ລິ້ງ ສຳຫລັບເຂົ້າຫາ

ສຫລ ແລະ ອັງກິດ ມອບໂອນ ຖານທັບ ໃຫ້ແກ່ ກອງກຳລັງ ອັຟການິສຖານ


ບັນດາທະຫານ​ຂອງອັງກິດ ​ແລະສະຫະລັດ ​ໄດ້ຈັດ​ພິທີຂີດ​ໝາຍ
​ການ​ສິ້ນ​ສຸດປະຕິບັດ​ການ​ສູ້​ລົບ​ຢູ່​ແຂວງ Helman​ ທາງພາກ​ໃຕ້
ຂອງ​ອັຟກາ​ນິສຖານ ຢ່າງ​ເປັນ​ທາງ​ການ ​ດ້ວຍ​ການ​ມອບ​ໂອນ​
ການ​ຄວບ​ຄຸມຖານ​ທັບທີ່​ໃຫຍ່​ທີ່​ສຸດ​ໃນ​ປະ​ເທດ​ ໃຫ້​ແກ່​ກອງ​ກຳລັງ
​ອັຟກາ​ນິສຖານ.

ທຸງຊາດ​ຂອງ​ອັງກິດ ​ໄດ້​ຖືກ​ຊັກ​ລົງ​ໃນວັນອາທິດ​ວານ​ນີ້ ​ໃນ​ພິທີ​
ດັ່ງກ່າວ​ຢູ່​ຄ້າຍ Bastion ​ໃນ​ຂະນະ​ດຽວ​ກັນ ​ທຸງ​ຊາດ​ອາ​ເມຣິກາ
​ໄດ້​ຖືກ​ຊັກ​ລົງ​ມາ​ເປັນຄັ້ງສຸດ​ທ້າຍ ​ຢູ່​ຄ້າຍ Leatherneck ​ທີ່ຢູ່​
ໃກ້ໆ​ກັນນັ້ນ.

ທ່ານ Michael Fallon ລັດຖະມົນຕີ​ປ້ອງ​ກັນ​ປະ​ເທດ​ອັງກິດ ​ໄດ້​ກ່າວ​ສະດຸ​ດີ ບົດບາດ
​ຂອງ​ປະ​ເທດ​ຂອງ​ທ່ານ ໃນ​ການ​ສູ້​ລົບ​ກັບ​ພວກຕາ​ລີບານ ​ໂດຍ​ເວົ້າ​ວ່າ​ກຳລັງ​ຂອງ​ອັງກິດ
​ຍຸດຕິການ​ປະຕິບັດ​ງານ​ ຂອງ​ເຂົາ​ເຈົ້າລົງ ດ້ວຍ​ຄວາມ​ພາກພູມ​ໃຈ ​ແລະມອບ​ໃຫ້​ແກ່
​ອັຟກາ​ນິສຖານ ​“ໂອກາດທີ່​ດີ​ທີ່​ສຸດ​ເທົ່າ​ທີ່​ເປັນ​ໄປ​ໄດ້ ສຳ​ຫລັບອະນາຄົດ​ທີ່ທຸ່ນ​ທ່ຽງ​.”

ຢູ່​ຈຸດ​ສູງ​ສຸດ​ຂອງ​ການ​ສູ້​ລົບນັ້ນ ຖານ​ທັບ​ດັ່ງກ່າວ​ຊຶ່ງ​ເປັນຄ້າຍ​ລວມ ຂອງກຳລັງ​ແນວໂຮມ ​ແມ່ນສາມາດ​ຮອງ​ຮັບ​ພະນັກ​ງານ​ໄດ້​ເຖິງ 40,000 ຄົນ ລວມທັງກຳລັງ​ທະຫານ​ ​ແລະ​ບັນດາ​ພະນັກງານ​ຮັບ​ເໝົາ ຕ່າງ​ປະ​ເທດ.

​ພ້ອມ​ກັບ​ການ​ຖອນ​ອອກໂດຍລວມທີ່​ມີ​ຂຶ້ນ​ໃນ​ຂະນະ​ນີ້ ກໍ​ແມ່ນ​ຈະ​ຍັງ​ມີ ທະຫານຕ່າງປະ​ເທດ 12,000 ຄົນ ຢູ່​ໃນ​ອັຟກາ​ນິສຖານ​ຕໍ່​ໄປ ຫຼັງຈາກ​ເດືອນ​ທັນ​ວາ ​ເພື່ອ​ໃຫ້ການ​ເຝິກ​ແອບ ​ແລະ​ແນະນຳ​ກອງ​ກຳລັງ​ອັຟກາ​ນິສຖານ​.

XS
SM
MD
LG