ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ຕຳຫຼວດ ບັງກລາແດັສ ສັງຫານ ຜູ້ຕ້ອງສົງໄສ ຢູ່ເບື້ອງຫຼັງ ການໂຈມຕີຮ້ານກາເຟ ທີ່ Dhaka


ຕຳຫຼວດບັງກລາແດັສ ກວດເບິ່ງເຮືອນສອງຊັ້ນ ຫຼັງຈາກ ໄດ້ບຸກເຂົ້າໄປ ທີ່ຄຸ້ມ Narayanganj ໃນເຂດຊານເມືອງ
ນະຄອນຫຼວງ Dhaka. (27 ສິງຫາ 2016)
ຕຳຫຼວດບັງກລາແດັສ ກວດເບິ່ງເຮືອນສອງຊັ້ນ ຫຼັງຈາກ ໄດ້ບຸກເຂົ້າໄປ ທີ່ຄຸ້ມ Narayanganj ໃນເຂດຊານເມືອງ ນະຄອນຫຼວງ Dhaka. (27 ສິງຫາ 2016)

ຕຳຫຼວດບັງ​ກລາ​ແດັສ ກ່າວ​ວ່າ ຕົນໄດ້​ສັງຫານ​ພວກ​ອິສລາມ​ຫົວ​ຮຸນ​ແຮງ​ຈັດ​ຢ່າງ​ໜ້ອຍ 3 ຄົນ​ໃນ​ວັນ​ເສົາ​ມື້ນີ້ ຫລັງ​ຈາກ​ໄດ້​ບຸກ​ເຂົ້າ​ໄປ​ໃນ​ບ່ອນ​ຫຼົບ​ລີ້​ແຫ່ງນຶ່ງ​ ຂອງ​ພວກ​ຫົວ​ຮຸນ​ແຮງ ຢູ່​ນອກ​ນະຄອນຫຼວງ Dhaka. ຜູ້ທີ່​ສົງ​ໄສ​ ​ເປັນ​ຜູ້​ບົງ​ການ​ຢູ່​ເບື້ອງຫຼັງ​ໃນການ​ໂຈມ​ຕີ ​ຮ້ານ ກາ​ເຟ​ໃນ​ເດືອນ​ແລ້ວ ທີ່​ເຕັມ​ໄປ​ດ້ວຍພວກຊາວ​ຕ່າງປະ​ເທດ ຊຶ່ງ​ມີ​ລາຍ​ງານ​ວ່າ​ຮວມຢູ່​ໃນ ຈຳນວນພວກ​ທີ່​ເສຍ​ຊີວິດ.

ນາຍ​ຕຳຫຼວດອະ​ວຸ​ໂສ Sanwar Hossain ​ໃຫ້ການ​ຢືນຢັນ​ກ່ຽວ​ກັບ​ການ​ເສຍຊີວິດ​ຂອງ​ ພວກ​ຫົວ​ຮຸນ​ແຮງ​ດັ່ງກ່າວ.

​ເຈົ້າໜ້າ​ທີ່​ກ່າວ​ວ່າ ຕຳຫຼວດ​ໄດ້​ຍິງ​ຕໍ່ສູ້​ກັນ​ກັບ​ພວກ​ຫົວ​ຮຸນ​ແຮງ​ເປັນ​ເວລາ​ນຶ່ງ​ຊົ່ວໂມງ​ທີ່​ຄຸ້ມ Narayanganj ຕັ້ງຫ່າງ​ຈາກ​ນະຄອນຫຼວງ​ Dhaka ​ໄປ​ທາງທິດໃຕ້ປະມານ 25 ຫຼັກກິ​ໂລ​ແມັດ.

ຜູ້​ບັນຊາ​ການ​ຕຳຫຼວດ ທ່ານ A.K.M Shahidul Hoque ກ່າວ​ຕໍ່​ອົງການ​ຂ່າວ AFP ວ່າ “ພວກ​ເຂົາ​ບໍ່​ໄດ້​ຍອມ​ຈຳນົນ. ພວກ​ເຂົາໄດ້​ແກວ່ງ​ລະ​ເບີດ​ມື ​ສີ່​ຫາ ​ຫ້າ​ລູກ ​ແລະ​ ກໍ​ຍິງ​ປືນ AK 22 ມາ​ໃສ່​ຕຳຫຼວດ.”

ທ້າວ Tamim Ahmed Chowdhury ຄົນ​ຄາ​ນາ​ດາ ​ເຊື້ອສາຍ​ບັງ​ກລາ​ແດັສ​ແມ່ນ​ຮວມ ຢູ່ໃນ​ຈຳນວນ​ພວກ​ທີ່​ເສຍ​ຊີວິດ ອີງ​ຕາມ​ຄຳ​ເວົ້າຂອງ​ເຈົ້າໜ້າ​ທີ່. ​ເປັນທີ່​ເຊື່ອ​ກັນ​ວ່າ ລາວ​ເປັນ​ຜູ້​ບົງ​ການ​ຢູ່​ເບື້ອງຫຼັງ​ ໃນ​ການ​ໂຈມ​ຕີ​ກໍ່​ການ​ຮ້າຍ​ ທີ່​ຮ້າຍແຮງ​ສຸດ​ຂອງ​ປະ​ເທດທີ່​ນຳ​ໄປ​ສູ່​ການ​ສັງຫານ​ໂຕ​ປະກັນ 20 ຄົນ ຮວມທັງ​ຊາວຕ່າງປະ​ເທດ 18 ຄົນ​ແລະ​ຕຳຫຼວດ 2 ຄົນ.

ອີງ​ຕາມ​ລາຍ​ງານ​ຂ່າວ​ແລ້ວ ຕຳຫຼວດ​ ແລະ​ເຈົ້າໜ້າ​ທີ່​ຮັກສາ​ຄວາມ​ປອດ​ໄພ​ໄດ້​ທຳ​ການ​ກວດຄົ້ນສະຖານ​ທີ່​ສົງ​ໄສ​ວ່າ ​ເປັນ​ບ່ອນ​ຫລົບ​ລີ້ຂອງ​ພວກ​ຫົວ​ຮຸນ​ແຮງ​ຈຳນວນ​ນຶ່ງ. ເມື່ອ​ວັນ​ທີ 2 ສິງຫາ​ຜ່ານ​ມາ​ເຈົ້າໜ້າ​ທີ່​ໄດ້​ສະ​ເໜີ​ໃຫ້​ລາງວັນ 25 ພັນໂດ​ລາ​ແກ່​ຜູ້​ໃດ​ກໍ​ຕາມ​ທີ່ ​ມີຂ່າວ​ຄາວ​ທີ່​ຈະ​ນຳ​ໄປ​ສູ່​ການ​ຈັບ​ກຸມ​ທ້າວ Chowdhury

ກຸ່ມ​ລັດ​ອິສລາມ ​ໄດ້​ອ້າງ​ເອົາ​ຄວາມ​ຮັບຜິດຊອບ ​ໃນ​ການ​ໂຈມ​ຕີ​ຮ້ານ​ກາ​ເຟ ໃນ​ວັນ​ທີ​ 2 ກໍລະກົດ ​ເວລາ​ພວກ​ມື​ປືນ ໄດ້​ບຸກ​ເຂົ້າ​ໄປ​ໃນຮ້ານ Holey Artisan Bakery ​ແລະ​ໄດ້​ສັງຫານ​ໂຕ​ປະກັນ​ພ້ອມ​ດ້ວຍ​ຕຳຫຼວດ.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG