ພະຍາບານຊາຍຊາວ ອອສເຕຣເລຍ ກຳລັງປະເຊີນໜ້າກັບການ ກ່າວຟ້ອງຖານສະໜັບສະໜູນ ກຸ່ມຫົວຮຸນແຮງກໍ່ການຮ້າຍຢູ່ໃນປະເທດ ຊີເຣຍ.
ທ້າວ Adam Brookman ໄດ້ຖືກກ່າວໂທດໂດຍສານຂອງນະຄອນ Melbourne ໃນວັນອາທິດມື້ນີ້ ໃນນຶ່ງກະໂທງ ທຳອິດແມ່ນມີຄວາມຕັ້ງໃຈສະໜັບສະໜູນອົງກອນກໍ່ການຮ້າຍ ແລະ ຂໍ້ທີສອງແມ່ນ “ດຳເນີນການບໍລິການ ໂດຍເຈຕະນາສະໜັບ ສະໜູນຄົນທີ່ກ່ຽວພັນໃນກິດຈະກຳມຸ່ງຮ້າຍຢູ່ໃນຕ່າງ ປະເທດ.”
ທ້າວ Brookman ອາຍຸ 39 ປີໄດ້ກັບຄືນສູ່ ອອສເຕຣເລຍ ຈາກປະເທດ ເທີກີ ໃນວັນສຸກທີ່ຜ່ານມາ ບ່ອນທີ່ລາວໄດ້ຍອມຈຳນົນຕໍ່ເຈົ້າໜ້າທີ່ໃນຕອນຕົ້ນຂອງສັບປະດາລຸນ ຫຼັງກັບຈາກ
ຊີເຣຍ. ຊາຍທີ່ເປັນພໍ່ຂອງລູກ 5 ຄົນໄດ້ກ່າວຕໍ່ສື່ມວນຊົນ ອອສເຕຣເລຍ ວ່າລາວໄດ້ເດີນ ທາງໄປປະເທດ ຊີເຣຍ ໃນພາລະກິດດ້ານມະນຸຸດສະທຳ, ເຊິ່ງເປັນບ່ອນທີ່ລາວໄດ້ຖືກບັງຄັບໃຫ້ເຂົ້າຮ່ວມໃນກຸ່ມກໍ່ການຮ້າຍຫຼັງຈາກທີ່ລາວໄດ້ຮັບບາດເຈັບ.
ທ້າວ Brookman ຈະປະກົດຕົວຢູ່ສານໃນນະຄອນ Melbourne ອີກຄັ້ງໜຶ່ງໃນວັນຈັນມື້ອື່ນນີ້.
ປະເທດ ອອສເຕຣເລຍ ກຳລັງຕົກຢູ່ພາຍໃຕ້ສັນຍານເຕືອນໄພຂັ້ນສູງເນື່ອງຈາກຄວາມເປັນຫ່ວງກ່ຽວກັບ ພວກຫົວຮຸນແຮງທີ່ເຕີບໂຕຂຶ້ນພາຍໃນປະເທດ ທີ່ໄດ້ເດີນທາງໄປຍັງຕາເວັນອອກກາງເພື່ອຕໍ່ສູ້ກັບພວກລັດອິສລາມ ຫຼື ກຸ່ມອື່ນໆຂອງພວກຫົວຮຸນແຮງ. ຕຳຫຼວດໄດ້ລົງມືໂຕ້ຕອບການໂຈມຕີກໍ່ການຮ້າຍຫຼາຍຄັ້ງໃນທົ່ວປະເທດ. ນະຍົກ ລັດຖະມົນຕີ Tony Abbott ໄດ້ນຳສະເໜີພິຈາລະນະກົດໝາຍຄວາມໝັ້ນຄົງແຫ່ງຊາດໃໝ່, ແລະ ກໍສະໜັບ ສະໜູນມາດຕະການທີ່ຈະຖອນຄົນ ອອສຕຣາເລຍ ທີ່ມີສອງສັນຊາດ.
