ລິ້ງ ສຳຫລັບເຂົ້າຫາ

ກຸ່ມຕາລີບັນ ຮຽກຮ້ອງໃຫ້ ຊາວອັຟການິສຖານ ໂຈມຕີ ຖານທັບຕ່າງປະເທດ (ເບິ່ງສະໄລດ໌ກັບວີດີໂອ)

  • ສິງ ບູຣົມມະວົງ

ການປະທ້ວງຕໍ່ການຈູດເຜົາຄໍາພີກູຣານ ທີ່ອັຟການິສຖານ. ວັນທີ 23 ກຸມພາ 2012.

ກຸ່ມ​ຕາ​ລີ​ບັນ ຮຽກຮ້ອງ​ໃຫ້​ຊາວ​ອັຟກາ​ນິສຖານ​ທໍາ​ການ​ໂຈມ​ຕີ​ພວກຖານ​ທັບ​ທະຫານ​ຕ່າງປະ​ເທດ​ແຫ່ງ​ຕ່າງໆ​ ​ເພື່ອ​ເປັນ​ການ​ຕອບ​ໂຕ້​ຕໍ່​ການ​ຈູດເຜົາ​ຄໍາ​ພີ​ Qurans ທີ່​ຖານ​ທັບ​ກຸ່ມ​ເນ​ໂຕ້​ແຫ່ງ​ນຶ່ງ ​ໃນ​ຂະນະ​ທີ່​ການປະ​ທ້ວງ​ດໍາ​ເນີນ​ສືບ​ຕໍ່​ໄປ​ເປັນ​ມື້​ທີ​ສາມ​ລຽນຕິດ.

ໃນ​ຖະ​ແຫລ​ງການ​ສະບັບ​ນຶ່ງ​ໃນ​ວັນ​ພະຫັດ​ມື້​ນີ້ ກຸ່ມ​ຕາ​ລີ​ບັນ​ຮຽກຮ້ອງໃຫ້​ປະຊາຊົນ​ອັຟກາ​ນິສຖານ ​ຈົ່ງ​ພາກັນ​ສັງຫານ ຈັບ​ກຸມ​ ແລະ​ທຸບ​ຕີ ພວກ​ທະຫານ​ຕ່າງປະ​ເທດ ເພື່ອ​ເປັນ​ບົດຮຽນ​ອັນ​ນຶ່ງ​ບໍ່​ໃຫ້​ຢຽບ​ຍໍ່າທໍາລາຍ​ປຶ້ມ​ສາສະໜາ​ອິສລາມ​ຈັກ​ເທື່ອ​ນັ້ນ.

ປະຊາຊົນ​ຫລາຍ​ພັນ​ຄົນ​ໄດ້​ເຂົ້າ​ຮ່ວມ​ໃນ​ການ​ເດີນ​ຂະ​ບວນປະ​ທ້ວງໃນ​ແຫ່ງ​ຕ່າງໆ ຮວມທັງ​ໃນ​ແຂວງ Laghman ​ໃນ​ພາກ​ຕາ​ເວັນ​ອອກແລະ​ໃນ​ເມືອງ Jalalabad ທີ່​ບາງ​ຄົນ​ພາກັນ​ຮ້ອງ​ໂຮ​ຄໍາ​ຂວັນ​ທີ່​ວ່າ “ຈົ່ງ​ໃຫ້​ອາ​ເມຣິກາ​ພິນາດ” ນັ້ນ.

ການ​ປະ​ທ້ວງ​ດັ່ງກ່າວ​ມີ​ຂຶ້ນ​ນຶ່ງ​ມື້​ຫລັງ​ຈາກ​ປະທານາທິບໍດີ Hamid Karzai ​ແຫ່ງ​ອັຟກາ​ນິສຖານ ​ຮຽກຮ້ອງ​ໃຫ້​ປະຊາຊົນ​ຢູ່​ໃນ​ຄວາມສະຫງົບ ​ໂດຍ​ກ່າວ​ວ່າ ພົນລະ​ເມືອງ​ມີ​ສິດ​ທໍາ​ການ​ປະ​ທ້ວງ ​ແຕ່​ບໍ່​ຄວນ​ຈະກໍ່​ຄວາມ​ຮຸນ​ແຮງ​ຂຶ້ນ.

ນັບ​ແຕ່​ການ​ເດີນ​ຂະ​ບວນປະ​ທ້ວງ​ໄດ້​ລະ​ເບີດ​ຂຶ້ນ ​ຕັ້ງ​ແຕ່​ວັນ​ອັງຄານ ​ມື້ກ່ອນ​ນີ້​ມາ ການ​ປະ​
ທະ​ກັນ​ຫລາຍ​ບັ້ນ​ລະຫວ່າງ​ພວກ​ກໍາລັງ​ຮັກສາຄວາມ​ສະຫງົບ​ຂອງ​ລັດຖະບານ​ແລະ​ພວກ​ປະ
ທ້ວງ ​ໄດ້​ຍັງ​ຜົນ​ເຮັດ​ໃຫ້ປະຊາຊົນ​ເສຍ​ຊີວິດ​ໄປ​ແລ້ວ​ຢ່າງ​ໜ້ອຍ 7 ຄົນ.

ນາຍ Nazif Sharani ຊຶ່ງ​ເປັນ​ຄົນ​ອັຟກາ​ນິສຖານ​ທີ່​ເປັນວິ​ເຄາະ​ເຫດການ​ໃນ​ເອ​ເຊຍ​ໃຕ້ທີ່​ມະຫາວິທະຍາ​ໄລ Indiana ກ່າວ​ຕໍ່​ວີ​ໂອ​ເອວ່າ ການ​ປະ​ທ້ວງ ແມ່ນເລື້ອງ​ທີ່ຫລາຍ​ໄປ​ກວ່າ​ເຫດການ​ຄັ້ງ​ນີ້.

ທ່ານ Ashton Carter ຮອງ​ລັດຖະມົນຕີ​ປ້ອງ​ກັນ​ປະ​ເທດ​ສະຫະລັດ ໄດ້​ພົບ​ປະ​ກັບ​ຄະນະ
ນໍາພາ​ຂອງ​ອັຟກາ​ນິສຖານ​ຢູ່​ທີ່​ກຸງ​ຄາ​ບູລ​ໃນ​ວັນ​ພຸດວານ​ນີ້ຮວມທັງ​ປະທານາທິບໍດີ Karzai
ເພື່ອ​ຂໍ​ຂະ​ມາ​ໂທດ​ອີກ​ຄັ້ງ​ໃໝ່ກ່ຽວ​ກັບ​ເຫດການ​ດັ່ງກ່າວ.

XS
SM
MD
LG