ລິ້ງ ສຳຫລັບເຂົ້າຫາ

​ ​ທ່ານນາງ ຊູຈີ ກ່າວວ່າ ການປະຕິຮູບໃນມຽນມາ ບໍ່​ແມ່ນ​ວ່າ​ ຈະ​ຕ່າວ​ປິ້ນຄືນບໍ່​ໄດ້ (ສະໄລດ໌ກັບວີດີໂອ)


ທ່ານ​ນາງ​ອອງຊານ ຊູ​ຈີ ຜູ້​ນໍາ​ພັກ​ຝ່າຍ​ຄ້ານ​ຂອງມຽນມາ ກ່າວ​ວ່າ ການ​ປະຕິ​ຮູບ​ດ້ານ​ເສດຖະກິດ​ແລະ​ການ​ເມືອງ ​ໃນ​ປະ​ເທດ​​ຂອງ​ທ່ານ​ນາງ​ນັ້ນ​ ​ບໍ່​ແມ່ນ​ວ່າ​ຈະ​ຕ່າວ​ປິ້ນຄືນບໍ່​ໄດ້​ໃນ​ເວລາ​ນີ້ ​ແຕ່​​ທ່ານ​ນາງ​ກໍ​ມີ​ກໍາລັງ​ໃຈ​ນໍາຄວາມກ້າວ ໜ້າ ​ທີ່​ເຫັນ​ກັນມາ​ເທົ່າ​ເຖິງ​ປັດຈຸບັນ​ນີ້. ຜູ້​ເຄີຍ​ໄດ້​ຮັບ​ລາງວັນ​​ໂນ​ແບລຂະ​ແໜງ​ສັນຕິພາບ​ທ່ານ​ນີ້ ​ໄດ້​​ມາ​ຢ້ຽມຢາມ​ສໍານັກງານ​ໃຫຍ່​ຂອງ​ວິທະຍຸວີ​ໂອ​ເອ ທີ່​ນະຄອນຫຼວງວໍ​ຊິງ​ຕັນ ​ໃນ​ອາທິດ​ແລ້ວ​ນີ້ ​ແລະ​ໄດ້​ໂອ້​ລົມ​ກັບ Scott Stearns ​ຜູ້​ສື່​ຂ່າວປະ​ຈໍາ ກະຊວງ​ຕ່າງປະ​ເທດ​ສະຫະລັດ. ທອງ​ປານມີ​ເລຶ່ອງນີ້​ມາສະ​ເໜີ​ທ່ານ​.

ຄວາມ​ໄວ​ຂອງ​ການ​ປ່ຽນ​ແປງ​ທາງ​ການ​ເມືອງ​ໃນ​ມຽນມາ​ຕະຫຼອດ​ ​ໄລຍະ​ສອງ​ປີຜ່ານມາ​ນີ້ ​ແມ່ນພາ​ໃຫ້​ຕື່ນ​ຕະລຶງ ຈາກ​ການ​ຍຸດ​ເຊົາກັກ​ບໍລິ​ເວນທ່ານ​ນາງ​ອອງຊານ ຊູ​ຈີ ​ໄປ​ຫາ​ການ​ເລືອກ​ຕັ້ງທ່ານ​ນາງ​ເປັນສະມາ ຊິກ​ສະພາ​ແຫ່ງ​ຊາດ ການ​ຍົກ​ເລີກ​ການ​ລົງ​ໂທດສ່ວນ​ໃຫຍ່​ຂອງ​ຝ່າຍ​ຕາ​ເວັນ​ຕົກ ​ຈົນ​ເຖິງ​ການ​ປ່ອຍ​ຕົວ​ພວກ​ນັກ​ໂທດ​ການ​ເມືອງ​ຫຼາຍ​ກວ່າ 500 ຄົນ​ໃນ​ອາທິດແລ້ວນີ້.

​ແຕ່​ຜູ້​ນໍາ​ປະຊາທິປະ​ໄຕ ກ່າວ​ວ່າ ການ​ຜັນ​ປ່ຽນ​ຂອງ​ມຽນມາ ບໍ່​ແມ່ນ​ວ່າ​ຈະຕ່າວ​ປິ້ນບໍ່​ໄດ້ ​ຄື ຍັງ​ສາມາດ​ຕ່າວ​ປີ້ນຄືນ​ໄດ້​ຢູ່ ຈົນ​ກ່ວາ​ວ່າຝ່າຍ​ກອງທັບ​ຈະ​ໝາຍ​ໝັ້ນ​ຕົນ​ເອງ ຕໍ່​ການ​ປ່ຽນ​ແປງ​ຢ່າງ​ສິ້ນ​ເຊີງ.

ທ່ານ​ນາງ​ກ່າວ​ວ່າ: “ພາຍ​ໃຕ້​ລັດຖະທໍາ​ມະນູ​ນຊຸດ​ປັດຈຸບັນ​ນີ້ ຝ່າຍ​ທະຫານ​​ແມ່ນ ສາມາດ​ຍຶດອໍານາດ​​ ເຂົ້າ​ຄວບ​ຄຸມໄດ້​ໝົດ​ທຸກ​ສ່ວນ​ຂອງ​ລັດຖະ ບານ ຖ້າ​ຫາກ​ພວກ​ເຂົາ​ເຈົ້າ​ເຫັນ​ວ່າ​ຈໍາ​ເປັນ. ສະ​ນັ້ນ​ ຈົນ​ກວ່າ​ວ່າຝ່າຍ​ທະຫານ​ຈະ​ອອກ​ມາໃຫ້ ການ​ສະໜັບສະໜຸນ​ຢ່າງ​ແຈ້ງ​ຂາວ​ແລະຢ່າງ​ສະ​ເໝີ​ຕົ້ນ​ສະ​ເໝີ​ປາຍ ຕໍ່​ຂັ້ນ​ຕອນ​ສ້າງຕັ້ງປະຊາທິປະ​ໄຕ​ນີ້ແລ້ວ ພວກ​ເຮົາ​ກໍ​ເວົ້າ​ບໍ່​ໄດ້​ວ່າ​ ມັນ​ຈະ​ບໍ່​ຕ່າວ​ປິ້ນຄືນ ​ແຕ່​ຂ້າພະ​ເຈົ້າ​ກໍຄິດວ່າ​ ພວກ​ເຮົາ​ບໍ່​ຈໍາ​ເປັນ​ຕ້ອງຢ້ານຫລາຍວ່າ ມັນ​ຈະ​ຕ່າວ​ປິ້ນຄືນ.”

ທະຫານ​ໄດ້​ປົກຄອງ​ມຽນມາ​ມາ​ໄດ້​ຫຼາຍ​ສິບ​ປີ ​ແລະໄດ້​ທໍາ​ການ​ປາບ​ປາມ ການ​ຄັດຄ້ານ​ທັງ​ໝົດ. ຍ້ອນ​ສາ​ເຫດ​ນັ້ນ ສະຫະລັດ​ແລະ​ຫຼາຍໆ​ປະ​ເທດ​ຈຶ່ງ​ໄດ້​ນໍາ​ໃຊ້ມາດຕະການ​ລົງ​ໂທດ ​ຕໍ່​ລັດຖະບານ​ມຽນມາ.

ການ​ເລືອກ​ຕັ້ງ​ໃນ​ປີ 2010 ​ໄດ້​ນໍາ​ເອົາ​ຜູ້​ນໍາ​ການ​ເມືອງ​ໜ້າ​ໃໝ່​ເຂົ້າ​ມາ ​ພວກ​ທີ່ເຖິງ​ແມ່ນ​ວ່າ​ເປັນ​ພົນລະ​ເຮືອນ​ກໍ​ຕາມ ​ແຕ່​ກໍມີ​ຄວາມ​ສໍາພັນທີ່​ໃກ້ຊິດ​ກັບ​ກອງທັບ. ​ແຕ່​ຢ່າງ​ໃດ​ກໍ​ຕາມ ລັດຖະບານ​ຊຸດ​ໃໝ່​ຂອງ​ມຽນມາ​ກໍ​ໄດ້ ຄ່ອຍໆດໍາ​ເນີນ​ການ​ປະຕິ​ຮູບທາງ​ການ​ເມືອງ​ແລະ​ເສດຖະກິດ​ໄປ​ເລື້ອຍໆ ທີ່​ຍັງຜົນ​ໃຫ້​ສະຫະລັດເລີ້ມຜ່ອນຜັນ​ການ​ລົງ​ໂທດຕໍ່​ມຽນມາ ​ໂດຍ​ໄວ.

​ໃນ​ການ​ໃຫ້​ສໍາພາດຢູ່ສໍານັກງານ​ໃຫຍ່ຂອງ​ວີ​ໂອ​ເອທີ່​ວໍ​ຊິງ​ຕັນ​ເມື່ອ​ວັນ​ອັງ ຄານ​ອາທິດ​ແລ້ວ​ນີ້ ທ່ານ​ນາງ​ອອງຊານ ຊູ​ຈີ ​ເວົ້າ​ວ່າ ທ່ານ​ນາງ​ສະໜັບ ສະ​ໜຸນການ​ຍົກ​ເລີກ​ການ​ລົງ​ໂທດ​ດ້ານ​ການ​ຄ້າຂອງ​ສະຫະລັດ​ຕໍ່​ມຽນມາ ຍ້ອນ​ວ່າ ມັນ​ເຖິງ​ເວລາ​ແລ້ວ ສໍາລັບ​ຊາວ​ມຽນມາ​ຈະ​ເພິ່ງ​ພາ​ຕົນ​ເອັງ​ໄດ້.

ທ່ານ​ນາງ ຊູ​ຈີ​ເວົ້າ​ວ່າ: “ມີຫຼາຍ​ຝ່າຍ​ອ້າງ​ວ່າ ການ​ລົງ​ໂທດ​ຕໍ່​ມຽນມາ​ນັ້ນ ​ແມ່ນ​ໄດ້​ສ້າງ​ຄວາມ​ເດືອດຮ້ອນ​ໃຫ້​ແກ່​ເສດຖະກິດ​ຂອງມຽນມາ​ຢ່າງ​ໜັກ ຊຶ່ງຂ້າພະ​ເຈົ້າບໍ່​ເຫັນ​ພ້ອມ​ນໍາທັດສະນະ​ດັ່ງກ່າວນັ້ນ. ຖ້າ​ເຮົາ​ສຶກສາ​ເບິ່ງ​ລາຍງານ​ຂອງ​ກອງ​ທຶນ​ສາກົນ ຫຼື IMF ຍົກຕົວຢ່າງ​ເນາະ IMF ​ໄດ້​ລະບຸ​ອອກ​ມາຢ່າງ​ແຈ້ງຂາວ​ວ່າ​ ຜົນ​ກະທົບ​ຕໍ່ເສດຖະກິດ​ຂອງ​ມຽນມາ​ບໍ່​ຮຸນ​ແຮງ​ເຖິງ​ປານນັ້ນ. ​ແຕ່​ຂ້າພະ​ເຈົ້າຄິດ​ວ່າ​ ຜົນ​ກະທົບ​ຕໍ່​ດ້ານ​ການ​ເມືອງ​ແມ່ນຮຸນ​ແຮງ​ຫຼາຍກວ່າ ແລະ​ນັ້ນ​ແມ່ນໄດ້​ຊ່ວຍໃນ​ການ​ດິ້ນຮົນຕໍ່ສູ້ຂອງ​ພວກ​ເຮົາ.”



.
ທ່ານ​ນາງ ອອງຊານ ຊູ​ຈີ ​ໃນ​ຖານະ​ຜູ້​ນໍາຝ່າຍ​ຄ້ານ ກໍ​ຄື​ພັກ​ສັນນິບາດ ​ແຫ່ງ​ຊາດ​ເພື່ອ​ປະຊາທິປະ​ໄຕນັ້ນ ​ໄດ້​ໃຊ້​ເວລາເກືອບ 20 ປີ ດໍາລົງ​ຊີວິດ​ຢູ່​ພາຍ​ໃຕ້​ການ​ຖືກ​ກັກ​ບໍລິ​ເວນ. ທ່ານ​ນາງ​ກ່າວ​ວ່າ ໃນ​ຊ່ວງຊຸມ​ປີ​ເຫລົ່າ​ນັ້ນ ທ່ານ​ນາງ​ເຊື່ອ​ຢູ່ຕະຫລອດມາວ່າ ທ່ານ​ນາງກໍາລັງກ້າວ​ເດີນໄປບົນເສັ້ນ ທາງ​ ທີ່​ທ່ານ​ນາງ​ໄດ້​ເລືອກ​ເອົາ ​ຊຶ່ງຊ່ວຍ​ໃຫ້​ທ່ານ​ນາງ​ໄດ້ມີ​ການ​ຕຽມຕົວ ​ຢ່າງ​ດີ​ເລີດ ​ເພື່ອ​ກ້າວ​ເດີນ​ໄປ​ບົນ​ເສ້ນ​ທາງ​ນັ້ນ ຕໍ່​ໄປ.

​ນັກ​ຂ່າວ​ວີ​ໂອ​ເອ​ໄດ້​ຖາມ​ທ່ານ​ນາງ ຊູ​ຈີ ວ່າ ທ່ານ​ນາງຈະເວົ້າ​ແນວ​ໃດຕໍ່ ປະຊາຊົນ​ໃນ​ປະ​ເທດ​ອື່ນໆ ທີ່​ຕົກ​ຢູ່​ພາຍ​ໃຕ້​ສະຖານະ​ການ​ທໍານອງ​ດຽວ​ກັນ ທີ່​ໄດ້​ຍົກ​ເອົາ​ທ່ານ​ນາງ​ເປັນ​ສິ່ງດົນ​ບັນດານໃຈ​ນັ້ນ?

ທ່ານ​ນາງ​ ຊູ​ຈີ ຕອບ​ວ່າ: “ກ່ອນ​ອື່ນ​ໝົດ ຂ້າພະ​ເຈົ້າ​ຈະເວົ້າວ່າ ຈົ່ງ​ຢ່າ​ສິ້ນ​ຫວັງ. ໃນ​ຂະນະ​ດຽວກັນ​ ຂ້າພະ​ເຈົ້າກໍ​ຈະເວົ້າ​ວ່າ ບໍ່​ມີ​ຄວາມ​ຫວັງ​ໃດໆ​ທີ່​ປາດ​ສະ​ຈາກ​ຄວາມ​ບາກ​ບັ່ນພະຍາຍາມ. ​ເຮົາ​ຕ້ອງ​ຕັ້ງໜ້າ​ທໍາ​ງານ ​ເຮົາ​ຕ້ອງ​ມີ​ຄວາມ​ບຸກບືນ ພະຍາຍາມ. ຈະ​ນັ່ງແລະຫວັງ​ຢ່າງດຽວ​ບໍ່​ໄດ້ ​ເຮົາ​ຕ້ອງ​ທໍາ​ງານ​ເພື່ອ​ເຮັດໃຫ້​ຄວາມ​ຫວັງ​ຂອງ​ພວກ​ເຮົາ ​ເປັນຄວາມ​ຈິງ​ຂຶ້ນ​ມາ.”

​ໃນ​ອາທິດ​ທໍາ​ອິດ ຄື​ອາທິດ​ແລ້ວ​ນີ້ ​ຂອງການ​ຢ້ຽມຢາມ​ສະຫະລັດ​ເທື່ອ​ທໍາ​ອິດ​ຂອງ​ທ່ານ​ນາງ​ໃນ​ໄລຍະ​ຫຼາຍ​ກວ່າ 20 ປີນັ້ນ ທ່ານ​ນາງ​ ອອງຊານ ຊູ​ຈີ ​ໄດ້​ຮັບ​ຫຼຽນ​ຄໍາ​ກຽດຕິຍົດອັນ​ສູງ​ສົ່ງ​ສໍາລັບ​ພົນລະ​ເຮືອ​ນຂອງລັດຖະສະ ພາສະຫະລັດ ​ໄດ້​ພົບ​ປະກັບປະທານາທິບໍດີ ບາ​ຣັກ ​ໂອ​ບາ​ມາ ​ແລະ​ໄດ້​ເປັນແຂກ​ໃນງານ​ລ້ຽງ​ອາຫານ​ຄໍ່າ​ ທີ່​ເປັນທ່ານ​ນາງ ຮິ​ລ​ແລຣີ ຄລິນ​ຕັນ ລັດຖະມົນຕີ​ຕ່າງປະ​ເທດ​ສະຫະລັດ ​ໄດ້​ຈັດ​ຂຶ້ນ​ເພື່ອ​ເປັນ​ກຽດ​ໃຫ້​ທ່ານ​ນາງ.
ນອກ​ນັ້ນ​ແລ້ວ ທ່ານ​ນາງ​ຍັງ​ໄດ້​ພົບ​ປະ​ກັບ​ປະຊາ​ຄົມ​ມຽນມາ​ໃນ​ເຂດ​ນະຄອນຫລວງ​ວໍ​ຊິງ​ຕັນ ​ແລະ​ໄດ້​ຮັບ​ລາງວັນ​ກຽດຕິຍົດ​ອີກ​ຫລາຍໆ​ອັນ.



XS
SM
MD
LG