ລິ້ງ ສຳຫລັບເຂົ້າຫາ

ບັນດາປະເທດ ໃນເອເຊຍ ໃຊ້ເງິນເພີ່ມຂຶ້ນ ເພື່ອປ້ອງກັນ ໄພນໍ້າຖ້ວມ

  • ໄພສານ ວໍຣະຈັກ

ເດັກຍິງຄົນນຶ່ງ ພວມລອຍນໍ້າແກ່ງ ຢູ່ຕໍ່ໜ້າພະລາຊະວັງຫຼວງຂອງໄທ ທີ່ບາງກອກ (28 ຕຸລາ 2011)

ເດັກຍິງຄົນນຶ່ງ ພວມລອຍນໍ້າແກ່ງ ຢູ່ຕໍ່ໜ້າພະລາຊະວັງຫຼວງຂອງໄທ ທີ່ບາງກອກ (28 ຕຸລາ 2011)

ຄວາມເສຍຫາຍທີ່ເພີ່ມທະວີຂຶ້ນຈາກໄພນໍ້າຖ້ວມຢູ່ໃນເຂດເອເຊຍໄດ້ບັງຄັບໃຫ້ລັດຖະບານ ຂອງຫຼາຍໆປະເທດ ໃຊ້ຈ່າຍເງິນຫຼາຍຂຶ້ນກ່ຽວກັບແຜນການຄຸ້ມຄອງນໍ້າທີ່ແນໃສ່ເພື່ອປ້ອງ ກັນບໍ່ໃຫ້ເກີດໄພທຳມະຊາດດັ່ງກ່າວອີກໃນອະນາຄົດ. ຜູ້ສື່ຂ່າວວີໂອເອ Ron Corben ລາຍງານມາຈາກບາງກອກວ່າ ທາງການໄທກ່າວວ່າ ຕົນພວມຊອກຫາຊ່ອງທາງປ້ອງກັນ ບໍ່ໃຫ້ເກີດໄພນໍ້າຖ້ວມຮ້າຍແຮງດັ່ງທີ່ໄດ້ເກີດໃນປີກາຍນີ້ຊໍ້າອີກ.

ນາຍົກລັດຖະມົນຕີ​ໄທ ທ່ານ​ນາງ​ຍິ່ງ​ລັກ ຊິນນະ​ວັດກ່າວ​ວ່າ ທ່ານ​ນາງ​ມີ​ຄວາມ​ເຊື່ອ​ໝັ້ນວ່າ
ລັດຖະບານ​ຂອງ​ທ່ານ​ນາງ ຈະສາມາດ​ປ້ອງ​ກັນ​ບໍ່​ໃຫ້​ເກີດ​ໄພ​ນໍ້າ​ຖ້ວມຮ້າຍ​ແຮງດັ່ງ​ທີ່​ໄດ້​ເກີດ
ຂຶ້ນ​ໃນ​ປີ 2011 ນັ້ນຊໍ້າ​ອີກ ​ໂດຍ​ການ​ໃຊ້​ຈ່າຍ​ເງິນ 11 ພັນ 500 ລ້ານ​ໂດ​ລາ​ເພື່ອ​ພັດທະ
ນາ​ລະບົບ​ຄຸ້ມ​ຄອງ​ແຫຼ່ງນໍ້າ​ໃໝ່.

ທ່ານ​ນາງ​ທຳນາຍ​ວ່າ ​ເສດຖະກິດ​ຂອງ​ໄທ​ຈະ​ຂະຫຍາຍ​ໂຕ 5% ​ໃນ​ປີນີ້ ສ່ວນ​ນຶ່ງ​ແມ່ນມາ​
ຈາກ​ການ​ໃຊ້​ຈ່າຍ​ຂອງ​ລັດຖະບານໃນ​ດ້ານ​ໂຄງ​ລ່າງ​ກ່ຽວ​ກັບ​ການ​ຄຸ້ມ​ຄອງ​ນໍ້າ.

ໄພ​ນໍ້າ​ຖ້ວມ​ທີ່​ຮ້າຍ​ແຮງ​ສຸດ​ໃນ​ຮອບ​ຫຼາຍໆ​ທົດ​ສະ​ວັດ​ຢູ່​ໄທ ​ເຮັດ​ໃຫ້​ມີ​ຜູ້​ເສຍ​ຊີວິດ 700 ຄົນ
ແລະ​ສ້າງ​ຄວາມ​ເສຍ​ຫາຍ​ໃຫ້​ແກ່​ເສດຖະກິດ 45 ພັນ​ລ້ານ​ໂດ​ລາຂະນະ​ທີ​ການ​ເຕີບໂຕຂອງ​
ເສດຖະກິດໄດ້​ຕົກ​ຮວບລົງ​ສູ່ລະດັບ 1.5% ​ໃນ​ປີ​ກາຍ​ນີ້.

ປະຊາ​ຄົມ​ໃນ​ເຂດ​ເທສະ​ບານ​ຕ່າງໆຂອງ​ໄທ​ໄດ້​ປະສົບ​ກັບ​ໄພ​ນໍ້າ​ຖ້ວມ​ແລະ​ເກືອບ 14 ລ້ານ
ຄົນໄດ້​ຮັບ​ຜົນ​ກະທົບ ​ຢູ່​ໃນ​ຫຼາຍສິບ​ຈັງຫວັດ. ຟີ​ລິບ​ປີນ ກໍາປູ​ເຈຍ ​ແລະ​ຫວຽດນາມ ກໍ​ໄດ້​
ຖືກ​ນໍ້າ​ຖ້ວມ​ໜັກ​ເຊ່ນ​ກັນໃນ​ລະດູຝົນ​ມໍ​ລະ​ສຸມ​ທີ່​ຜ່ານ​ມາ.

ເຮືອນທີ່ຖືກນໍ້າຖ້ວມໃນແຂວງຄໍາມ່ວນ

ເຮືອນທີ່ຖືກນໍ້າຖ້ວມໃນແຂວງຄໍາມ່ວນ

ສ່ວນຢູ່ ສປປ ລາວນັ້ນ ໄພ​ນໍ້າ​ຖ້ວມ​ຂະ
ໜາດແຮງ​ ທີ່​ເກີດ​ຈາກ ​ພາຍຸ​ເຂດ​ຮ້ອນ
ໄຫ່ໝາ​ແລະ​ນົກ​ເຕັນໄດ້​ເຮັດ​ໃຫ້​ມີ​ຜູ້​ເສຍ
ຊີ​ວິດ​ເຖິງ 30 ຄົນ​ແລະ​ສ້າງ​ຄວາມ​ເສຍ
ຫາຍ​ ໃຫ້​ແກ່ເສດຖະກິດຂອງ​ປະ​ເທດ
ເປັນ​ມູນ​ຄ່າ​ຮວມ ​ເຖິງ 1,800 ຕື້ກີບ​ຫຼື
ປະມານ 225 ລ້ານ​ໂດ​ລາ.

ຄວາ​ມ​ເສຍ​ຫາຍ​ເຫຼົ່ານີ້​ ແມ່ນ​ຮວມທັງ​ພື້ນ
ທີ່​ກະສິກໍາກວ້າງ​ກວ່າ 64,000 ​ເຮັກຕາ
ໂຄງ​ລ່າງ​ພື້ນຖານຕະຫຼອດທັງ​ໂຮງໝໍໂຮງຮຽນ ສະຖານ​ທີ່​ທ່ອງ​ທ່ຽວ ລະບົບ​ສາຍ​ສົ່ງ​ໄຟຟ້າ ​
ແລະ​ຄອງ​ຊົນລະ​ປະທານ ຢູ່​ໃນ​ເກືອບ 1,800 ບ້ານ ​ໃນ 96 ​ເມືອງ​ ຂອງ 12 ​ແຂວງ.
ພ້ອມ​ນີ້​ຍັງ​ເຮັດ​ໃຫ້​ປະຊາຊົນ​ເກືອບ 430,000 ຄົນ​ໄດ້​ຮັບ​ຄວາມ​ເດືອດຮ້ອນ​ອີກ​ດ້ວຍ.

ທາງ​ການ​ລາວ​ໄດ້​ອະນຸມັດງົບປະມານຢ່າງ​ເປັນ​ທາງການ​ 400 ຕື້ກີບສຳລັບ​ໃຊ້​ໃນ​ການ​ຟື້ນ
ຟູ​ເຂດທີ່​ໄດ້​ຮັບ​ຜົນ​ກະທົບ ​ຈາກ​ໄພ​ທຳ​ມະ​ຊາດ​ດັ່ງກ່າວ ​ໃນ​ລະຫວ່າງ​ກອງປະຊຸມ​ຄະນະ​ລັດ
ຖະບານ ​ຮ່ວມ​ກັບ​ບັນດາ​ເຈົ້າ​ແຂວງ​ແລະ​ເຈົ້າຄອງ​ນະຄອນຫຼວງວຽງ​ຈັນ ​ເມື່ອ​ບໍ່​ດົນ​ຜ່ານ​ມາ
ນີ້ ຊຶ່ງ​ຈຳນວນ​ດັ່ງກ່າວ ​ແມ່ນ​ປະມານ 1 ສ່ວນ 4 ຂອງ​ຄວາ​ມ​ເສຍຫາຍ​ທັງ​ໝົດ.

ຜູ້ຕາງໜ້າ​ພິ​ເສດ ​ຮັບຜິດຊອບ​ໃນ​ດ້ານ​ຍຸດ​ທະ​ສາດ​ນາໆ​ຊາດ ​ເພື່ອ​ຫຼຸດຜ່ອນ​ຄວາມ​ສ່ຽງ​ຈາກ​
ໄພພິບັດ ຂອງ​ອົງການ​ສະຫະ​ປະຊາ​ຊາດ ທ່ານ​ນາງ Margareta Wahlstrom ກ່າວ​ວ່າ
ຄວາມ​ເສຍ​ຫາຍ​ທີ່​ເພີ່ມ​ທະວີ​ຂຶ້ນຈາກ​ໄພ​ນໍ້າ​ຖ້ວມ ​ແມ່ນ​ບັນຫາ​ທ້າ​ທາຍ​ທີ່​ສຳ​ຄັນຢູ່​ໃນ​ເຂດ​ເອ
ເຊຍ.

ທ່ານ​ນາງ Wahlstrom ​ເວົ້າວ່າ “ບັນຫາ​ທ້າ​ທາຍ​ທີ່​ໃຫຍ່​ກວ່າ​ ສຳລັບ​ຫຼາຍໆ​ປະ​ເທດ
ກໍ​ຄື ທ່ານ​ຈະ​ຮັບ​ມື​ແບບ​ໃດ​ກັບ​ຄວາມ​ເສ​ຍຫາຍ​ທາງ​ດ້ານ​ເສດຖະກິດ? ​ເປັນ​ໄປ​ໄດ້​
ບໍ​ ທີ່​ຈະ​ປ່ຽນໂຄງ​ລ່າງ​ພື້ນຖານ​ທາງ​ດ້ານ​ເສດຖະກິດ​ຂອງ​ປະ​ເທດ? ທ່ານ​ສາມາດ​
ຍ້າຍ​ເຂດ​ອຸສາ​ຫະກຳຂອງ​ປະ​ເທດ ໃຫ້​ໄກ​ອອກ​ໄປ​ຈາກ​ບໍລິ​ເວນແຄມ​ຝັ່ງ​ທະ​ເລ​ໄດ້​
ບໍ ​ເພື່ອ​ໃຫ້​ມີ​ຄວາມ​ຫຼໍ່​ແຫຼມຕໍ່ການໄດ້​ຮັບ​ຄວາມ​ເສຍ​ຫາຍນັ້ນໜ້ອຍ​ລົງ? ສິ່ງ​ເຫຼົ່ານີ້​
ແມ່ນ​ເປັນ​ເລື່ອງ​ສຳຄັນ​ຫຼາຍ ທີ່​ສົມຄວນ​ຈະ​ໄດ້​ຮັບ​ການ​ແກ້​ໄຂໃນ​ລະດັບ​ການ​ເມືອງ​
ຂັ້ນສູງ​ສຸດເພື່ອ​ປົກ​ປ້ອງ​ຄຸ້ມ​ຄອງ​ຄວາມກ້າວໜ້າ​ຂອງ​ປະ​ເທດຊາດ.”

ນໍ້າຖ້ວມສຸໃນຟີລິບປິນ

ນໍ້າຖ້ວມສຸໃນຟີລິບປິນ

ລາຍ​ງານ​ສະບັບ​ນຶ່ງ​ຂອງ​ອົງການ
ສະຫະ​ປະຊາ​ຊາດ ​ທີ່​ອອກ​ເມື່ອ​
ໄວໆ​ມານີ້​ເວົ້າວ່າ​ໄພພິບັດ​ທຳ​ມະ
ຊາດຊຶ່ງ​ສ່ວນ​ໃຫຍ່​ ກໍ​ແມ່ນ​ແຜ່ນ
ດິນ​ໄຫວແລະ​ນໍ້າ​ຖ້ວມ ໄດ້​ສ້າງ​
ຄວາມ​ເສຍ​ຫາຍຮ້າຍ​ແຮງ ​ເປັນ
ປະຫວັດ​ການ ​ເຖິງ 366 ພັນ
ລ້ານ​ໂດ​ລາແລະ​ເຮັດ​ໃຫ້​ມີ​ຜູ້​ເສຍ
ຊີວິດ​ອີກ​ຫລາຍກວ່າ 29,700
ຄົນ ໃນ​ປີ​ກາຍ​ນີ້.

ປະທານ ​ຕາໜ່າງອົງການ​ຈັດຕັ້ງ
ພົນລະ​ເຮືອນ​ເພື່ອ​ຫຼຸດຜ່ອນ​ໄພພິ
ບັດ​ທຳ​ມະຊາດ ທ່ານ Marcus
Oxley ກ່າວ​ວ່າ ການ​ພັດທະນາ
ເສດຖະກິດ​ແມ່ນ​ໄດ້​ເພີ່ມຕື່ມ​ໃສ່​ຄ່າ​ເສຍ​ຫາຍ ຈາກ​ໄພພິບັດ​ທຳ​ມະ​ຊາດ.

ທ່ານ Oxley ​ເວົ້າວ່າ “ຄວາມ​ເສຍ​ຫາຍ​ໃນ​ດ້ານ​ຊັບ​ສິນ​ ແທ້​ຈິງ​ແລ້ວ​ ແມ່ນ​ໄດ້​ເພີ່ມ​
ຂຶ້ນຢ່າງຫຼວງຫຼາຍ. ການ​ເສຍ​ຊີວິດ​ ທີ່​ເນື່ອງມາ​ຈາກ​ໄພ​ນໍ້າ​ຖ້ວມ​ແລະ​ລົມພາຍຸ​ໄຊ​
ໂຄລນທີ່​ຈິງ​ແລ້ວມີ​ຈຳນວນ​ຫຼຸດລົງແຕ່​ການ​ສູນ​ເສຍ​ທາງ​ດ້ານ​ເສດຖະກິດ ຄວາມ
ສູນ​ເສຍ​ທາງ​ດ້ານການ​ທໍາ​ມາ​ຫາ​ກິນ ການ​ສູນ​ເສຍ​ຕໍ່​ເຮືອນ​ຊານ​ບ້ານ​ຊ່ອງ ຕໍ່​ຊັບ​
ສິນ​ຂອງ​ພວກ​ເຮົາ ຕໍ່​ໂຄງລ່າງ​ພື້ນຖານ​ ​ແທ້​ຈິງ​ແລ້ວ​ ແມ່ນ​ມີ​ເພີ່ມ​ຂຶ້ນ.”

ໄພນໍ້າຖ້ວມໃນຫວຽດນາມ

ໄພນໍ້າຖ້ວມໃນຫວຽດນາມ

ນັບ​ແຕ່​ປີ 1998 ​ເປັນຕົ້ນມາ
ຈີນໄດ້​ເພີ່ມ​ການ​ໃຊ້​ຈ່າຍ​ກ່ຽວ
ກັບລະບົບ ການ​ຄຸ້ມ​ຄອງນໍ້າ ​
ເພື່ອຫຼຸດຜ່ອນ ຜົນ​ກະທົບ
ຈາກ​ໄພ​ນໍ້າຖ້ວມ. ​ແຕ່​ການ
ເຕີບ​ໂຕ​ຢ່າງ​ວ່ອງ​ໄວ​ຂອງ​ຈີນ​
ພ້ອມ​ທັງການຂະຫຍາຍ​ໂຕ​
ຂອງ​ເຂດເທສະບານ​ເຮັດ​ໃຫ້
ປະຊາ​ຄົມ​ຕ່າງໆ​ໃນ​ຈຳນວນ
ເພີ່ມ​ຂຶ້ນ ມີຄວາມ​ຫຼໍ່​ແຫຼມຕໍ່​
ການ​ປະສົບ​ກັບ​ໄພ​ນໍ້າ​ຖ້ວມ.

ໃນ​ໄລຍະ​ສອງສາມ​ປີຜ່ານມາ​
ນີ້ຈີນ​ໄດ້​ສ້າງ​ເຂື່ອນ​ 85,000 ​
ເຂື່ອນ ຄູກັ້ນນໍ້າ ຍາວ 270
ພັນກິ​ໂລ​ແມັດ ແລະ​ອ່າງ​ເກັບ
ນໍ້າ 170,000 ​ແຫ່ງພ້ອມ​ກັບປະຕູ​ລະບາຍ​ນໍ້າ 31,000 ບ່ອນ​ເພື່ອ​ຮັບ​ມື​ໃຫ້ດີ​ຂຶ້ນກວ່າເກົ່າ
ກັບ​ການ​ສ່ຽງ​ຕໍ່​ການ​ເກີດ​ໄພ​ນໍ້າ​ຖ້ວມ.

ທ່ານ Amit Jah ​ເລຂາທິການຮ່ວມອົງການ​ຄຸ້ມ​ຄອງ​ໄພພິບັດ​ແຫ່ງ​ຊາດ​ຂອງ​ອິນ​ເດຍກ່າວ​
ວ່າ ລັດຖະບານ​ຂອງ​ປະ​ເທດຕ່າງໆ ​ມີ​ຄວາມ​ຮັບຜິດຊອບ​ເພີ່ມ​ຂຶ້ນ​ໃນ​ການ​ພັດທະນາ​ລະບົບ
ຄຸ້ມ​ຄອງ​ຄວາມ​ສ່ຽງຕໍ່​ການ​ເກີດ​ໄພພິບັດໃນ​ຖານະ​ທີ່​ເອ​ເຊຍມີ​ບົດບາດເປັນ​ຜູ້​ຂັບ​ດັນ​ການ​ເຕີບ​
ໂຕ​ເສດຖະກິດ​ຂອງໂລກ.

ທ່ານ Jah ​ເວົ້າວ່າ “​ເອ​ເຊຍ​ເປັນ​ກົນ​ຈັກຂອງ​ການ​ເຕີບ​ໂຕ. ​ໃນ​ທຸກ​ມື້ນີ້ການ​ເຕີບ​ໂຕ​
ໃນໂລກ ​ແລະ​ດັ່ງນັ້ນ ກິດຈະກຳ​ຫຼາຍໆ​ຢ່າງ​ທີ່​ພົວພັນ​ກັບ​ການ​ເຕີບ​ໂຕ ​ເຊັ່ນ​ການ​
ບໍລິ​ໂພ​ກທີ່​ປະກົດ​ໂຕ​ຂຶ້ນມາໃໝ່ ການ​ນຳ​ໃຊ້​ທີ່​ດິນ ການ​ກໍ່ສ້າງ​ໂຄງ​ລ່າງ​ພື້ນຖານ ​
ແມ່ນພວມ​ເກີດ​ຂຶ້ນຢູ່​ໃນ​ປະ​ເທດ​ອິນ​ເດຍ ຕະຫຼອດທັງ​ໃນ​ທົ່ວເຂດ​ເອ​ເຊ​ຍ. ຂ້າພະ​
ເຈົ້າສາມາດ​ເວົ້າໄດ້​ວ່າຢູ່​ທີ່​ອິນ​ເດຍ ພວກ​ເຮົາ​ສ່ວນ​ໃຫຍ່​ແມ່ນ​ໝົກ​ໝຸ່ນຢູ່​ກັບ​ແນວ
ຄິດ​ ​ທີ່ຈະ​ເຮັດ​ໃຫ້​ໂຄງ​ລ່າງ​ພື້ນ ຖານ​ຂອງ​ເຮົ​າ​ໃນ​ດ້ານ​ປ້ອງ​ກັນ​ໄພພິບັດນັ້ນ ​ສາ
ມາດ​ປັບໂຕໄດ້ ​ເພື່ອ​ເຮັດ​ໃຫ້ພວກ​ເຮົາ ສາມາດຮັບ​ມືໄດ້​ດີ​ຂຶ້ນ​ເລື້ອຍໆ ​ກັບ​ທຸກໆ​
ໄພພິບັດ​ທີ່​ເກີດ​ຂຶ້ນ.”

ທ່ານ​ Jah ກ່າວ​ວ່າ ລັດຖະບານ​ອິນ​ເດຍ​ໄດ້ເອົາ​ວຽກ​ງານການຫຼຸດຜ່ອນ​ຄວາມ​ສ່ຽງ​ຕໍ່ໄພພິ
ບັດ ​ເຂົ້າ​ໃນ​ທຸກໆ​ພະ​ແນ​ກການຂອງ​ລັດ​ຖະບານ ​ແລະ​ເອົາ​ໄປ​ພົວພັນ ​ກັບ​ການ​ເຕີບ​ໂຕຕະ
ຫຼອດທັງ​ນຳ​ເອົາພາກສ່ວນ​ເອກ​ະຊົນ​ແລະ​ສັງຄົມ​ພົນລະ​ເຮືອນ​ເຂົ້າມາ​ຮ່ວມ​ນຳ.

XS
SM
MD
LG