ລາຍງານຈາກຂົງເຂດ Garissa ທາງພາກຕາເວັນອອກ
ຂອງປະເທດ ເຄັນຢາ ກ່າວວ່າ ຕຳຫຼວດຫຼາຍເຖິງ 20 ຄົນ
ແມ່ນຢ້ານກົວວ່າຖືກຂ້າຕາຍ ໃນການໂຈມຕີສອງບັ້ນ ທີ່
ສົງໄສວ່າ ເປັນພວກຫົວຮຸນແຮງ al-Shabab.
ບັນດາເຈົ້າໜ້າທີ່ໃນທ້ອງຖິ່ນ ກ່າວວ່າ ການໂຈມຕີບັ້ນທຳອິດ
ເກີດຂຶ້ນໃນເວລາລົດຕຳຫຼວດຄັນໜຶ່ງ ແລ່ນໄປຍຽບລະເບີດ
ຝັງດິນ ຢູ່ທີ່ບ້ານ Yumbis ທີ່ເຮັດໃຫ້ ຕຳຫຼວດຢ່າງນ້ອຍ 3 ຄົນ
ໄດ້ຮັບບາດເຈັບ.
ຕໍ່ຈາກນັ້ນມາ ຜູ້ຕ້ອງສົງໄສເປັນພວກຫົວຮຸນແຮງ al-Shabab
ໄດ້ໂຈມຕີຂະບວນລົດຂອງຕຳຫຼວດ ທີ່ກຳລັງມຸ້ງໜ້າໄປ ຊ່ອຍເຫຼືອພວກຕຳຫຼວດທີ່ໄດ້ຮັບບາດເຈັບນັ້ນ. ມີລາຍງານວ່າ ເຈົ້າໜ້າທີ່ຕຳຫຼວດ ປະມານ 20 ຄົນ ໄດ້ເສຍຊີວິດແລ້ວ ແຕ່ລາຍລະອຽດຕ່າງໆ ແມ່ນຍັງບໍ່ຈະແຈ້ງເທື່ອ.
ອົງການຕຳຫຼວດແຫ່ງຊາດ ບໍ່ໄດ້ຢືນຢັນຈຳນວນຂອງຜູ້ເສຍຊີວິດດັ່ງກ່າວນັ້ນ ແລະ ກ່າວ
ວ່າ ຕຳຫຼວດພຽງສອງຄົນເທົ່ານັ້ນ ໄດ້ຮັບບາດເຈັບສາຫັດ ສ່ວນອີກສາມຄົນ ບາດເຈັບ
ເລັກນ້ອຍ ແລະ ລົດຫ້າຄັນຖືກເຜົາໄໝ້. ໃນຖະແຫລງການສະບັບໜຶ່ງ ຕຳຫຼວດກ່າວວ່າ ການປະ ຕິບັດການເພື່ອປາບພວກໂຈມຕີ ແມ່ນ “ພວມດຳເນີນໄປຢູ່” ແລະ ຈະສະໜອງຂໍ້ມູນອີກທີ່ໄດ້ຮັບຂ່າວເພີ້ມຕື່ມ.
ໂຄສົກຂອງພວກ al-Shabab ຄົນໜຶ່ງກ່າວຕໍ່ອົງການຂ່າວ Reuters ວ່າ ກຸ່ມຂອງຕົນ
ແມ່ນເປັນຜູ້ຮັບຜິດຊອບ ໃນການໂຈມຕີສອງບັ້ນດັ່ງ ກ່າວນັ້ນ.
ກຸ່ມ Al-Shabab ໄດ້ທຳການໂຈມຕີຫຼາຍບັ້ນ ຢູ່ໃນເຄັນຢາ ເພື່ອເປັນການແກ້ແຄນ ຕໍ່
ການມີສ່ວນຮ່ວມ ຂອງເຄັນຢາໃນປະຕິບັດການ ຕໍ່ຕ້ານ ກຸ່ມ al-Shabab ຢູ່ໃນໂຊມາເລຍ
ບ່ອນທີ່ພວກກຸ່ມຫົວຮຸນແຮງກຸ່ມນີ້ ມີຖານປະຕິບັດງານນັ້ນ. ເມື່ອເດືອນແລ້ວນີ້ ພວກຫົວ
ຮຸນແຮງ al-Shabab ໄດ້ໂຈມຕີ ມະຫາວິທະຍາໄລ Garissa ຢູ່ໃນຂົງເຂດດຽວກັນ
ຂອງເຄັນຢາ ທີ່ໄດ້ສັງຫານປະມານ 148 ຄົນ.
