ຊາວອອສເຕຣເຣຍ ກຳລັງພາກັນຕຽມ ທີ່ຈະໄປປ່ອນບັດ ໃນການເລືອກຕັ້ງລັດຖະ ບານກາງ ທີ່ມີຄະແນນສຽງໃກ້ຄຽງກັນ ໃນວັນເສົາມມື້ອຶ່ນນີ້ ບ່ອນທີ່ປະເທດດັ່ງກ່າວຈະຕັດສິນໃຈວ່າພັກສຽງສ່ວນນ້ອຍຈະສາມາດໂຄ່ນລົ້ມລັດຖະບານ ທີ່ກຳລັງປົກຄອງປະເທດໃນປັດຈຸບັນ ໄດ້ຫລືບໍ່.
ໃນຂະນະທີ່ການປ່ຽນແປງຂອງດິນຟ້າອາກາດ ຄົນເຂົ້າເມືອງ ແລະການສຶກສາເປັນເລື້ອງທີ່ສຳຄັນກໍຈິງຢູ່ ແຕ່ແມ່ນເລື້ອງເສດຖະກິດຊຶ່ງມີທ່າທາງວ່າຈະເປັນຜູ້ ຕັດສິນຊີ້ຂາດວ່າພັກໃດຈະເປັນຜູ້ໄດ້ຮັບໄຊຊະນະ. ອອສເຕຣເລຍໄດ້ຫລີກລ່ຽງ ຈາກສະພາບເສດຖະກິດທົດຖອຍມາໄດ້ 25 ປີແລ້ວ ແຕ່ໃນອະນາຄົດຍັງບໍ່ເປັນທີ່ແຈ້ງຂາວໃນຂະນະທີ່ການສົ່ງອອກຊັບພະຍາກອນເພື່ອສະໜອງຕອບຕໍ່ຄວາມ ຕ້ອງການຂອງຈີນ ໃນດ້ານແຮ່ເຫລັກ ແລະຖ່ານຫີນ ຍັງສືບຕໍ່ຫລຸດນ້ອຍຖອຍລົງ.
ຢູ່ທີ່ນະຄອນ Sydney ເຄື່ອງຍົກໃນການກໍ່ສ້າງແມ່ນຄອບງໍາຕຶກສູງ ໃນຂະນະທີ່ຕຶກຫ້ອງແຖວໃໝ່ປາກົດຂຶ້ນມາເປັນກຸ່ມໆ ຢູ່ຄຽງຂ້າງກັບລະບົບການເຊື່ອມຕໍ່ໃນດ້ານການຄົມມະ ນາຄົມ ທີ່ໄດ້ຮັບການປັບປຸງໃຫ້ດີຂຶ້ນ. ໃນຂະນະທີ່ການຂຸດຄົ້ນແຮ່ທາດທີ່ງອກງາມມາເປັນເວລາດົນນານກຳລັງຈະສິ້ນສຸດລົງ ອອສເຕເລຍ ແມ່ນຈະກາງຕໍ່ໃສ່ການຟື້ນຟູໃນອຸດ ສາຫະກຳການກໍ່ສ້າງ ພ້ອມດ້ວຍການຜະລິດ ການທ່ອງທ່ຽວ ແລະກະເສດຕະກຳ.
ແຕ່ວ່າການຕັດສິນໃຈຂອງອັງກິດໃນການຖອນໂຕອອກຈາກສະຫະພາບຢູໂຣບ ໄດ້ສ້າງຄວາມເປັນຫ່ວງອັນໃຫຍ່ຫລວງຢູ່ທີ່ນີ້ ແລະບັນດາຜູ້ນຳການເມືອງອອສເຕຣເລຍ ໄດ້ເນັ້ນໜັກເລື້ອງຄວາມປອດໄພທາງດ້ານເສດຖະກິດເປັນໝາກຫົວໃຈຂອງການໂຄສະນາຫາສຽງຂອງເຂົາເຈົ້າ.
ນາຍົກລັດຖະມົນຕີ Malcolm Turnbull ໄດ້ກ່າວຕໍ່ບັນດາຜູ້ມີສິດປ່ອນບັດວ່າ ປະເທດຊາດຕ້ອງການສະຖຽນລະພາບ ທີ່ລັດຖະບານປະສົມເປັນກາງອຽງຂວາຂອງທ່ານ ສາມາດສະໜອງຕອບໄດ້.
ແຕ່ວ່າຜູ້ນຳຝ່າຍຄ້ານຂອງພັກແຮງງານ ທ່ານ Bill Shorten ໄດ້ກ່າວຕໍ່ບັນດາຜູ້ມີສິດປ່ອນບັດວ່າ ນາຍົກລັດຖະມົນຕີເປັນຜູ້ນຳທີ່ອ່ອນແອ ຄືກັນກັບຄູ່ຕຳແໜ່ງ ຝ່າຍອັງກິດ ທີ່ໄດ້ລາອອກໄປນັ້ນ.
