ກຸ່ມກໍ່ການຮ້າຍອາລກາຍດາກ່າວວ່າຕົນໄດ້ເລືອກເອົານາຍ Ayman al-Zawahri ທີ່ເປັນ
ຊາວອີຈິບ ໃຫ້ເປັນຜູ້ສືບທອດຕຳແໜ່ງຫົວໜ້າເຄືອຂາຍກຸ່ມກໍ່ການຮ້າຍຂ້າມຊາດດັ່ງກ່າວຕໍ່
ຈາກນາຍ Osama bin Laden.
ກຸ່ມອາລກາຍດາໄດ້ພິມເຜີຍແຜ່ຄຳປະກາດທີ່ວ່ານີ້ ທາງເວັບໄຊທ໌ຂອງພວກມຸສລິມຫົວຮຸນ
ແຮງ ຊຶ່ງກຸ່ມອາລກາຍດາປະກາດວ່າ ຈະສືບຕໍ່ໃນທັນທີການເຮັດສົງຄາມສັກສິດຫຼື Jihad ຕໍ່ຕ້ານສະຫະລັດແລະອິສຣາແອລ ແລະເອີ້ນປະເທດທັງສອງວ່າພວກຮຸກຮານທີ່ບໍ່ນັບຖືສາ
ສະໜາແລະວ່າ ຕົນຈະສືບຕໍ່ການສູ້ລົບຈົນກວ່າກອງທັບຮຸກຮານທັງໝົດຖອນອອກໄປຈາກ
ດິນແດນອິສລາມ.
ນາຍ Zawahri ຊຶ່ງເປັນນາຍໝໍຜ່າຕັດຫຼືສັນຍະແພດທີ່ຈະມີອາຍຸ 60 ປີໃນອາທິດໜ້ານີ້
ໄດ້ເປັນຮອງນາຍ bin Laden ມາເປັນເວລາດົນນານແລ້ວ. ພວກນັກຊ່ຽວຊານ ດ້ານກໍ່
ການຮ້າຍມັກຈະຖືວ່າ ຜູ້ກ່ຽວເປັນນັກຍຸດທະສາດ ແລະຜູ້ຈັດແຈງ ດ້ານການປະຕິບັດການ
ຄົນສຳຄັນ ຂອງກຸ່ມກໍ່ການຮ້າຍອາລກາຍດາ. ພວກນັກວິເຄາະຫຼາຍຄົນໄດ້ສັນນິຖານວ່າ
ຜູ້ກ່ຽວຈະໄດ້ເຂົ້າກຳຕຳແໜ່ງ ຜູ້ນຳຂອງກຸ່ມກໍ່ການຮ້າຍອາລກາຍດາ ຫຼັງຈາກໜ່ວຍກ້າ
ຕາຍສະຫະລັດ ບຸກໂຈມຕີບ່ອນຫຼົບລີ້ ຂອງນາຍ bin Laden ໃນປາກິສຖານ ແລະສັງ
ຫານລາວໃນເດືອນແລ້ວນີ້.
ເປັນທີ່ເຊື່ອກັນວ່າ ນາຍ Zawahri ປະຕິບັດງານຢູ່ບ່ອນໃດບ່ອນນຶ່ງ ໃນເຂດພູຜາໃກ້
ຊາຍແດນປາກິສຖານທີ່ຕິດກັບອັຟການິສຖານ. ທ່ານ John Brennan ເຈົ້າໜ້າທີ່ຕໍ່
ຕ້ານພວກກໍ່ການຮ້າຍຂອງອະເມຣິກັນ ກ່າວໃນສັບປະດານີ້ວ່າ ສະຫະລັດກຳລັງຕາມ
ລ່າຫາໂຕຜູ້ກ່ຽວ.
ນາຍ Zawahri ມາຈາກຄອບຄົວຊົນຊັ້ນກາງ ທີ່ເປັນທ່ານໝໍແລະນັກວິຊາການ ແຕ່ຜູ້
ກ່ຽວໄດ້ມາພົວພັນ ກັບເລື່ອງສາສະໜາອິສລາມຫົວຮຸນແຮງ ໃນຕອນທີ່ຍັງເປັນໄວລຸ້ນ. ຂະນະທີ່ຮຽນເອົາປລິນຍາດ້ານການແພດນັ້ນ ຜູ້ກ່ຽວໄດ້ຊ່ອຍຈັດຕັ້ງກຸ່ມຫົວຮຸນແຮງອິສ
ລາມ Jihad ຂຶ້ນໃນອີຈິບ.