ເຮືອບິນທະຫານກໍາລັງສົ່ງສະບຽງບັນເທົາທຸກໄປຍັງເມືອງແຫ່ງນຶ່ງໃນລັດ Queensland ໃນພາກຕາເວັນອອກສຽງເໜືອຂອງປະເທດ ບ່ອນທີ່ມີການ ພະຍາກອນວ່າ ນໍ້າຖວມຈະສືບຕໍ່ສູງຂຶ້ນຢ່າງນ້ອຍ ໄປຮອດແລງວັນອັງຄານ ມື້ອື່ນ. ບັນດາເຈົ້າໜ້າທີ່ກ່າວວ່າ ເມືອງ Rockhampton ໄດ້ຖືກຕັດຂາດຈາກນະຄອນຫລວງ Brisbane ຂອງລັດດັ່ງກ່າວ ແລະ ອາດສາມາດຖືກນໍ້າຖ້ວມ ອ້ອມໝົດໃນໄວໆນີ້.
ໄພນໍ້າຖ້ວມ ທີ່ໄດ້ແຜ່ລາມອອກໄປຕັ້ງແຕ່ຕົ້ນສັບປະດາແລ້ວນີ້ ເວລານີ້ແມ່ນໄດ້ປົກຄຸມເນື້ອທີ່ກວ້າງປະມານເທົ່າໆກັນກັບເນື້ອທີ່ດິນທັງໝົດຂອງເຢຍຣະມັນກັບຝຣັ່ງຮວມກັນ ແລະກໍາລັງສົ່ງຜົນສະທ້ອນແກ່ປະຊາຊົນຈໍານວນຫລາຍເຖິງ 2 ແສນຄົນ.
ເຈົ້າໜ້າທີ່ລັດ ທີ່ກໍາກັບນໍາຄວາມປອດໄພຂອງປະຊາຄົມໃນ
ລັດ Queensland ກ່າວຕໍ່ວີໂອເອວ່າ ຄວາມເສຍຫາຍແມ່ນ
ກະປະມານວ່າ ຕົກເປັນຈໍານວນຫລາຍຕື້ດອນລາ ຮວມທັງຫລາຍຮ້ອຍລ້ານໃນການສູນເສຍ
ຜົນຜະລິດຈາກບໍ່ຖານຫິນແຫ່ງຕ່າງໆໃນລັດນັ້ນ. ເຈົ້າໜ້າທີ່ທ່ານນີ້ກ່າວຕໍ່ໄປວ່າມັນຈະໃຊ້
ເວລາປະມານ 2 ປີ ຈຶ່ງຈະເຮັດໃຫ້ສະພາບການໃນລັດດັ່ງກ່າວກັບຄືນສູ່ສະພາບເດີມໄດ້ ໃນບາງເຂດ.
ມີການຢືນຢັນວ່າ ມາຮອດປັດຈຸບັນນີ້ ມີຄົນເສຍຊີວິດໄປແລ້ວຜູ້ນຶ່ງ ແລະອີກ2 ຄົນ ຍັງຊອກຫາບໍ່ເຫັນໃນໄພນໍ້າຖ້ວມຄັ້ງນີ້.
