ປະທານາທິບໍດີ ຊີເຣຍ ທ່ານ Bashar al-Assad ໄດ້ກ່າວໃນວັນອາທິດວານນີ້ວ່າ ພາກພື້ນຕາເວັນອອກກາງຈະຖືກທຳລາຍທັງ ໝົດຖ້າການຍິງລະດົມທາງອາກາດຂອງ ຣັດເຊຍ ຕໍ່ພວກຫົວຮຸນແຮງທີ່ຕໍ່ຕ້ານລັດຖະບານຂອງທ່ານບໍ່ໄດ້ປະສົບຜົນສຳເລັດ.
ທ່ານ Assad ໄດ້ກ່າວຕໍ່ໂທລະພາບລັດຖະບານຂອງ ອີຣ່ານວ່າ “ການເປັນພັນທະມິດລະຫວ່າງ ຣັດເຊຍ, ຊີເຣຍ, ອີຣັກ ແລະ ອີຣ່ານ ຕ້ອງປະສົບຜົນສຳເລັດ ຫຼືບໍ່ດັ່ງນັ້ນ ພາກພື້ນທັງໝົດກໍຈະຖືກທຳລາຍ.”
ແຕ່ທ່ານໄດ້ກ່າວເພີ່ມເຕີມວ່າ “ໂອກາດຂອງຄວາມສຳເລັດ ສຳລັບການເປັນພັນທະມິດນີ້ແມ່ນຍິ່ງໃຫຍ່ ແລະ ບໍ່ໄດ້ເປັນເລື່ອງເລັກນ້ອຍເລີຍ.”
ຂໍ້ຄວາມຂອງທ່ານ Assad ໄດ້ມີຂຶ້ນຫຼັງຈາກ ຣັດເຊຍ ໄດ້ໂຈມຕີ ທາງອາກາດໃສ່ພວກ ຕໍ່ຕ້ານລັດຖະບານຮຸນແຮງຂຶ້ນ. ມອສໂກ ໄດ້ປະກາດ ວ່າ ຕົນໄດ້ດຳເນີນພາລະກິດ 20 ຄັ້ງໂດຍແນເປົ້າ ໃສ່ຄ້າຍຝຶກຊ້ອມ, ຄັງອາວຸດ ແລະ ສະຖານ ບັນຊາການຂອງ ພວກຫົວ ຮຸນແຮງ ລັດອິສລາມ ໃນມື້ທີ່ຜ່ານມາໃນແຂວງ Idlib.
ເຖິງຢ່າງໃດກໍຕາມ, ສະຫະລັດ ໄດ້ກ່າວຫາ ຣັດເຊຍວ່າ ໃຫ້ການ ສະໜັບສະໜູນທ່ານ Assad ໂດຍແນເປົ້າໃສ່ຜູ້ຕໍ່ຕ້ານລັດຖະບານ ຂອງທ່ານທີ່ໜູນຫຼັງໂດຍປະເທດ ຕາເວັນ ຕົກ, ແທນທີ່ຈະເປັນພວກ ຫົວຮຸນແຮງ ລັດອິສລາມ ທີ່ພັນທະມິດນຳໜ້າໂດຍ ສະຫະລັດ ໄດ້ຖິ້ມ ລະເບີດໃສ່ມາດົນກວ່າໜຶ່ງປີນັ້ນ.
ປະທານາທິບໍດີ ສະຫະລັດ ທ່ານ ບາຣັກ ໂອບາມາ ໄດ້ກ່າວ ໃນວັນສຸກທີ່ຜ່ານມາວ່າ ສະຫະລັດ ຈະບໍ່ເຮັດ “ສົງຄາມຕົວ ແທນ” ກັບ ຣັດເຊຍ ໃນ ຊີເຣຍ. ແຕ່ຄູ່ປໍລະປັກ ຫົວໜ້ານະໂຍ ບາຍຕ່າງປະເທດ ຂອງທ່ານ ໂອບາມາ, ສະມາຊິກສະພາ ທ່ານ John McCain, ໄດ້ກ່າວຕໍ່ໂທລະພາບ CNN ໃນວັນອາທິດ ວານນີ້ວ່າ “ແນ່ນອນ” ວໍຊິງຕັນ ແລະ ມອສໂກ ແມ່ນຕຽມພ້ອມ ຢ່າງຈິງຈັງໃນການມີສ່ວນ ຮ່ວມກັບການຕໍ່ສູ້ໃນ ຊີເຣຍ.
ທ່ານ McCain ສະມາຊິກສະພາສູງລັດ Arizona ທີ່ໄດ້ພ່າຍແພ້ ໃນການເລືອກຕັ້ງປະທາ ນາທິບໍດີໃຫ້ກັບທ່ານ ໂອບາມາ ໃນປີ 2008 ໄດ້ກ່າວວ່າ “ພວກເຮົາບໍ່ມີແຜນຍຸດທະ ສາດ” ໃນ ຊີເຣຍ. ທ່ານກ່າວວ່າ ຣັດເຊຍ, ໂດຍການລິເລີ່ມການໂຈມຕີທາງອາກາດຂອງພວກເຂົາເຈົ້າໃນ ຊີເຣຍ ສັບປະດາທີ່ຜ່ານມາ ພ້ອມດ້ວຍການປະກາດຕໍ່ ວໍຊິງຕັນ ພຽງບໍ່ເທົ່າໃດຊົ່ວໂມງກ່ຽວກັບຄວາມຕັ້ງໃຈຂອງພວກເຂົາ, ແມ່ນ “ການປະຕິບັດຕໍ່ ສະຫະລັດ ດ້ວຍການໝິ່ນປະໝາດ ແລະ ການດູຖູກ.”
