ເຫດລະເບີດຫຼາຍໆຄັ້ງໄດ້ສັ່ນສະເທືອນນະຄອນຫລວງຂອງ
ລີເບຍໃນຕອນແລງວັນອັງຄານວານນີ້.
ພວກນັກໜັງສືພິມໃນກຸງຕຣີໂປລີ ກ່າວວ່າ ເຂົາເຈົ້າໄດ້ຍິນ
ສຽງລະເບີດແຕກຂຶ້ນຢ່າງແຮງຢ່າງໜ້ອຍ 6 ຄັ້ງ.
ເຫດລະເບີດເຫລົ່ານີ້ເກີດຂຶ້ນ 1 ມື້ຫລັງຈາກກຸ່ມເນໂຕ້ໄດ້
ທໍາການໂຈມຕີທາງອາກາດຢ່າງຮ້າຍແຮງທີ່ສຸດແບບບໍ່ເຄີຍ
ມີມາກ່ອນ ໃສ່ນະຄອນຫລວງລີເບຍ ຮວມທັງການໂຈມຕີ
ທາງອາກາດໃກ້ບໍລິເວນບ່ອນຢູ່ຂອງທ່ານກາດດາຟີ ຜູ້ນໍາ
ລີເບຍນໍາ.
ຣັດເຊຍໄດ້ສະແດງປະຕິກິລິຍາຕໍ່ການໂຈມຕີທາງອາກາດ
ຂອງກຸ່ມເນໂຕ້ໃນວັນພຸດມື້ນີ້ ໂດຍເອີ້ນການໂຈມຕີທາງ
ອາກາດຄັ້ງໃໝ່ໃນນະຄອນຕຣີໂປລີນີ້ວ່າ ເປັນການລະເມີດມະຕິ ຂອງສະພາຄວາມໝັ້ນຄົງສະຫະປະ ຊາຊາດນັ້ນ. ກະຊວງການຕ່າງປະເທດຣັດເຊຍກ່າວວ່າ ການໂຈມຕີນີ້ບໍ່ໄດ້ເຮັດໃຫ້ການປະເຊີນໜ້າກັນລະຫວ່າງກໍາລັງທີ່ນິຍົມກາດດາຟີແລະພວກກະບົດຍຸດຕິລົງ ແຕ່ໄດ້ສ້າງຄວາມເຈັບປວດຫລາຍຂຶ້ນໃຫ້ແກ່ປະຊາຊົນລີເບຍເທົ່ານັ້ນ.
ໃນຂະນະດຽວກັນ ປະທານາທິບໍດີ Jacob Zuma ແຫ່ງອະຟຣິກາໃຕ້ປະກາດໃຫ້ຮູ້ ກ່ຽວກັບແຜນການທີ່ທ່ານຈະເດີນທາງໄປຍັງລີເບຍເພື່ອພະຍາຍາມຊອກຫາຊ່ອງທາງຊ່ອຍແກ້ໄຂວິກິດການດັ່ງກ່າວ. ຖະແຫຼງການສະບັບນຶ່ງທີ່ທໍານຽບປະທານາທິບໍດີ Zuma ເປີດເຜີຍໃຫ້ຮູ້ໃນວັນພຸດມື້ນີ້ກ່າວວ່າ ຜູ້ນໍາອະຟຣິກາໃຕ້ ຈະທໍາການພົບປະຫາລືກັບທ່ານ ກາດດາຟີທີ່ກຸງຕຣິໂປລີ ໃນວັນຈັນໜ້າ. ຖະແຫລງການສະບັບນີ້ກ່າວຕື່ມວ່າ ປະທານາທິບໍດີ Zuma ຈະທໍາການເຈລະຈາພາຍໃຕ້ສິດອຳນາດຂອງທ່ານ ໃນຖານະເປັນສະມາຊິກຂອງຄະນະກໍາ
ມະການລະດັບສູງຄົນນຶ່ງຂອງສະຫະພາບອະຟຣິການັ້ນ.
