ເຈົ້າໜ້າທີ່ ຈາກມະຫາວິທະຍາໄລ Davis ຂອງລັດ California ໄດ້ກ່າວວ່າ ນັກຄົ້ນຄວ້າ ອາເມຣິກັນຄົນໜຶ່ງ ໄດ້ຖືກຂ້າຕາຍ ໃນປະເທດເອທິໂອເປຍ ຫຼັງຈາກພວກປະທ້ວງໄດ້ ເລີ່ມແກວ່ງກ້ອນຫີນ ໃສ່ລົດທີ່ທ່ານນາງ ຂີ່ໄປຢູ່ນັ້ນ.
ທ່ານນາງ Sharon Gray ເປັນນັກຄົ້ນຄວ້າ ດຸດສະດີບັນດິດ ຢູ່ທີ່ພະແນກຊີວະສາດ ດ້ານພືດພັນ ຂອງມະຫາວິທະຍາໄລດັ່ງກ່າວ. ທ່ານນາງ ໄດ້ຢູູ່ທີ່ເອທິໂອເປຍ ເພື່ອເຂົ້າ ຮ່ວມກອງປະຊຸມ ກ່ຽວກັບ ການຄົ້ນຄວ້າຂອງທ່ານນາງ ແລະ ໄດ້ເດີນທາງອອກໄປ ຈາກນະຄອນຫຼວງ Addis Ababa ໃນລົດຄັນໜຶ່ງ ເວລາທ່ານນາງໄດ້ຖືກຂ້າຕາຍ ໃນວັນອັງຄານວານນີ້.
ບັນດາເຈົ້າໜ້າທີ່ ຂອງມະຫາວິທະຍາໄລ ໄດ້ກ່າວວ່າ ນັກຄົ້ນຄວ້າອີກທ່ານໜຶ່ງ ຢູ່ທີ່ ພະແນກຊີວະສາດດ້ານພືດພັນ ຜູ້ທີ່ໄດ້ເດີນທາງໄປເອທິໂອເປຍ ຮ່ວມກັບທ່ານນາງ Gray ແມ່ນບໍ່ໄດ້ຮັບບາດເຈັບໃນການໂຈມ ຕີ ແລະ ກຳລັງເດີນທາງກັບຄືນມາສະຫະລັດ.
ສະຖານທູດສະຫະລັດ ປະຈຳເອທິໂອເປຍ ໃຫ້ການຢືນຢັນວ່າ ພົນລະ ເມືອງຂອງ ສະຫະລັດຄົນນີ້ “ໄດ້ຖືກກະທົບດ້ວຍກ້ອນຫີນ ແລະ ຕໍ່ມາໄດ້ເສຍຊີວິດ ຈາກບາດແຜ ທີ່ຜູ້ກ່ຽວໄດ້ຮັບ” ແຕ່ບໍ່ໄດ້ເປີດເຜີຍຊື່ຂອງຜູ້ເສຍຊີວິດ.
ທ່ານ Andy Fell ໂຄສົກຂອງມະຫາວິທະຍາໄລ ໄດ້ກ່າວວ່າ ທ່ານນາງ Gray ໄດ້ເຮັດ ວຽກຢູ່ທີ່ ມະຫາວິທະຍາໄລ Davis ຂອງລັດ California ຫຼື UC Davis ນັບຕັ້ງແຕ່ປີ 2013 ເປັນຕົ້ນມາ ແລະ ສາມີຂອງທ່ານນາງ ຍັງເປັນພະນັກງານ ຂອງມະຫາວິທະໄລນີ້ ເຊັ່ນກັນ.
ຄວາມຮຸນແຮງ ແມ່ນບໍ່ເປັນເລື້ອງແປກຫຍັງ ຢູ່ທີ່ການປະທ້ວງດ້ານການເມືອງ ໃນເອທິໂອເປຍ ຊຶ່ງສ່ວນໃຫຍ່ແມ່ນເກີດຈາກຄວາມຮູ້ສຶກ ບໍ່ພໍອົກພໍໃຈກັບລັດຖະບານ. ຢ່າງນ້ອຍ 55 ຄົນ ໄດ້ເສຍຊີວິດ ໃນລະຫວ່າງການຢຽບກັນຕາຍ ຢູ່ທີ່ງານບຸນສາສະໜາ ໃນວັນອາທິດທີ່ຜ່ານມາ ສາເຫດແມ່ນເປັນຍ້ອນ ການປະທະກັນລະຫວ່າງ ເຈົ້າໜ້າທີ່ ຕຳຫຼວດ ແລະ ພວກປະທ້ວງ.
ຫຼາຍຮ້ອຍຄົນ ໄດ້ເສຍຊີວິດ ໃນລະຫວ່າງ ການປະທ້ວງຕໍ່ຕ້ານລັດຖະບານຄັ້ງໃຫຍ່ ນັບຕັ້ງແຕ່ ເດືອນພະຈິກ ປີ 2015 ເປັນຕົ້ນມາ ແຕ່ ທ່ານນາງ Gray ເປັນຊາວຕ່າງຊາດ ຄົນທຳອິດທີ່ໄດ້ເສຍຊີວິດ.
