ລິ້ງ ສຳຫລັບເຂົ້າຫາ

ການຄ້າຂາຍຢາເສບຕິດ ເພີ້ມທະວີຂຶ້ນ ຢູ່ໃນເຂດຊາຍແດນ ໄທ-ມຽນມາ


ລາຍ​ງານ​ສະບັບ​ໃໝ່​ຂອງ​ອົງການ​ສະຫະ​ປະຊາ​ຊາດ ທີ່​ນຳ​ອອ​ກ
​ເຜີຍ​ແຜ່ ​ເມື່ອ​ບໍ່ດົນ​ມາ​ນີ້ ກ່າວ​ວ່າ ການ​ຈັບ​ແລະ​ຍຶດ​ໄດ້​ຢາ​ບ້າ​ຢູ່
​ໃນ​ທົ່ວໂລກເມື່ອປີ​ກາຍ​ນີ້ ​ໄດ້ຖີບ​ຂຶ້ນ​ສູງສູ່​ລະດັບໃໝ່ ຕໍ່ໜ້າ​ການ
​ເພິ້ມທະວີ​ຂຶ້ນເລື້ອຍໆ ໃນ​ປະລິມານ​ແລະ​ຄວາມ​ຮຽກຮ້ອງ​ຕ້ອງ
ການຢາ​ທີ່​ຜິດ​ກົດໝາຍ​ນີ້ ຢູ່​ໃນ​ເອ​ເຊຍຕາ​ເວັນ​ອອກແລະ​ຕາ​ເວັນ
​ອອກສຽງ​ໃຕ້. Steve Sandford ມີ​ລາຍງານກ່ຽວ​ກັບ​ເລື້ອງ​ນີ້
ຈາກຊາຍ​ແດນ​ໄທ-ມຽນມາ ຊຶ່ງດາຣາຈະ​ນຳ​ເອົາ​ລາຍລ​ະອຽດ
ມາສະ​ເໜີ​ທ່ານ.

ຢູ່ເລາະ​ຕາມເຂດ​ຊາຍ​ແດນ​ໄທ-ມຽນມານັ້ນ ການຄ້າ​ຂາຍ​ໃນພູມິ​ພາກ ​ໄດ້​ເພິ້ມທະວີ​ຂຶ້ນ ​ໃນ​ຂະນະ​ທີ່​ບັນດາ​ປະ​ເທດ​ໃນ​ຂົງ​ເຂດ ພາກັນ​ຫລຸດ​ຜ່ອນພາສີ ​ແລະ​ສິ່ງ​ກີດຂວາງ​ການ​ຄ້າ​ຂາຍ​ລົງ ​ເພື່ອ​ຊຸກຍູ້​ສົ່ງ​ເສີມ​ການ​ຂະຫຍາ​ຍ​ໂຕທາງ​ເສດຖະກິດ ​ໃນ​ຂະນະ​ທີ່​ມຸ່ງ​ໜ້າ​ໄປ​ສູ່​ການ​ສ້າງ​ຕັ້ງ​ປະຊາ​ຄົມ​ເສດຖະກິດ​ຮ່ວມ ຫລື ASEAN Economic Community ​ເອີ້ນ​ຫຍໍ້​ວ່າ AEC ນັ້ນ.

​ແຕ່​ວ່າ​ຍຸ​ທະ​ສາດ​ຊຸກຍູ້​ການ​ເປີດ​ກ້ວາງ​ດັ່ງກ່າວ ຂອງ​ສະມາຄົມ​ອາ​ຊ່ຽນ​ນັ້ນ ໝາຍ​ເຖິງ​ການ​ເພິ້ມທະວີ​ຂຶ້ນ ໃນ​ການ​ລັກລອບ​ຄ້າ​ຢາ​ເສບ​ຕິດເຊັ່ນ​ກັນ.

ຢູ່​ໃນ​ປະ​ເທດ​ໄທ​ພຽງ​ປະ​ເທດ​ດຽວ​ເທົ່າ​ນັ້ນ ການ​ຍຶດ​ແລະ​ຈັບຢາ​ບ້າ​ ​ໄດ້ຖີບ​ຂຶ້ນ 4 ​ເທົ່າ​ຕົວ
ນັບ​ແຕ່​ປີ 2008 ​ເປັນ​ຕົ້ນ​ມາ ອິງ​ຕາມ​ລາຍ​ງານຂອງ​ອົງການ​ສະຫະ​ປະຊາ​ຊາດ ທີ່​ຫາ​ກໍ​
ເປີດ​ເຜີຍ​ອອກ​ເມື່ອ​ບໍ່​ນານມາ​ນີ້ ກ່ຽວ​ກັບ​ການ​ຄ້າ​ຢາເສບ​ຕິດ ​ຢູ່​ໃນ​ທົ່ວ​ໂລກ.

ຕົວ​ເລກ​ດັ່ງກ່າວ​ນັ້ນ ສ້າງ​ຄວາມ​ກັງວົນ​ໃຈ ​ໃຫ້​ແກ່​ທ່ານ ຊູຊີບ ​ໂຄດ​ຈະຣິນ ຫົວໜ້າຄະນະ​ກຳມະການ​ຄວບ​ຄຸມ​ຢາ​ເສບ​ຕິດ​ ເຂດ 5 ຂອງ​ໄທ.

ທ່ານ ຊູຊີບ ກ່າວ​ວ່າ: “ຢູ່​ໄທນີ້ ພວກ​ເຮົາ​ເປັນ​ຫ່ວງ​ກ່ຽວ​ກັບ​ເລື່ອງ​ການ ເປີດ​ກ້ວາງ​
ຊາຍ​ແດນ ​ເພາະຈະ​ອຳນວຍ​ໃຫ້​ພວກ​ແຮງ​ງານ​ ແລະ​ທຸລະ​ກິດ​ຜິດ​ກົດໝາຍ ​ເຂົ້າ​
ມາ​ໄດ້​ສະດວກ​ຫລາຍ​ຂຶ້ນ ​ໂດຍ​ສະ​ເພາະ​ການ​ລັກລອບ​ຄ້າ​ຢາ​ເສບ​ຕິດ​ນັ້ນ ​ແມ່ນ
​ຈະ​ເປັນ​ບັນຫາ​ໃຫຍ່​ຫລາຍ ​ໃນຂະນະທີ່​ມີ​ການ​ລັກລອບ​ເອົາ​ຢາ​ເສບ​ຕິດ​ເຂົ້າ​ມາ ​
ເພື່ອ​ຜ່ານ​ໄປ​ຍັງ​ປະ​ເທດ​ອື່ນໆ ​ໃນ​ເຂດ​ເອ​ເຊຍຕາ​ເວັນ​ອອກ​ສ່ຽງ​ໃຕ້.”


ການ​ລັກລອບ​ຄ້າ​ຢາ​ເສບ​ຕິດ​ບໍ່​ແມ່ນ​ເລື່ອງແປກໃໝ່ ຢູ່​ໃນ​ບໍລິ​ເວນ​ທີ່​ເອີ້ນ​ກັນ​ວ່າ “​ເຂດ​ສາມຫລ່ຽມ​ຄຳ” ບ່ອນ​ທີ່​ການ​ຜະລິດ ​ແລະ​ການ​ຂົນ​ສົ່ງຢາຝິ່ນ​ແລະ​ຢາ​ບ້າ ຈະ​ເລີ​ນງອກ
ງາມມາ​ເປັນ​ເວລາ​ຫລາຍ​ທົດ​ສະຫວັດ ຢູ່​ໃນເຂດ​ຊາຍ​ແດນ​ທີ່​ຂາດ​ກົດໝາຍ​ຂອງ​ມຽນມາ
ທີ່ຢູ່​ໃຕ້​ການ​ຄວບ​ຄຸມ​ຂອງພວກ​ກອງທັບ​ຊົນ​ເຜົ່າ​ຕ່າງໆນັ້ນ.

ນັກວິ​ເຄາະເລື່ອງ​ມຽນມາບາງ​ຄົນ ​ຮວມທັງ​ນັກ​ປະພັນ Bertil Lintner ກ່າວ​ວ່າ ການ​ເພີ້​ມ
ທະວີ​ຂຶ້ນ​ເມື່ອ​ໝໍ່ໆ​ມາ​ນີ້ ໃນ​ການ​ຜະ​ລິດຢາ​ບ້ານັ້ນ ມີ​ສາ​ເຫດ​ສ່ວນ​ໜຶ່ງ ​ມາ​ຈາກການຜັກ​ດັນ​ເພື່ອຄວບ​ຄຸມ​ອຳນາດ​ຂອງ​ລັດຖະບານມຽນມາ.

ທ່ານ Lintner ກ່າວ​ວ່າ “ນັບ​ແຕ່​ປີ 2011 ມາ​ແລ້ວ ລັດຖະບານ​ໄດ້ພະຍາຍາມຈະ
​ດຶງ​ເອົາ​ພວກ​ກຸ່ມ​ກະບົດ ພວກ​ກຸ່ມ​ປະກອບ​ອາວຸດ​ຕ່າງໆ ​ໃຫ້​ກັບ​ຄືນ​ເຂົ້າ​ມາ​ຢູ່​ໃນ​
ລະບົບ​ກົດໝາຍ ​ໂດຍ​ພື້ນຖານ​ແລ້ວກໍ​ແມ່ນ​ເພື່ອ ບໍ່​ໃຫ້​ເຂົາ​ເຈົ້າ​ເປັນ​ໄພ​ຂົ່ມຂູ່​ຕໍ່
ລັດຖະບານ​ກາງ​ຕໍ່​ໄປ. ​ແຕ່​ວ່າ ​ເພື່ອ​ຈະ​ເຮັດ​ເຊັ່ນ​ນັ້ນ ລັດຖະບານ​ກໍ​ຕ້ອງ​ສະ​ເໜີ
​ໃຫ້​ບາງ​ສິ່ງ​ບາງ​ຢ່າງ​ ຕອບ​ແທນ​ເຂົາ​ເຈົ້າ.”

ບັນດາເຈົ້າ​ໜ້າ​ທີ່​ຫວັງ​ວ່າ ການ​ເປີດພວກເຂດ​ຕ່າງໆ​ຂອງ​ຊົນ​ເຜົ່າ​ໃຫ້​ແກ່​ການ​ຄ້ານັ້ນ ຈະ
​ເພີ້​ມທະວີ​ໂອກາດ​ສຳ​ຫລັບ​ວຽກ​ງານ​ຂຶ້ນ ​ແຕ່​ວ່າ​ຫລາຍໆ​ຄົນທີ່​ອາ​ໄສ​ຢູ່ໃນ​ເຂດ​ນີ້ ​ແມ່ນ
​ມີ​ໂອ​ກາດ​ໃນ​ດ້ານ​ວຽກ​ງານ​ໜ້ອຍ​ຫລາຍ.

ຜູ້​ກໍ່​ຕັ້ງ​ໜັງສືພິມ Shan Tribune Herald ຊຶ່ງ​ເປັນ​ອົງການ​ຂ່າວ​ຂອງ​ຊົນ​ເຜົ່າ​ສານ ທ່ານ Kuensai Jaiyen ກ່າວ​ວ່າ ຫົນທາງ​ດຽວ​ທີ່​ຈະ​ຫລຸດຜ່ອນ​ການ​ຜະລິດ​ຢາ​ເສບ​ຕິດ​ລົງ​ໄດ້​ນັ້ນ ກໍ​ຈະ​ແມ່ນ​ການຍຸດຕິ​ຂໍ້​ຂັດ​ແຍ້​ງ​ກັນ ​ແລະ​ນຳ​ເອົາ​ວຽກ​ເຮັດ​ງານ​ທຳ ມາ​ໃຫ້​ພວກ​ຊົນ​ເຜົ່າ.

ທ່ານ​ໃຈ​ເຢັນ​ກ່າວ​ວ່າ “​ແນ່ນອນ ການ​ທ້າ​ທາຍອັນ​ໃຫຍ່​ຫລວງ​ທີ່​ສຸດ ກໍ​ຄື​ວ່າ ພວກ​ເຮົາ
ຕ້ອງ​ມີ​ສັນຕິພາບ ​ແລະ​ການ​ປົກຄອງ​ດ້ວຍ​ຕົວ​ບົດ​ກົດ ໝາຍ​ກ່ອນ. ​ແລະ​ເພື່ອ​ທີ່​ຈະ​ໃຫ້​
ມີ​ສັນຕິພາບ​ໄດ້ ກໍ​ຈະ​ຕ້ອງ​ມີ​ການ​ຕົກລົງ​ກັນ​ທາງ​ການ​ເມືອງ​ເສຍ​ກ່ອນ. ​ແຕ່​ວ່າ ພວກ​ເຮົາຕ້ອງ​ສຳນຶກ​ວ່າ ສັນຕິ ພາບ​ຈະ​ຕ້ອງ​ບໍ່​ແມ່ນ​ສັນຕິພາບ ​ທີ່​ຖືກ​ບັງຄັບ​ໃຫ້​ຮັບ​ເອົາ.”

​ໃນ​ຂະນະ​ທີ່​ບັນດາ​ເຂດ​ຊົນ​ເຜົ່າ​ຂອງ​ມຽນມາ ຍັງ​ສືບ​ຕໍ່​ທຳ​ການ​ເຈລະຈາ ກັບ​ລັດຖະບານ​ຢູ່​ນັ້ນ ປະ​ເທດ​ຊາດ ກັບ​ບັນດາ​ປະ​ເທດ​ເພື່ອນ​ບ້ານ​ກໍ​ປະ ​ເຊີນ​ກັບ​ບັນຫາ​ທີ່​ຂະຫຍາຍ​ໃຫຍ່​ຂຶ້ນ​ນັບ​ມື້ ​ໃນ​ຖານະເປັນ​ປາຍທາງ​ຂອງ ຢາ​ເສບ​ຕິດ​ນັ້ນ.

XS
SM
MD
LG