ເຈົ້າໜ້າທີ່ໃນພາກຕາເວັນຕົກສຽງເໜືອ ຂອງບັງກລາແດັສ ກ່າວວ່າ ພວກໂຈມຕີໄດ້ໃຊ້ ມີດຟັນອາຈານສອນມະຫາວິທະຍາໄລຄົນນຶ່ງ ຈົນເສຍຊີວິດ.
ເຈົ້າໜ້າທີ່ກ່າວວ່າ ພວກຄົນຮ້າຍຫລາຍຄົນທີ່ມີມີດຂະໜາດໃຫຍ່ເປັນອາວຸດໄດ້ຟັນອາ ຈານ Rezaul Karim Siddique ຈາກທາງຫຼັງ ໃນຕອນເຊົ້າວັນເສົາມື້ນີ້ຂະນະທີ່ທ່ານ ຖ້າລົດເມຢູ່ໃກ້ໆເຮືອນຂອງທ່ານ ໃນເມືອງ Rajshahi. ອາຈານສອນພາສາອັງກິດອາຍຸ 58 ປີທ່ານນີ້ ແມ່ນເປັນທີ່ປຶກສາໃຫ້ແກ່ໂຄງການວັດທະນະທຳຫຼາຍໆໂຄງການ.
ຍັງບໍ່ທັນມີກຸ່ມໃດອ້າງເອົາຄວາມຮັບຜິດຊອບເທື່ອໃນການໂຈມຕີຄັ້ງນີ້ ແລະຈຸດປະສົງກໍຍັງບໍ່ທັນເປັນທີ່ຮູ້ຈັກເທື່ອ ແຕ່ຕຳຫຼວດກໍກ່າວວ່າ ການສັງຫານໂຫດໃນເທື່ອນີ້ ແມ່ນຄ້າຍ ຄືກັນກັບການໃຊ້ມີດສັງຫານ ພວກນັກເຄື່ອນໄຫວອື່ນໆ ທີ່ບໍ່ຝັກໄຝ່ໃນສາສະໜາແລະບໍ່ເຊື່ອວ່າມີພະເຈົ້າ ຢູ່ໃນບັງກລາແດັສ ຊຶ່ງຕັ້ງຢູ່ໃນເຂດເອເຊຍໃຕ້ ໂດຍພວກຫົວຮຸນແຮງອິສລາມ.
ໃນຕົ້ນເດືອນນີ້ ສະຫະລັດໄດ້ໃຫ້ສະເໜີໃຫ້ການຊ່ອຍເຫຼືອໃນດ້ານວິທີການແລະທັກສະຄວາມຮູ້ແກ່ລັດຖະບານບັງກລາແດັສໃນຂະນະທີ່ປະເທດດັ່ງກ່າວ ທຳການສືບສວນໃນການສັງຫານ ທີ່ມີມາເປັນລຳດັບເທື່ອຫລ້າສຸດ ພວກນັກຂຽນຂ່າວລົງອິນເຕີແນັດທີ່ບໍ່ຝັກໄຝ່ໃນສາສະໜາຢູ່ໃນປະເທດທີ່ຄົນສ່ວນໃຫຍ່ນັບຖືສາສະໜາອິສລາມນັ້ນ.
ບັນດາກຸ່ມປົກປ້ອງສິດທິມະນຸດ ໄດ້ກ່າວຫາ ລັດຖະບານບັງກລາແດັສວ່າ ບໍ່ໄດ້ດຳເນີນການພຽງພໍເພື່ອຍຸຕິການໂຈມຕີເຫຼົ່ານີ້. ມີພວກນັກຂຽນຂ່າວລົງອິນເຕີແນັດບໍ່ຕ່ຳກວ່າ 6 ຄົນແລະຜູ້ພິມໜັງສືພິມຄົນນຶ່ງທີ່ບໍ່ຝັກໄຝ່ໃນສາສະໜາໄດ້ຖືກຂ້ານັບ ແຕ່ປີ 2013 ເປັນ ຕົ້ນມາ.
