ທ່ານນາງ Yoo-Leen Nyoo ແມ່ນເປັນຜູ້ທີ່ຄາດວ່າຈະເປັນຄົນອາເມຣິກັນ ເຊື້ອສາຍເອເຊຍ ຜູ້ທຳອິດ ທີ່ຈະໄດ້ເປັນຕົວແທນ ຂອງເຂດເກາະ Manhattan ຢູ່ໃນສະພານິຕິບັດຍັດຂອງລັດ. ການມີຊື່ສຽງຂຶ້ນມາຂອງທ່ານນາງແມ່ນພື້ນຖານຫຼັກທີ່ສຳຄັນໃນຖານະຜູ້ສະໝັກ ທ້ອງຖິ່ນນັ້ນກໍຄືຄວາມໂປ່ງໃສແລະການເປັນຕົວແທນເພີ້ມຂຶ້ນຂອງທ່ານນາງໃນເຂດຂອງທ່ານນາງ ຊຶ່ງ Ramon Taylor ນັກຂ່າວ VOA ມີລາຍງານກ່ຽວກັບເລື່ອງນີ້ ແລະວັນສະ ສອນ ຈະນຳມາສະເໜີທ່ານ ໃນອັນດັບຕໍ່ໄປ.
ທ່ານນາງ Yuh-Line Niou ຜູ້ຊຶ່ງເກີດທີ່ໄຕ້ຫວັນ ແມ່ນກຳລັງລໍຄອຍຖ້າດ້ວຍໃຈຈົດຈໍ່
ເຖິງມື້ລົງຄະແນນສຽງເລືອກຕັ້ງໃນວັນທີ 8 ພະຈິກ ຄືກັນ ກັບຊາວອາເມຣິກັນ ໃນທົ່ວປະເທດ ທ່ານນາງຈະໄປປ່ອນບັດເອົາປະທານາທິບໍດີ ແຕ່ວ່າພ້ອມດຽວກັນກັບເພື່ອນບ້ານຂອງທ່ານນາງໃນເຂດເລືອກຕັ້ງ 65 ຊຶ່ງຢູ່ໃຈກາງນະຄອນ New York ທ່ານນາງ ຍັງຈະ
ລົງປ່ອນບັດເລືອກເອົາສະມາຊິກສະພາຂອງລັດຄົນໃໝ່ ດ້ວຍຕົວທ່ານເອງ.
ທ່ານນາງ Niou ຜູ້ສະໝັກເປັນຕົວແທນຂອງພັກເດໂມແຄຣັດ ໃນເຂດທີ່ມີສະມາຊິກພັກ ພັກເດໂມແຄຣັດ ອາໄສຢູ່ຢ່າງໜາແໜ້ນ ທີ່ຮວມທັງຄຸ້ມຄົນຈີນ ຫລື Chinatown ແລະເຂດຕະຫລາດຮຸ້ນ Wall Street ຊຶ່ງຈະມີໂອກາດດີທີ່ຈະໄດ້ຊະນະ. ຖ້າມັນຫາກເກີດຂຶ້ນແທ້ ຄຸ້ມທີ່ເຄີຍມີຊື່ສຽງບໍ່ດີ ຍ້ອນພົວພັນກັບອະ ດີດສະມາຊິກສະພາຂອງລັດຄົນກ່ອນທ່ານ Sheldon Silver ທີ່ໄດ້ຖືກຕິດຄຸກ 12 ປີ ໃນຖານສໍ້ລາດບັງຫຼວງ ຊຶ່ງນີ້ຈະສົ່ງຜົນສະທ້ອນ
ທີ່ສຳຄັນໃຫ້ເຫັນເຖິງ ຄວາມໂປ່ງໃສ ແລະການເຂົ້າເຖິງ ໄດ້ຢ່າງສະດວກສະບາຍນັ້ນ ແມ່ນວີທີທີ່ຈະດຳເນີນການໄປໜ້າ.
ທ່ານນາງ Niou ກ່າວວ່າ “ມັນຍັງມີບາງພວກພໍ່ແມ່ພີ່ນ້ອງ ຜູ້ຊຶ່ງໄດ້ເຂົ້າເຖິງ ແລະກໍມີບາງພວກທີ່ຍັງບໍ່ໄດ້ເຂົ້າເຖິງ ແລະຂ້າພະເຈົ້າຄິດວ່າ ມັນມີຄວາມຈຳເປັນແລະເປັນສິ່ງສຳຄັນທີ່ຈະໃຫ້ພວກພໍ່ແມ່ພີ່ນ້ອງນີ້ເຂົ້າເຖິງລັດຖະບານໄດ້.”
ມັນຍັງຈະເປັນສັນຍານຂອງການປ່ຽນແປງ ໃນການເປັນຕົວແທນຂອງເຂດສັງ ຄົມເສດຖະ ກິດທີ່ມີຄວາມຫລາກຫລາຍ ທີ່ມີຊາວເອເຊຍ 42 ເປີເຊັນ ແຕ່ວ່າຍັງບໍ່ເຄີຍຮູ້ຈັກວ່າ ໄດ້ມີຊາວອາເມຣິກັນເຊື້ອສາຍເອເຊຍ ເປັນຜູ້ນຳພາພວກເຂົາເຈົ້າມາກ່ອນ.
ທ່ານນາງ Niou ກ່າວວ່າ “ພວກເຮົາແມ່ນປະກອບເປັນຫຼາຍກວ່າ 10 ເປີເຊັນ ຂອງປະຊາກອນລັດ ແລະວ່າພວກເຮົາ ມີໜ້ອຍກວ່າ ເຄິ່ງເປີເຊັນ ຂອງຜູ້ຕາງ ໜ້າພວກເຮົາແລະຂ້າພະເຈົ້າຄິດວ່າສະຖິຕິພຽງລຳພັງນັ້ນແມ່ນສາມາດສະແດງ ໃຫ້ເຫັນເຖິງວ່າ ມັນໜ້າຈະມີມາແຕ່ດົນນານແລ້ວ ພວກເຮົາຄວນຈະມີຄົນອາເມ ຣິກັນເຊື້ອສາຍເອເຊຍ ຫຼາຍໆຄົນ ລົງແຂ່ງຂັນ ແລະຊະນະໃນການເລື້ອກຕັ້ງ.”
ໃນຖານະທີ່ຊາວອົບພະຍົບທີ່ພາກັນເຕີບໃຫຍ່ໃນສະຫະລັດ ທ່ານນາງ Niou ຍັງຈຳໄດ້ວ່າ ທ່ານນາງ ໄດ້ເອົາອາຫານກາງວັນທີ່ເປັນອາຫານຈີນຂອງທ່ານນາງຖິ້ມ ຍ້ອນຄວາມຢ້ານກົວວ່າ ຈະມີຄົນຫົວຂວັນເຍາະເຍີ້ຍທ່ານນາງ ມື້ນີ້ ພື້ນຖານຫຼັກຂອງທ່ານນາງນັ້ນ ແມ່ນເພັ່ງເລັງໃສ່ ບັນຫາທີ່ປະເຊີນໜ້າພວກທີ່ທຸກຍາກທີ່ສຸດແລະສິດຂອງພວກຄົນເຂົ້າເມືອງ.
ທ່ານນາງ Niou ກ່າວວ່າ “ຜູ້ຄົນພາກັນຮວມຕົວພວກເຂົາເຈົ້າເຂົ້າເປັນກຸ່ມດຽວ ຮວມຕົວພວກເຮົາເຂົ້າເປັນກຸ່ມນຶ່ງແລະພວກເຂົາເຈົ້າກໍລືມໄປວ່າ ນີ້ພວກເຮົາມີຄວາມຈຳເປັນທີ່ແຕກຕ່າງກັນໄປ ຈະຕ້ອງມີການໃຫ້ບໍລິການ ທີ່ແຕກຕ່າງອີງຕາມຄວາມຈຳເປັນຂອງ ພວກເຂົາເຈົ້າ ຊຶ່ງຂ້າພະເຈົ້າຄິດວ່າ ນັ້ນລະຄືສິ່ງທີ່ສຳຄັນທີ່ສຸດ ເພື່ອກຳກັບວ່າພວກເຮົາ
ມີມຸມມອງໃນທຸກໆດ້ານຂອງບັນຫາທັງໝົດໃນໂຕະ.”
ທ່ານນາງ Niou ກ່າວວ່າ ທ່ານນາງຮູ້ສຶກວ່າ ຂະນະທີ່ເຕີບໃຫຍ່ຂຶ້ນມາ ລັດຖະບານແມ່ນຈະເປັນບ່ອນທີ່ສາມາດເຂົ້າຮອດເຂົ້າເຖິງສຳຫຼັບປະຊາຊົນທັງໝົດ ຖ້າຫາກວ່າທ່ານຮູ້ ວ່າປະຕູໃດ ທ່ານສາມາດຈະເຄາະໄດ້. ໃນຖານະທີ່ເປັນຕົວແທນຮັບໃຊ້ປະຊາຊົນ ທ່ານນາງຫວັງວ່າ ທ່ານນາງຈະເປັນປະຕູ ທີ່ເປີດກວ້າງ ຊຶ່ງຈະໃຫ້ຄວາມຊ່ອຍເຫຼືອ ແລະໃຫ້ບໍລິການ ແກ່ປະຊາຄົມຂອງທ່ານນາງ.
