົນທະນາ​ໃນ​ທາງ​ບວກ ​ແລະ​ອົບ​ອຸ່ນ ກ່ຽວ​ກັບ​ວິ​ກິດ​ການ​
ໃນ​ຊີ​ເຣຍ ​ແລະ​ໃນ​ອີຣັກ ກັບ​ກະສັດ Abdullah ​ແຫ່ງ​ຊາ​ອຸ​ດີ​ອາ​ເຣເບຍ​.

​ເຈົ້າ​ໜ້າ​ທີ່​ທ່ານ​ນຶ່ງ​ຈາ​ກະຊວງ​ການ​ຕ່າງປະ​ເທດ​ສະຫະລັດ ກ່າວ​ວ່າ ກະສັດ ອັບ​ດູລລາ ​
ໄດ້ຊົງ​ກ່າວ​ຕໍ່​ທ່ານ Kerry ວ່າ ຊາ​ອຸ​ດີ ອາ​ເຣ​ເບຍ​ກຳລັງ​ເອົາ​ບາດກ້າວ​ຕ່າງໆ ​ເພື່ອ​ຮັບ​ມື​
ກັບ​ການ​ຂົ່ມຂູ່​ຂອງ​ພວກ ISIL ​ແຕ່​ເຈົ້າ​ໜ້າ​ທີ່​ທ່ານ​ນີ້ ບໍ່​ໄດ້​ແຈ້ງ​ລາຍ​ລະອຽດ​ໃຫ້​ຊາບ ​
ໂດຍ​ອ້າງ​ເຫດຜົນ​ທາງ​ດ້ານ​ຄວາມ​ປອດ​ໄພ.

ທ່ານ John Kerry ​ໄດ້​ໃຊ້​ເວລາ​ສ່ວນ​ຫຼາຍ​ຂອງ​ທ່ານ ​ໃນ​ສັບປະດາ​ຜ່ານ​ມາ ​ຢູ່ໃນ​ພາກ​
ຕາ​ເວັນ​ອອກ​ກາງ ​ເພື່ອ​ຊຸກຍູ້ໃຫ້​ພວກ​ຜູ້ນຳ​ໃນ​ພາກພື້ນ ​ແກ້​ໄຂ​ບັນຫາ​ກັບ​ການ​ຂົ່ມຂູ່​ຂອງ​
ພວກ​ນັກ​ຕໍ່ສູ້ຫົວ​ຮຸນ​ແຮງ​ອິສລາມ​ນີ້.

XS
SM
MD
LG