ລິ້ງ ສຳຫລັບເຂົ້າຫາ

ນັກສັງເກດເອເຊຍ ບໍ່ຄາດວ່າ ນະໂຍບາຍ ການຕ່າງປະເທດ ຈະປ່ຽນແປງ ເຖິງແມ່ນຜູ້ໃດ ຈະເປັນປະທານາທິບໍດີກໍຕາມ


ການ​ໂຄສະນາ​ຫາ​ສຽງ​ທີ່​ວິພາກ​ວິຈານກັນ ​ກ່ຽວກັບ​ຂໍ້​ຕົກລົງດ້ານ​ການ​ຄ້າ​ນາໆ​ຊາດ ​ແລະ​ການ​ຂົ່ມຂູ່​ວ່າຈະຖອນ​ທະຫານອອກ​ຈາກ​ເອ​ເຊຍ ​ແມ່ນ​ບໍ່​ໄດ້​ຖືເປັນເລື້ອງສຳຄັນສຳລັບ​ພວກ​ສັງ​ເກດ​ການ​ໃນ​ຂົງ​ເຂດດັ່ງກ່າວ ຜູ້​ຊຶ່ງ​ເວົ້າ​ວ່າ​ ຜົນ​ປະ​ໂຫຍ​ດຂອງ​ສະຫະລັດ​ໃນ​ຂົງ​ເຂດ​ແມ່ນ​ຍັງຄົງມີ​ສືບ​ຕໍ່ ​ແລະ​ບັນຫາ​ຕ່າງໆທີ່ຈະ​ປະ​ເຊີນ​ໜ້າ​ກັບ​ປະທານາທິບໍດີ ​ຄົນ​ຕໍ່​ໄປ ກໍແມ່ນ​ຍັງ​ເປັນເລື້ອງ​ສະ​ຫຼັບ​ສັບ​ຊ້ອນຢູ່. ນັກຂ່າວ VOA Brian Padden ມີ​ລາຍ​ງານ​ຈາກ​ນະຄອນ​ຫຼວງ Seoul ຊຶ່ງ​ວັນນະ​ສອນ​ຈະ​ນຳເອົາ​ລາຍ​ລະອຽດ​ມາສະ​ເໜີ​ທ່ານ.


​ຕົວ​ແທນ​ຂອງທັງສອງ​ພັກ ຄືທ່ານ Donald Trump ສັງກັດ​ພັກ Republican ​ແລະ​ທ່ານ​ນາງ Hillary Clinton ຈາກ​ພັກ Democrats ​ຕ່າງກໍຕິຕຽນຢ່າງ​ແຂງ​ຂັນ​ນະ​ໂຍບາຍການ​ຄ້າເສລີ ​ໂດຍ​ສະ​ເພາະ​ເລື້ອງພາຄີການຄ້າຂ້າມມະຫາສະໝຸດປາຊີຟິກ Trans Pacific Partnership (TPP) ທີ່​ຍັງຈະຕ້ອງໄດ້ຮັບສັດຕະຍາບັນຢູ່ນັ້ນ.​

ໃນຕອນຫົວທີ ທ່ານ​ນາງ Clinton ໄດ້ສະໜັບສະໜຸນ ​ຂໍ້​ຕົກລົງການ​ຄ້າເສລີເອເຊຍນີ້ ​ເພື່ອຕ້ານອຳນາດ​ການ​ເຕີບ​ໂຕ​ຂອງ​ເສດຖະກິດ​ຈີນ ​ແຕ່​ແລ້ວ ​ກໍໄດ້​ປ່ຽນ​ທິດທາງ​ຂອງ​ທ່ານ​ນາງ ​ໃນ​ຕອນ​ໂຄສະນາ​ຫາ​ສຽງ.

ສ່ວນ ທ່ານ Trump ແມ່ນ​ໄດ້​ຂົ່ມຂູ່​ວ່າ ​ຈະ​ຕອບ​ໂຕ້ ​ດ້ວຍ​ການ​ເພີ້​ມພາສີ​ຕໍ່​ສິນຄ້າ​ຈາກ​ຈີນ ຊຶ່ງພາໃຫ້ບັນດາ​ນັກ​ເສດຖະສາດເຕືອນວ່າໃຫ້ລະວັງ ​ວ່າການ​ເອົາ​ບາດກ້າວ​ທີ່​ວ່າ​ນີ້ ຈະ​ກາຍເປັນສົງຄາມ​ການ​ຄ້າ ທີ່​ທັງ​ສອງ​ຝ່າຍ​ຈະ​ເສຍ​ຫາຍທາງດ້ານເສດຖະກິດ.

ພາບຈາກ ວັນທີ 3 ກັນຍາ 2016, ຮູບຈາກລັດຖະບານຟິລິບປີນ ທີ່ສະແດງໃຫ້ເຫັນ ເຮືອລາດຖະເວນຂອງຈີນ ໃນເກາະ Scarborough ໃນທະເລຈີນໃຕ້.

ພາບຈາກ ວັນທີ 3 ກັນຍາ 2016, ຮູບຈາກລັດຖະບານຟິລິບປີນ ທີ່ສະແດງໃຫ້ເຫັນ ເຮືອລາດຖະເວນຂອງຈີນ ໃນເກາະ Scarborough ໃນທະເລຈີນໃຕ້.

ແຕ່​ວ່າ ອາຈານ Kim Hyun-Wook ຈາກ​ສະ​ຖາ​ບັນ​ການ​ທູດ​ແຫ່ງ​ຊາດ​ຂອງ​ເກົາຫຼີ ຄາດ​ຫວັງ​ວ່າ ​ບໍ່ວ່າ​ຜູ້​ໃດ​ຈະ​ຊະນະການເລືອກຕັ້ງ​ກໍ​ຕາມ ປະທານາທິບໍດີ​ຄົນ​ຕໍ່​ໄປ ກໍຈະ​ຕ້ອງຢາກ​ໃຫ້​ມີ​ຄວາມ​ແຂງ​ແກ່ນ​ທາງ​ທະຫານ ຢູ່​ຕໍ່ໄປໃນ​ຂົງ​ເຂດ.

“​ແນ່ນອນ ອິງ​ຕາມ​ນະ​ໂຍບາຍ​ຂອງຜູ້​ລົງ​ແຂງ​ຂັນແຕ່ລະຄົນຕໍ່​ຂົງ​ເຂດ​ເອ​ເຊຍແລ້ວ​ນັ້ນ ​ໂດຍ​ສະ​ເພາະ ຕໍ່​ເກົາຫຼີໃຕ້ ຜູ້​ຊຶ່ງ​ເປັນ​ພັນທະ​ມິດ ຄູ່​ພາຄີ​ຂອງ​ພວກ​ເຂົາ​ເຈົ້າແມ່ນວ່າ ມັນ​ອາດ​ຈະ​ມີ​ຄວາມ​ເຄັ່ງ​ຕຶງ​ຢ່າງ​ໃດ​ຢ່າງ​ນຶ່ງ ພ້ອມ​ທັງ​ການ​ປັບ​ປ່ຽນ ​ພ້ອມທັງການຄັດ​ເກົານຳ ​ແຕ່ຂ້າພະ​ເຈົ້າ​ຄິດ​ວ່າ ການ​ເປັນ​ພັນທະ​ມິດ​ນັ້ນ​ຍັງ​ຄົງ​ຈະມີຄວາມ​ແຂງ​ແກ່ນ​ຢູ່, ດັ່ງທີ່ ທ່ານ Kim ​ໄດ້ເວົ້າໄປ​ນັ້ນ​.”

​ຍັງ​ມີ​ກອງ​ກຳລັງ​ທະຫານ​ອາ​ເມຣິກັນຢູ່ ​ເກືອບ 10 ພັນ​ຄົນ ​ໃນ ອັຟກາ​ນິສຖານ ທີ່​ປະຕິບັດ​ໜ້າ​ທີ່​ຕໍ່ຕ້ານ​ກຸ່ມ​ກໍ່​ການ​ຮ້າຍ ​ແລະ​ການ​ຝຶກ​ອົບຮົມ​ອື່ນ​ໆ.

ກອງ​ກຳລັງທີ່​ວ່າ​ນີ້ ​ແມ່ນ​ມີ​ກຳໜົດ​ວ່າ​ຈະ​ຖືກ​ຖອນ​ອອກ​ ເມື່ອໃດ​ກອງ​ກຳລັງ​ຮັກສາ​ຄວາມ​ປອດ​ໄພ​ຂອງ​ອັຟກາ​ນິສຖານ ຫາກຖືກ​ສົ່ງ​ໄປ​ປະຕິບັດ​ການແທນ. ​ແຕ່​ວ່າ​ກຸ່ມ​ກໍ່​ການ​ຮ້າຍ​ຕາ​ລີບານ ​ແມ່ນ​ໄດ້​ຍຶດ​ເອົາ​ຫຼາຍໆ​ຂົງ​ເຂດຂຶ້ນຕື່ມ​ໃນ​ຮອບ​ປີ​ກາຍນີ້.

ທ່ານ Xie Tao ຈາກ​ມະຫາວິທະຍາ​ໄລ​ປັກ​ກິ່ງ ຂະແໜງການ​ສຶກ​ສານາໆ​ຊາດ ຄາດ​ຫວັງ​ວ່າ ການ​ຕຳ​ນິຕິ​ຕຽນ​ນີ້ ​ຈະ​ອ່ອນ​ຂໍ້​ລົງ ຫຼັງ​ຈາກ​ການ​ເລືອກ​ຕັ້ງ ​ເມື່ອ​ຢ້ອນ​ກັບຄືນ​ໄປຫາການ​ໂຄສະນາຫາສຽງ​ໃນ​ປີ 1992 ຕອນ​ທີ່​ທ່ານ Bill Clinton ເອີ້ນ​ພວກ​ຜູ້ນຳ​ຈີນ​ວ່າ “ພວກຄົນ ຂ້າສັດ​ໃນ​ປັກ​ກິ່ງ.”

ທ່ານ Xie ກ່າວ​ວ່າ “ແຕ່ແລ້ວ ກໍ​ເບິ່ງ​ແມ໋ະ ມັນ​ມີ​ຫຍັງ​ເກີດ​ຂຶ້ນ ຫຼັງ​ຈາກໄດ້​ເປັນ​ປະທານາ
ທິບໍດີ​ແລ້ວ. ໃນຕອນ​ເລີ່​ມຕົ້ນກໍເບິ່ງຄືວ່າບໍ່​ສູ້​ຈະ​ດີ ​ແຕ່ຫຼັງ​ຈາກ ປີ 1994 ຕອນ​ທີ່​ທ່ານ​ຕັດສິນ​ໃຈ​ທີ່​ຈະ​ບໍ່ເອົາເລື້ອງ​ມະນຸດສະທຳ​ກັບ​ການຄ້າ​ພົວພັນກັນແລ້ວ ມັນ​ກໍ​ເປັນ​ການ
​ດຳ​ເນີນ​ໄປ​ດ້ວຍ​ດີ ເລື້ອງ​ສາຍ​ພົວພັນຈີນ ກັບສະຫະລັດ.”

ທະຫານມາຣີນ ຂອງເກົາຫຼີໃຕ້ ແລະສະຫະລັດ ຢູ່ປະຈຳການຢູ່ເທິງຄວັນໃນການສະຫຼອງຄັ້ງທີ 66 ໃນ Incheon, ເກົາຫຼີໃຕ້, 9 ກັນຍາ, 2016.

ທະຫານມາຣີນ ຂອງເກົາຫຼີໃຕ້ ແລະສະຫະລັດ ຢູ່ປະຈຳການຢູ່ເທິງຄວັນໃນການສະຫຼອງຄັ້ງທີ 66 ໃນ Incheon, ເກົາຫຼີໃຕ້, 9 ກັນຍາ, 2016.

ໃນ​ດ້ານການຕໍ່ຕ້ານການ​ຂົ່ມ​ຂູ່​ໂດຍອາວຸດ​ນິວ​ເຄລຍຂອງ​ເກົາຫຼີ​ເໜືອນັ້ນ ທ່ານ​ນາງ Clinton ແມ່ນຍັງ​ສະໜັບສະໜຸນ​ພາຄີ​ທາງ​ທະຫານທີ່ເຂັ້ມແຂງ ​ໃນ​ຂົງ​ເຂດ ​ແລະ​ການ​ປະສານ​ງານ​ຮ່ວມ​ກັບ​ຈີນ ​ເພື່ອ​ເພີ່ມ​ການລົງ​ໂທດຢ່າງ​ແຂງ​ຂັນຂຶ້ນ.

ສ່ວນ ທ່ານ Trump ​ກ່າວ​ວ່າ ທ່ານ​ຈະ​ຮຽກຮ້ອງ​ໃຫ້ ຈີນ​ກົດ​ດັນທາງດ້ານ​ເສດຖະກິດ​ ທີ່​ໃຫ້ມີການ​ຍົກ​ເລີກ​ໂຄງການ​ອາວຸດ​ນິວ​ເຄລຍ.

ນອກນັ້ນ ທ່ານ​ຍັງ​ໄດ້​ກ່າວ​ວ່າ ທ່ານ​ຢາກໃຫ້​ເກົາຫຼີ​ໃຕ້ ​ແລະ​ຍີ່ປຸ່ນ ​ຈ່າຍ​ເງິນ​ໃຫ້ກອງ​ກຳລັງ​ສະຫະລັດ ​ໃນ​ປະ​ເທດ​ຂອງ​ພວກ​ເຂົາ​ເຈົ້າຫຼາຍຂຶ້ນ ຫຼືບໍ່​ ທ່ານ​ກໍອາດ​ຈະ​ເອົາ​ພວກ​ທະຫານ​ກັບ​ຄືນ​ບ້ານ​ແລ້ວປ່ອຍໃຫ້​ພັນທະມິດ​ທັງຫຼາຍ​ຈັດຕັ້ງໂຄງການ​ອາວຸດ​ນິວ​ເຄລຍຂອງ​ຕົນ​ຂຶ້ນມາເອງ.​

ກອງກຳລັງພິເສດຕຽມພ້ອມທີ່ຈະຮັບມືກັບ ກຸ່ມຕາລິບານ ຢູ່ຂ້າງນອກເມືອງ Lashkar Gah ເມືອງຫຼວງຂອງແຂວງ Helmand, ອັຟການິສຖານ, 10 ຕຸລາ 2016.

ກອງກຳລັງພິເສດຕຽມພ້ອມທີ່ຈະຮັບມືກັບ ກຸ່ມຕາລິບານ ຢູ່ຂ້າງນອກເມືອງ Lashkar Gah ເມືອງຫຼວງຂອງແຂວງ Helmand, ອັຟການິສຖານ, 10 ຕຸລາ 2016.

​ການ​ຕໍ່​ລອງ​ໃນ​ຫວ່າງ​ມໍ່ໆ​ມາ​ນີ້ ລະ​ຫວ່າງພວກ​ຜູ້ນຳ​ອັຟກາ​ນິສຖານກັບ ກຸ່ມຕາ​ລິ​ບານ ​ແມ່ນ​ໄດ້​ລົ້ມ​ແຫຼວ ບໍ່​ມີ​ຄວາມ​ຄືບ​ໜ້າ ​ແຕ່​ຢ່າງ​ໃດ.

​ແຕ່​ວ່າ ນັກວິ​ໄຈ​ປາ​ກິ​ສຖານ ທ່ານ Mosharraf Zaidi ກ່າວ​ວ່າ ພວກ​ຜູ້ນຳອັຟກາ​ນິສຖານ ​ແລະ​ສະຫະລັດ ຍັງ​ເປັນ​ຫ່ວງ​ເປັນ​ໃຍ ທີ່​ພົວພັນ​ກັບ ປາ​ກິ​ສຖານ ​ເຖິງ​ແມ່ນ​ວ່າ ພວກ​ຜູ້ນຳກຸ່ມຕາ​ລີ​ບານ ຍັງ​ໃຊ້​ສະຖານ​ທີ່​ດັ່ງກ່າວ​ເປັນ​ທີ່​ລີ້​ຊ້ອນຢູ່ກໍຕາມ​.

ທ່ານ Mosharraf ນັກ​ຂຽນ ກ່າວ​ວ່າ “ຂ້າພະ​ເຈົ້າ​ຢ້ານກົວ​ວ່າ ​ເຖິງ​ທ່ານ​ນາງ Clinton
ຈະ​ໄດ້​ເປັນ​ປະທານາທິບໍດີ ຫຼື ທ່ານ Trump ຈະໄດ້ເປັນ ກໍ​ຕາມ ຂ້າພະ​ເຈົ້າ​ຄິດ​ວ່າ ສະຫະ ລັດ ຈະ​ສືບ​ຕໍ່ ປະ​ເຊີນໜ້າກັບ​ຄວາມ​ຫຍຸ້ງຍາກຕໍ່​ການ​ປະຕິບັດ​ການ ​ແລະ​ຊອກຫາ​ວິທີ​ທາງ​ທີ່​ຈະ​ເຮັດ ​ໃນ ອັຟກາ​ນິສຖານ ສ່ວນ​ນຶ່ງ​ກໍ​ແມ່ນ​ວ່າ ການ​ເຂົ້າ​ຂ້າງ​
ອອກ​ຂາ ​ໃນ​ວໍ​ຊີງ​ຕັນ ຕໍ່ປາ​ກິ​ສຖານ.”

ທັງທ່ານ Trump ແລະທ່ານ​ນາງ Clinton ຕ່າງກໍ​ບໍ່ມີຜູ້ໃດສະໜັບສະໜູນຢາກ​ສົ່ງ​ກອງ​ກຳລັງ​ທະຫານສະຫະລັດ ​ໄປ​ຍັງ ອັຟກາ​ນິສຖານ ຈັກຄົນ.

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG