ນາຍົກລັດຖະມົນຕີອອສເຕຣເລຍ ກ່າວວ່າ ການໂຈມຕີຮ້ານ
ອາຫານ ຢູ່ໃນນະຄອນຊິດນີ ທີ່ພາໃຫ້ມີການເສຍຊີວິດ ໃນ
ອາທິດນີ້ ແມ່ນເປັນ “ສັນຍານເຕືອນທີ່ໜ້າຢ້ານກົວ” ສຳຫລັບ
ບັນດາເຈົ້າໜ້າທີ່ທັງຫຼາຍ ແລະ ມັນອາດສາມາດລີກເວັ້ນໄດ້.
ໃນຄຳສຳພາດ ຢູ່ສະຖານີວິທະຍຸອອສເຕຣເລຍ ເມື່ອວັນ
ພະຫັດມື້ນີ້ ນາຍົກລັດຖະມົນຕີ Tony Abbott ຍັງໃຫ້ຄຳ
ໝັ້ນສັນຍາວ່າ ລັດຖະບານຂອງທ່ານ ຈະທຳການສືບສວນ
ສອບສວນການໂຈມຕີນີ້ ຢ່າງ “ວ່ອງໄວ ແລະ ລະອຽດ
ຮອບດ້ານ.”
ຄົນຮ້າຍຜູ້ຊາຍທີ່ເກີດຢູ່ປະເທດອີຣ່ານ ມີປືນລ່າສັດທີ່ຖືກຕັດເລົາອອກນັ້ນ ໄດ້ບຸກເຂົ້າຢຶດ ຮ້ານອາຫານ Lindt Chocolate Café ແລ້ວຈັບເອົາໂຕປະກັນ 17 ຄົນ ແລະ ຄຸມໂຕພວກເຂົາເຈົ້າໄວ້ເປັນເວລາ 16 ຊົ່ວໂມງ ໃນວັນຈັນຜ່ານມາ. ຜູ້ກ່ຽວ ແລະ ໂຕປະກັນສອງຄົນໄດ້ຖືກຂ້າຕາຍ ໃນເວລາເຈົ້າໜ້າທີ່ ຕຳຫລວດໄດ້ບຸກເຂົ້າໄປໃນຮ້ານອາຫານດັ່ງກ່າວ.
ມືປືນ ໄວ 50 ປີຄົນນີ້ ມີຊື່ວ່າ Man Haron Monis ໄດ້ຖືກປະກັນໂຕອອກມາ ຫຼັງຈາກຖືກ ກ່າວຟ້ອງວ່າ ມີສ່ວນກ່ຽວພັນ ໃນການຄາດຕະກຳ ຂອງອະດີດພັນລະຍາຂອງລາວ. ຜູ້ກ່ຽວຍັງໄດ້ຖືກ ກ່າວຟ້ອງ ຫຼາຍກວ່າ 40 ຂໍ້ຫາ ໃນການລວນລາມທາງເພດ.
ໃນວັນພຸດວານນີ້ ທ່ານ Abbott ໄດ້ປະກາດການສືບສວນສອບສວນ ເບິ່ງວ່າ ເປັນຍ້ອນ
ຫຍັງ ທ້າວ Monis ຈຶ່ງໄດ້ຖືກຕັດອອກຈາກບັນຊີຕິດຕາມເບິ່ງ ຂອງພວກກໍ່ການຮ້າຍ
ເປັນຍ້ອນຫຍັງ ຜູ້ກ່ຽວຈຶ່ງຖືກປະ ກັນໂຕອອກມາໄດ້ ແລະ ເປັນຍ້ອນຫຍັງຜູ້ກ່ຽວສາມາດ
ຊື້ປືນລ່າສັດ ໄດ້ ທີ່ປາກົດວ່າຖືກຕ້ອງຕາມກົດໝາຍ.
