ລິ້ງ ສຳຫລັບເຂົ້າຫາ

ມືລະເບີດ ສະຫຼະຊີບ ທີ່ສົງໄສ ໄດ້ສັງຫານ 4 ຄົນ ທີ່ຖານທັບອາກາດ ສຫລ ເໜືອກາບູລ


ທຸງຊາດສະຫະລັດ ຫ້ອຍຢູ່ລະບຽງບ້ານພັກ ທີ່ຖານທັບອາກາດ Bagram ໃນແຂວງ Parwan ຂອງອັຟການິສຖານ.

ທຸງຊາດສະຫະລັດ ຫ້ອຍຢູ່ລະບຽງບ້ານພັກ ທີ່ຖານທັບອາກາດ Bagram ໃນແຂວງ Parwan ຂອງອັຟການິສຖານ.

ຜູ້​ສົງ​ໄສ​ຄົນ​ນຶ່ງ​ເປັນ​ມື​ລະ​ເບີດ​ສະຫຼະຊີບ ​ຂອງ​ກຸ່ມ​ຕາ​ລີ​ບານ ​ໄດ້​ບີບ​ຄະ​ນວນ​ລະ​ເບີດ​ໃຫ້​ແຕກຂຶ້ນ ທີ່​ຖານ​ທັບ​ອາກາດ Bagram ຊຶ່ງ​ບໍລິຫານ​ງານ​ໂດຍ​ກອງທັບ​ສະຫະລັດ​ໃນ​ອັຟ ກາ​ນິສຖານ ​ເຮັດ​ໃຫ້​ຢ່າງ​ໜ້ອຍ 4 ຄົນ​ເສຍ​ຊີວິດ​ແລະ​ອີກ 14 ຄົນ​ໄດ້​ຮັບ​ບາດ​ເຈັບ.

​ແຫຼ່ງຂ່າວ​ຂອງ​ສື່​ມວນ​ຊົນ​ອັຟກາ​ນິສຖານ​ລາຍ​ງານ​ວ່າ ການ​ໂຈມ​ຕີ​ດັ່ງກ່າວ​ມີ​ຂຶ້ນຢູ່​ນອກ​ຫ້ອງ​ກິນ​ເຂົ້າຂອງ​ຖານ​ທັບ. ຜູ້​ໂຈມ​ຕີຄົນນີ້ ​ໄດ້​ປອມ​ໂຕ​ເປັນ​ຄົນ​ງານ.​ ຖານ​ທັບອາກາດ Bagram ຕັ້ງຢູ່​ທາ​ງ​ເໜືອ​ຂອງ​ນະຄອນຫຼວງກາ​ບູລ.

ທ່ານ Abdullah Abdullah ຫົວໜ້າ​ບໍລິຫານ​ ຂອງ​ ອັຟກາ​ນິສຖານ ກ່າວ​ຜ່ານ ທາງ Tweeter ຂອງ​ທາງ​ການ​ວ່າ “ຂ້າພະ​ເຈົ້າຂໍ​ປະນາມ​ ການ​ໂຈມ​ຕີ​ສະຫຼະຊີທີ່ Bagram ​ແລະ​ຂໍ​ຢືນ​ຢູ່ ດ້ວຍ​ຄວາມ​ເປັນ​ນ້ຳ​ນຶ່ງ​ໃຈ​ດຽວ ກັບ​ພວກຄອບຄົວ​ ແລະ ເພື່ອນ​ມິດ​ຂອງ ​ພວກທີ່ເສຍ​ຊີວິດ​ແລະ​ໄດ້​ຮັບ​ບາດ​ເຈັບ​ໃນ​ມື້ີ້ນີ້.”

ສ່ວນ​ນາຍ​ພົນ John W. Nicholson ຂອງ​ກອງທັບ​ບົກ​ສະຫະລັດ​ຊຶ່ງ​ເປັນຜູ້​ບັນຊາ​ການ ກຳລັງ​ອົງການ​ເນ​ໂຕ້​ ໃນ​ອັຟກາ​ນິສຖານ ກ່າວ​ໃນ​ຖະ​ແຫຼງຂ່າວ ​ສະບັບນຶ່ງ​ວ່າ “​ໃນ​ວັນ​ທີ 12 ພະຈິກ ລະ​ເບີດ​ລູກ​ນຶ່ງ​ໄດ້​ແຕກ​ຂຶ້ນຢູ່ທີ່​ສະໜາມ​ບິນ Bagram ທີ່​ເຮັດ​ໃຫ້​ມີ​ຜູ້​ບາ​ດ​ເຈັບ​ລົ້ມຕາຍຫຼາຍຄົນ. 4 ຄົນ​ເສຍ​ຊີວິດ​ແລະ​ປະມານ 14 ຄົນ​ບາດ​ເຈັບ.”

ຖະ​ແຫຼງການ​ກ່າວ​ຕໍ່​ໄປ​ວ່າ “ສຳລັບ​ພວກ​ທີ່​ແນ​ເປົ້າໝາຍ​ໃສ່​ກຳລັງ​ປະສົມ ຫລື ANDSF ​ແລ​ະພົນລະ​ເຮືອນ​ອັຟກາ​ນິສຖານ​ແລ້ວ ກຳລັງ​ປະສົມ​ແລະ​ກຳລັງ​ສະ ຫະລັດ​ໃນ​ອັຟກາ​ນິສຖານ ຈະ​ສືບ​ຕໍ່​ໃຫ້ການ​ຝຶກ​ແອບ ​ໃຫ້​ຄະ​ແນະນຳ ​ແລະ​ໃຫ້ການ​ຊ່ອຍ​ເຫລືອ​ແກ່​ພາຄີ​ຂອງ​ພວກ​ເຮົາເພື່ອ​ເຮັດ​ໃຫ້​ອັຟກາ​ນິສຖານ​ເປັນ​ປະ​ເທດ ທີ່​ດີ​ຂຶ້ນ.”

ທ້າວ Zabihullah Mujahid ​ໂຄສົກ​ຂອງ​ກຸ່ມ​ຕາ​ລີ​ບານ ​ໄດ້​ອ້າ​ງ​ເອົາ​ຄວາມ​ຮັບຜິດຊອບ​ໃນ​ການ​ໂຈມ​ຕີ​ດັ່ງກ່າວ ​ໂດຍ​ເວົ້າວ່າ ຜູ້​ໂຈມ​ຕີ​ຂອງ​ຕົນ​ໄດ້​ແຊກ​ຊຶມ​ເຂົ້າ​ໄປ ​ໃນ​ໝູ່​ພະນັກ ງານ​ ຂອງ​ຖານ​ທັບ​ອາກາດ​ດັ່ງກ່າວ ​ມາ​ໄດ້​ຫຼາຍ​ເດືອນ​ແລ້ວ ກ່ອນທີ່​ຈະ​ທຳ​ການ​ໂຈມ​ຕີ. ລາວ​ກ່າວ​ວ່າ ​ເຈົ້າໜ້າ​ທີ່​ທະຫານ​ສະຫະລັດກຳລັງ​ພວມ​ຫຍຸ້ງ​ຢູ່ກັບ​ການ​ຝຶກ​ແອບ​ໃນ​ຕອນ​ເຊົ້າເວລາ​ພວກ​ເຂົາ​ຖືກ​ໂຈມ​ຕີ.

​ໂຄສົກ​ກ່າວ​ອ້າງ​ວ່າ ມີ​ທະຫານ​ສະຫະລັດ​ຫລາຍ​ກວ່າ 20 ຄົນ ​ເສຍ​ຊີວິດ​ແລະອີກ​ຫລາຍ​ຄົນ​ບາດ​ເຈັບ ຮວມທັງ​ທະຫານ​ອັຟກາ​ນິສຖານ​ນຳ​ດ້ວຍ. ​ແຕ່​ກຸ່ມ​ຕາ​ລີບານ​ມັກ​ເວົ້າ​ໂຍກ​ກ່ຽວ​ກັບ​ຈຳນວນ​ຜູ້​ບາດ​ເຈັບ​ລົ້ມຕາຍ ໃນ​ການ​ໂຈມ​ຕີ​ທຳນອງ​ນີ້.

ອ່ານຂ່າວນີ້ຕື່ມເປັນພາສາອັງກິດ

ສະແດງຄວາມເຫັນໃຫ້ເບິ່ງ

XS
SM
MD
LG