ລິ້ງ ສຳຫລັບເຂົ້າຫາ

ນັກວິເຄາະກ່າວວ່າ ເທັກໂນໂລຈີ່ລູກສອນໄຟ ຂອງເກົາຫຼີເໜືອ ຍັງລ້າຫຼັງຢູ່ (ວີດິໂອ)


ຈະຫລວດໄລຍະໄກ Unha-3 ຂອງເກົາຫລີເໜືອ ກໍາລັງຖືກຍິງຂຶ້ນສູ່ທ້ອງຟ້າ ເມື່ອວັນທີ 12 ທັນວາ 2012.

ນັກວິເຄາະກ່າວວ່າ ເຖິງແມ່ນໄດ້ສົ່ງຈະ​ຫລວດໄລຍະໄກ ຢ່າງສໍາເລັດຜົນ ກໍຕາມ ແຕ່ເກົາຫຼີເໜືອ ກໍຍັງໄກຢູ່ຫລາຍ ທີ່ຈະເປັນໄພຂົ່ມຂູ່ຕໍ່ສະຫະລັດໄດ້.

ການສົ່ງລູກສອນໄຟ ຫລື​ຈະ​ຫລວດໄລຍະໄກໄດ້ເປັນຜົນສໍາ
ເລັດເທື່ອທໍາອິດຂອງເກົາຫຼີເໜືອ ສະແດງໃຫ້ເຫັນ​ວ່າພຽງຢາງ
ມີຄວາມສາມາດກ້າວໄກ ໄປຫຼາຍຂັ້ນແລ້ວ ແຕ່ຢ່າງ​ໃດ​ກໍ​ຕາມ ບັນດານັກວິເຄາະກ່າວວ່າເກົາຫຼີເໜືອ ຍັງຢູ່​ໄກ​ຫລາຍ ຈາກ​ຂັ້ນ​
ທີ່ຈະສາມາດ​ເປັນ​ໄພຂົ່ມຂູ່ ຕໍ່ສະຫະລັດໄດ້.

ເກົາຫຼີເໜືອ​ໄດ້ກ້າວເຂົ້າໄປຢູ່ໃນກຸ່ມຂອງປະຊາຊາດ ທີ່ມີສະມັດຖະພາບ ດ້ານລູກສອນ ໄຟໄລຍະໄກແລ້ວ ຫລັງ​ຈາກ​ທີ່ໄດ້ທົດລອງມາສີ່ຄັ້ງ ​ໂດຍ​ປະສົບ​ຄວາມລົ້ມແຫຼວສາມຄັ້ງ ແລະ​ໃນ​ທີ່​ສຸດ​ກໍປະສົບຜົນສໍາເລັດໃນຄັ້ງທີ່ ສີ່ ຫຼືຄັ້ງສຸດທ້າຍ ​ໃນ​ອາທິດ​ແລ້ວ​ນີ້.

ບັນດານັກວິທະຍາສາດເກົາຫຼີເໜືອ ພາກັນເບິ່ງຈະຫຼວດທະຍານຂຶ້ນສູ່ທ້ອງຟ້າ ກ່ອນຈະ ປ່ອຍວັດຖຸນຶ່ງເຂົ້າສູ່ວົງໂຄຈອນ.

Kim Hye Jin ຜູ້ອໍານວຍການສູນຄວບຄຸມດາວທຽມຂອງເກົາຫຼີເໜືອ ເວົ້າວ່າ ວັດຖຸປະສົງ
ແມ່ນ​ໄດ້​ບັນລຸແລ້ວ.

ທ່ານ ຈິນ ອະທິບາຍ​ວ່າ: “ການ​ສົ່ງ​ດາວ​ທຽມ Kwangmyongsong-1 ຂຶ້ນ​ຄັ້ງ​ນີ້ ​ແມ່ນ
ການທົດສອບຄວາມສາມາດຂອງຈະຫຼວດ ​ໃນ​ການນໍາສົ່ງດາວທຽມເຂົ້າສູ່ ວົງໂຄຈອນ ອ້ອມ​ໂລກ.”


ສໍາລັບເກົາຫຼີເໜືອແລ້ວ ຜົນສໍາເລັດຄັ້ງນີ້ ຖືວ່າເປັນບາດກ້າວອັນຍິ່ງໃຫຍ່. ແຕ່ທ່ານ Christopher Preble ນັກວິເຄາະດ້ານປ້ອງກັນປະເທດປະຈໍາ ສະຖາບັນ Cato ທີ່ ວໍຊີງຕັນດີຊີ ເວົ້າວ່າ ພຽງຢາງຍັງຈະຕ້ອງໄດ້ໃຊ້ເວລາ ອີກດົນນານ ກ່ວາ​ຈະ​ພິສູດ​ໃຫ້
ເຫັນ​ໄດ້​ວ່າ ລູກສອນໄຟຂີປະນາວຸດຂອງຕົນ​ຈະສາມາດຂົ່ມຂູ່ສະຫະລັດໄດ້.

ທ່ານ Preble ເວົ້າວ່າ: “ຜົນສໍາເລັດພຽງເທື່ອນຶ່ງຂອງການສົ່ງລູກສອນໄຟ ບໍ່ໄດ້ເຮັດ
ໃຫ້ເກົາຫຼີເໜືອເປັນຕົວຂົ່ມຂູ່ທີ່ເຊື່ອຖືໄດ້ເທື່ອ ໃນແງ່ຂອງຂີປະນາວຸດໄລຍະໄກ ແລະຄວາມສາມາດນໍາສົ່ງອາວຸດຕ່າງໆໃນໄລຍະໄກໄດ້.”


ຜູ້ປະກາດຂ່າວເກົາຫຼີເໜືອຄົນນຶ່ງ ເອີ້ນການຍິງ​ຈະ​ຫລວດ​ຄັ້ງນີ້ ວ່າເປັນ ຜົນສໍາເລັດ
ອັນ​ສະງ່າ​ງາມ.

ແຕ່ເກົາຫຼີເໜືອກໍຍັງຈະ​ຕ້ອງພິສູດໃຫ້ເຫັນອີກວ່າ ຕົນສາມາດສ້າງຫົວລະເບີດນີວເຄຼຍ ຂະໜາດນ້ອຍໆພໍທີ່ຈະຕິດຕັ້ງໃສ່ຈະຫຼວດຫລື​ລູກ​ສອນ​ໄຟໄດ້.

ຈະຫຼວດທີ່ເກົາຫຼີເໜືອສົ່ງ​ຂຶ້ນ ​ເມື່ອ​ວັນ​ທີ 12 ທັນວາ​ຜ່ານ​ມານີ້ ​ແມ່ນເປັນ ຈະຫຼວດຊະນິດ ຫຍາ​ບທີ່ໃຊ້ເຊື້ອໄຟແຫຼວ ​ແລະຕ້ອງໃຊ້ເວລາບັນຈຸຫຼາຍໆ ຊົ່ວໂມງ ແລະ​ໃຊ້​ເວລາ​ດົນ​ໃນ​ການປະກອບ​ແລະຕິດ​ຕັ້ງ.

ຜ່ານ​ມາ ເກົາຫຼີເໜືອໄດ້ສະແດງໃຫ້ເຫັນແລ້ວວ່າ ຕົນສາມາດຍິງຖະຫຼົ່ມຍີ່ປຸ່ນ​ໄດ້ ດ້ວຍ ຈະຫຼວດຫລື​ລູກ​ສອນ​ໄຟໄລຍະປານ​ກາງຂອງ​ຕົນ ແລະຍັງສາມາດໂຈມຕີເກົາຫຼີໃຕ້​ໄດ້ ດ້ວຍປືນໃຫຍ່. ແຕ່ຕາມ​ຄວາມ​ເຫັນ​ຂອງ​ນັກວິ​ເຄາະສ່ວນໃຫຍ່ແລ້ວ ການຍິງຈະຫຼວດໄລ ຍະໄກ​ໄດ້ຢ່າງ​ສໍາເລັດຜົນຂອງເກົາຫຼີເໜືອ​ຄັ້ງນີ້ ບໍ່ໄດ້ໝາຍຄວາມວ່າ ກອງທັບເກົາຫລີ
ເໜືອ​ ໄດ້​ທໍາ​ຄວາມກ້າວໄກໄປໜ້າ ໄດ້ຢ່າງແທ້ຈິງເທື່ອ.

ຢ່າງ​ໃດ​ກໍ​ຕາມ ທ່ານ Preble ເວົ້າວ່າ ທ່ານຍັງປະຫຼາດໃຈຢູ່ທີ່ເກົາຫຼີເໜືອເຮັດ​ໄດ້ສໍາເລັດ.

ທ່ານ Preble ເວົ້າວ່າ: “ການທົດລອງຍິງຂີ​ປະ​ນາ​ວຸດ​ຫຼາຍຄັ້ງ​ຜ່ານ​ມາ ຂອງ​ເກົາຫຼີ​ເໜືອ​ນັ້ນ​ ແມ່ນ​ລົ້ມ​ແຫຼວຫຼາຍທີ່​ສຸດ. ຄວາມ​ຈິງ​ແລ້ວ ບ່ອນ​ທີ່​ປອດ​ໄພ​ທີ່​ສຸດ​ໃນ​ການ​ທົດ​ລອງ​ຍິງ​ລູກ​ສອນ​ໄຟ​ຂີ​ປະ​ນາ​ວຸດ​ຄັ້ງ​ຜ່ານໆ​ມາ​ແມ່ນຢູ່​ບ່ອນ​ໃດ​ກໍ​ຕາມ​ ທີ່​ພວກ​ເຂົາ​ເຈົ້າ​ແນ່​ມັນ​ໄປໃສ່​. ​
ແຕ່​ເທື່ອ​ນີ້ ປາກົດ​ວ່າ​ຄືຈົນ​ເຖິງເວລາ​ນີ້​ພວກ​ເຮົາ​ກໍຍັງ​ບໍ່​ຮູ້​ລາຍ​ລະອຽດ​ຫຍັງ​ທັງ​ໝົດ ​ແຕ່​ກໍ​ປາກົດວ່າ​ ມັນ​ເປັນການ​ທົດ​ລອງ​ທີ່​ສໍາ​ເລັດ​ຜົນ​ ຢູ່ທີ່​ວ່າ ມັນ​ບໍ່​ລະ​ເບີດ​ຂຶ້ນຢູ່​ຖານ​ຍິງ ​ຫລື
​ຫລັງ​ຈາກທະຍານ​ຂຶ້ນສູ່​ທ້ອງຟ້າ​ໄດ້​ບໍ່​ດົນ. ພວກ​ເຮົາ​ກໍ​ບໍ່​ຮູ້​ຫຼາຍກ່ຽວ​ກັບ​ວັດຖຸ​ທີ່​ຈະ​ຫຼວດ
ບັນທຸກຂຶ້ນ​ໄປ. ພວກ​ເຮົາ​ຍັງ​ບໍ່​ຮູ້ອີກ​ວ່າ ເຂົາ​ເຈົ້າ​ເອົາ​ຫຍັງ​ແທ້ໆ​ຂຶ້ນ​ໄປ​ປ່ອຍເທິງອະວະ
ກາດ ຊຶ່ງ​ກໍ​ແນ່ນອນ ວ່າ​ມັນ​ເປັນ​ຄໍາ​ຖາມ​ຕໍ່​ໄປ ທີ່​ເຮົາ​ຈະ​ຕ້ອງ​ຫາ​ຄໍາ​ຕອບ.”


ບັນດາ​ນັກວິ​ເຄາະ​ເວົ້າ​ວ່າ ສໍາລັບ​ເກົາຫຼີ​ເໜືອ​ແລ້ວ ການ​ທົດ​ລອງ​ຍິງ​ຈະຫຼວດທີ່​ວ່າ​ນີ້ ​ເປັນເຄື່ອງມືທາງການ​ເມືອງ ຫຼາຍກວ່າເປັນອາວຸດ​ທາງ​ທະຫານ.

ທາງ​ຝ່າຍ​ກອງທັບ​ສະຫະລັດ​ນັ້ນ ​ກ່າວ​ວ່າ ຕົນ​ບໍ່ໄດ້​ຕີ​ລາຄາ​ຕໍ່າ ​ບາດກ້າວ​ຕ່າງໆ​ທີ່​ພຽງ​ຢາງ​ກໍາລັງ​ດໍາ​ເນີນ​ໄປ ​ຢູ່​ໃນ​ຂະນະ​ນີ້ເລີ​ຍ.

​ໃນ​ເດືອນ​ກັນຍາ​ຜ່ານ​ມາ​ນີ້ ກະຊວງ​ປ້ອງ​ກັນ​ປະ​ເທດ​ສະຫະລັດ​ເວົ້າ​ວ່າ ຕົນ​ຈະ​ເສີມ​ຂະຫຍາຍ​
ລະບົບ​ຕໍ່ຕ້ານ​ລູກ​ສອນ​ໄຟ​ຂີ​ປະ​ນາ​ວຸດ ​ແລະ​ຕິດ​ຕັ້ງ​ລະບົບ ເຣດາ​ຕໍ່ຕ້ານ​ລູກ​ສອນ​ໄຟ​ຢູ່​ໃນ​ຍີ່ປຸ່ນ.

ເບິ່ງວີດິໂອລາຍງານນີ້ ເປັນພາສາອັງກິດ:

XS
SM
MD
LG