ບັນດາເຈົ້າໜ້າທີ່ອັຟການິສຖານກ່າວວ່າ ປະຊາຊົນປະມານນຶ່ງພັນຄົນ ສ່ວນໃຫຍ່ແມ່ນ
ນັກສຶກສາ ພາກັນເດີນຂະບວນໄປຕາມຖະໜົນຫົນທາງສາຍຕ່າງໆໃນວັນອາທິດມື້ນີ້
ໃນພາກຕາເວັນອອກຂອງອັຟການິສຖານ ເພື່ອທໍາການປະທ້ວງຕໍ່ຂໍ້ຕົກລົງເປັນພາຄີ
ຍຸດທະສາດໄລຍະຍາວກັບສະຫະລັດ ທີ່ຈະອະນຸຍາດໃຫ້ກໍາລັງທະຫານສະຫະລັດ
ບາງຈໍານວນມີໜ້າຢູ່ໃນອັຟການິສຖານຕໍ່ໄປ ຫລັງຈາກປີ 2014 ຊຶ່ງເປັນເວລາທີ່ພວກ
ທະຫານສູ້ລົບຂອງນາໆຊາດທັງໝົດ ກໍານົດອອກຈາກປະເທດໄປນັ້ນ.
ກອງປະຊຸມຫລວງປະຈໍາປີຂອງພວກນັກການເມືອງ ພວກອາວຸໂສຊົນເຜົ່າອັຟການິສຖານ
ປະມານ 2 ພົນຄົນ ໄດ້ໃຫ້ການສະໜັບສະໜຸນຕໍ່ການເປັນພາຄີກັບສະຫະລັດໃນວັນເສົາ
ວານນີ້ ໃນຕອນເສັດສິ້ນກອງປະຊຸມເປັນເວລາ 4 ມື້. ເຖິງຢ່າງໃດກໍດີ ພວກຜູ້ແທນທີ່ມາຮ່ວມ
ໃນກອງປະຊຸມຫລວງ loya Jirga ນັ້ນ ມີເງື່ອນໄຂສໍາຄັນບາງຢ່າງໃນການໃຫ້ຄວາມສະໜັບ
ສະໜຸນຂອງເຂົາເຈົ້າຕໍ່ຂໍ້ຕົກລົງກັນດັ່ງກ່າວ. ຄືພວກຜູ້ນໍາຢາກໃຫ້ຍຸດຕິການບຸກໂຈມຕີໃນຍາມ
ກາງຄືນທີ່ຜູ້ຄົນບໍ່ມັກ ໂດຍພວກກໍາລັງປະສົມນາໆຊາດນັ້ນ ແລະໃຫ້ຮັບປະກັນວ່າສະຫະລັດ
ຈະມອບໝາຍພວກທີ່ຖືກຈັບກຸມທັງໝົດໃຫ້ຢູ່ໃຕ້ການຄວບຄຸມຂອງອັຟການິສຖານ.
ນອກນັ້ນ ພວກຜູ້ຮ່ວມປະຊຸມຍັງຂໍຮ້ອງໃຫ້ປະທານາທິບໍດີ Hamid Karzai ໃຫ້ຄວາມໝັ້ນໃຈ
ແກ່ເຂົາເຈົ້າເຊ່ນກັນວ່າ ຂໍ້ຕົກລົງໃດໆກໍຕາມກັບກຸງວໍຊິງຕັນ ຈະມີກໍານົດເວລາພຽງ 10 ປີແລະ
ເຂົາເຈົ້າໄດ້ສະເໜີຄໍາແນະນໍາຕ່າງໆຕໍ່ລັດຖະບານ ສໍາລັບການດໍາເນີນຄວາມພະຍາຍາມຂອງ
ລັດຖະບານເພື່ອສ້າງສັນຕິພາບກັບກຸ່ມຕາລີບັນໂດຍຜ່ານການເຈລະຈາສ້າງຄວາມປອງດອງ
ຊາດນັ້ນ.
ກຸ່ມຕາລີບັນໄດ້ປະນາມກອງປະຊຸມຫລວງ loya Jirga ແລະຮຽກຮ້ອງໃຫ້ພວກທະຫານ
ຕ່າງຊາດທັງໝົດອອກຈາກປະເທດໄປ.