ກຸ່ມປົກປ້ອງສິດທິມະນຸດທີ່ສຳຄັນກຸ່ມນຶ່ງກ່າວວ່າ ລັດຖະບານອັຟການິສຖານ ຄວນຈະລົດ
ໂທດປະຫານຊີວິດ ໃຫ້ແກ່ທະຫານອັຟການິສຖານ ທີ່ຖືກພົບເຫັນ ວ່າມີຄວາມຜິດໃນການ
ສັງຫານທະຫານຝຣັ່ງ 5 ຄົນ ໃນຕົ້ນປີນີ້.
ກຸ່ມປົກປ້ອງສິດທິມະນຸດ Human Rights Watch ກ່າວໃນວັນພຸດນີ້ວ່າ ຝຣັ່ງຄວນຂໍຮ້ອງ
ຢ່າງເປັນທາງການ ໃຫ້ລັດຖະບານອັຟການິສຖານຫຼຸດໂທດ ປະຫານຊີວິດດັ່ງກ່າວ.
ກຸ່ມດັ່ງກ່າວໃຫ້ຂໍ້ສັງເກດວ່າ ຝຣັ່ງໄດ້ລົບລ້າງໂທດປະຫານຊີວິດແລະໄດ້ໂຄສະ ນາໃຫ້ທົ່ວໂລກ
ພາກັນລົບລ້າງໂທດນີ້ເຊັ່ນດຽວກັນ.
ບັນດາເຈົ້າໜ້າທີ່ຂອງກຸ່ມປົກປ້ອງສິດທິມະນຸດ Human Rights Watch ຮ້ອງການລົງໂທດ
ປະຫານຊີວິດນີ້ວ່າ “ເປັນການປະຕິບັດທີ່ໂຫດຮ້າຍ” ບໍ່ຄວນນໍາມາໃຊ້ເລີຍ ເຖິງແມ່ນມັນຈະເປັນ
“ຄວາມຜິດທີ່ໂຫດຫ້ຽມ” ດັ່ງເຫດການນີ້ກໍຕາມ.
ໃນວັນອັງຄານຜ່ານມານີ້ ສານທະຫານອັຟການິສຖານ ໄດ້ສັ່ງໃຫ້ປະຫານຊີວິດນາຍ Abdul
Sabor ດ້ວຍການແຂວນຄໍໃນຖານສັງຫານທະຫານຝຣັ່ງ 5 ຄົນ ໃນລະຫວ່າງທີ່ມີການຊ້ອມ
ລົບຮ່ວມກັນໃນເດືອນມັງກອນຕົ້ນປີນີ້.
ການຍິງກັນທີ່ແຂວງ Kapisa ໃນພາກຕາເວັນອອກຂອງອັຟການິສຖານ ໄດ້ສັງຫານທະຫານ
ຝຣັ່ງ 4 ຄົນແລະອີກ 15 ຄົນໄດ້ຮັບບາດເຈັບ ຮວມທັງຄົນນຶ່ງ ທີ່ໄດ້ເສຍຊີວິດໃນເວລາຕໍ່ມາຍ້ອນ
ທົນພິດບາດແຜບໍ່ໄດ້.
ເຫດການດັ່ງກ່າວໄດ້ຊ່ວຍເຮັດໃຫ້ປະທານາທິບໍດີຝຣັ່ງ ທ່ານ Francois Hollande ເລັ່ງລັດ
ການຖອນກຳລັງສູ້ລົບຂອງຝຣັ່ງ ທີ່ຢູ່ພາຍໃຕ້ການນຳພາ ຂອງອົງການ NATO ອອກຈາກ
ອັຟການິສຖານໄວຂຶ້ນ.
ກໍາລັງທະຫານຝຣັ່ງ ຊຶ່ງໃຫ່ຍເປັນອັນດັບຫ້າຂອງກຳລັງປະສົມນັ້ນ ມີກໍານົດທີ່ຈະຖອນອອກຈາກ
ອັຟການິສຖານໃນທ້າຍປີນີ້.