ພະນັກງານສັນຍາຈ້າງຂອງກະຊວງປ້ອງກັນປະເທດສະຫະລັດ
3 ຄົນ ທີ່ຊ່ອຍເຝິກແອບ ທະຫານອາກາດອັຟການິສຖານ ໄດ້
ຖືກຍິງຕາຍ ຢູ່ທີ່ສະໜາມບິນນະຄອນຫລວງ Kabul ໃນອັນທີ່
ແຫລ່ງຂ່າວທະຫານ ກ່າວວ່າ ເປັນ “ການໂຈມຕີ ຂອງຄົນ
ຢູ່ວົງໃນ.”
ພວກ Taliban ໄດ້ອ້າງເອົາຄວາມຮັບຜິດຊອບ ໃນການສັງຫານ
ເມື່ອຄ່ຳຄືນວັນພະຫັດວານນີ້.
ທ້າວ Zabihulla Mujahid ໂຄສົກຂອງພວກກະບົດກ່າວວ່າ
ໜ່ວຍແຊກຊຶມຂອງ Taliban ຄົນນຶ່ງ ທີ່ເຮັດວຽກຢູ່ໃນສະໜາມບິນ Kabul ໄດ້ປະຕິບັດການໂຈມຕີ ແລະ ໄດ້ຖືກຍິງຕາຍໃນການຕໍ່ສູ້ກັນ.
ພວກທີ່ຢູ່ໃນເຄື່ອງແບບອັຟການິສຖານ ໄດ້ຫັນປືນຂອງພວກເຂົາເຈົ້າ ໃສ່ບັນດາທະຫານ
ຄູເຝິກແອບຊາວອາເມຣິກັນ ໃນໄລຍະຜ່ານມາ.
ໃນເດືອນສິງຫາແລ້ວນີ້ ພົນຕີສະຫະລັດ Harold Greene ຖືກຍິງ ຕາຍ ໂດຍທະຫານ
ອັຟການິສຖານຄົນນຶ່ງ.
ນອກນັ້ນ ໃນວັນພະຫັດວານນີ້ ຜູ້ວາງລະເບີດສະຫລະຊີບຄົນນຶ່ງ ໄດ້ໂຈມຕີ ພິທີສົ່ງສະການ ໃນພາກຕາເວັນອອກ ຂອງອັຟການິສຖານ. 16 ຄົນຖືກຂ້າຕາຍ ແລະ ຫຼາຍສິບຄົນໄດ້ຮັບບາດເຈັບ.
ເຈົ້າໜ້າທີ່ທ້ອງຖິ່ນ ກ່າວວ່າ ການໂຈມຕີໄດ້ເກີດຂຶ້ນ ໃນ ເມືອງ Mehtarlam ຢູ່ແຂວງ
Laghman ໃນລະຫວ່າງພິທີສົ່ງສະການ ໃຫ້ແກ່ຜູ້ບັນຊາການຕຳຫລວດ ແລະ ອີກສາມ
ຄົນ ທີ່ໄດ້ເສຍຊີວິດ ຍ້ອນການວາງລະເບີດແຄມທາງ ເມື່ອຕອນເຊົ້າວັນພະຫັດວານນີ້.
ຍັງບໍ່ມີຜູ້ໃດອອກມາອ້າງເອົາຄວາມຮັບຜິດຊອບ ໃນການໂຈມຕີ ທີ່ແຂວງ Laghman ເທື່ອ.