ລິ້ງ ສຳຫລັບເຂົ້າຫາ

ເຢຍຣະມັນ ຄອງແຊ້ມ World Cup 2014 (ສະໄລດ໌/ວີດີໂອ)


ເຢຍຣະມັນ ​ໄດ້​ເປັນ​ທີ​ມທຳ​ອິດ​ຈາກ​ຢູ​ໂຣບ ທີ່​ໄດ້ຄອງ​ແຊ້ມ
ການແຂ່ງຂັນເຕະ​ບານ​ໂລກ World Cup ທີ່​ຈັດ​ຂຶ້ນໃນ​ທະວີບ
ອາ​ເມຣິກາ ດ້ວຍ​ການ​ເອົາ​ຊະນະ ​ທີ​ມອາ​ເຈັນ​ຕີ​ນາ ໃນຮອບ
​ຊິງ​ຊະນະ​ເລີດ ​ຕອນ​ເພີ້​ມ​ເວລາຕື່ມ 1 ປະຕູ​ຕໍ່ 0 ​ເມື່ອວັນ​ອາທິດ
​ມື້ວານ​ນີ້.

ນັກ​ເຕະ​ທີມ​ເຢຍຣະມັນ Mario Goetze ທີ່​ຖືກ​ຮຽກ​ໂຕ​ເຂົ້າມາ
ຫລິ້ນ​ແທນ ເປັນ​ຄົນຍິງ​ເຂົ້າປະຕູ​ໄດ້ ​ໃນ​ເວລາ​ທີ 113 ນາທີ ​
ນຳ​ເອົາ​ໄຊຊະນະມາ​ໃຫ້​ທີ​ມຂອງ​ລາວ ຢູ່​ທີ່​ສະໜາມກິລາ
Maracana ​ໃນນະຄອນ Rio de Janeiro ຫຼັງຈາກ​ທີ່ທັງ​ສອງ
​ທີ​ມ ບໍ່​ສາມ​າດຍິງ​ປະຕູ​ກັນໄດ້​ ໃນ​ເວລາແຂ່ງຂັນປົກກະຕິ 90 ນາທີ​ນັ້ນ.

ນັກເຕະເຢຍຣະມັນ Mario Goetze (ກາງ) ສະແດງຄວາມດີໃຈ ກັບເພື່ອນນັກເຕະ ຫຼັງຈາກໄດ້ຍິງ ເຂົ້າປະຕູ ຂອງອາເຈັນຕີນາ ໃນເວລາເພີ້ມ 113 ນາທີ ໃນຮອບຊິງຊະນະເລີດ ຂອງການແຂ່ງຂັນເຕະບານໂລກ World Cup 2014.
ນັກເຕະເຢຍຣະມັນ Mario Goetze (ກາງ) ສະແດງຄວາມດີໃຈ ກັບເພື່ອນນັກເຕະ ຫຼັງຈາກໄດ້ຍິງ ເຂົ້າປະຕູ ຂອງອາເຈັນຕີນາ ໃນເວລາເພີ້ມ 113 ນາທີ ໃນຮອບຊິງຊະນະເລີດ ຂອງການແຂ່ງຂັນເຕະບານໂລກ World Cup 2014.

ທ້າວ Goetze ​ໄດ້​ໃຊ້​ໜ້າ​ເອິກ​ຂອງ​ລາວຮັບ​ບານ ​ທີ່​ຖື​ກສົ່ງ​ມາ
​ຈາກເພື່ອ​ຮ່ວມ​ທີ​ມ Andre Schurrle ຢູ່ປີກ​ຊ້າຍ ​ແລ້ວ​ເຕະ
ດ້ວຍ​ຕີນ​ຊ້າຍ​ ກາຍ​ຜູ້​ຮັກສາ​ປະຕູ​ຂອງ​ອາ​ເຈັນ​ຕີ​ນາ​ ເຂົ້າປະຕູ
​ເບື້ອງ​ມຸມ​ຂວາ.

ທີ​ມຈາກ​ທະວີບອາ​ເມຣິກາ​ໃຕ້ ​ໄດ້​ຮັບ​ໄຊຊະນະ​ ​ໃນ​ການ​ແຂ່ງຂັນ
World Cup 7 ຄັ້ງກ່ອນໆ​ ​ທີ່ຈັດ​ຂຶ້ນ​ໃນທະວີບອາ​ເມຣິກາ.

​ໄຊຊະນະໃນ​ວັນ​ອາທິດ​ວານ​ນີ້ ແມ່ນເປັນຄັ້ງທີ 4 ຂອງ​ເຢຍຣະມັນ
​ທີ່​ໄດ້​ເປັນ​ແຊ້ມ​ປ້ຽນເຕະບານໂລກ ​ແຕ່​ເປັນຄັ້ງທຳ​ອິດໃນ​ຖານະ​ທີ່​
ເປັນປະ​ເທດ​ດຽວ ຄື​ຫຼັງຈາກ​ທີ່​ສອງ​ເຢຍລະ​ມັນ​ໂຮມ​ເຂົ້າກັນ.
​ເຢຍຣະມັນ​ຕາ​ເວັນ​ຕົກ ​ໄດ້​ແຊ້ມ ​ໃນ​ປີ 1954 1974 ​ແລະ 1990.

​ເຢຍຣະມັນ ​ແລະ ອາ​ເຈັນ​ຕີ​ນາ ​ໄດ້​ພົບ​ກັນ​ມາ​ກ່ອນ​ 2 ຄັ້ງ​ແລ້ວ ​ໃນ​ຮອບ​ຊິງ​ຊະນະ​ເລີດ ຊຶ່ງອາ​ເຈັນ​ຕີ​ນາ ໄດ້​ຊະນະ ​ໃນ​ປີ 1986 ​ແລະ ​ເຢຍຣະມັນ ໄດ້​ຊະນະ ​ໃນ​ປີ 1990.

ການ​ແຂ່ງຂັນຊິງ​ຊະນະ​ເລີດເຕະບານ​ໂລກປີ​ນີ້ ​ແມ່ນ​ເປັນຄັ້ງທີ 3 ລຽນຕິດ ​ທີ່​ຖືກຕັດສິນ​ໂດຍ​ການ​ແຂ່ງຂັນ ໃນ​ເວລາ​ເພີ້​ມ.

Error rendering storify.


XS
SM
MD
LG